Read Roman Urdu Geo yashūa 20 Bible Online

yashūa 20 - Roman Urdu Geo bible

yashūa 20

¹rab ne yashūa se kahā,

²“isrāīliyoṅ ko hukm de ki un hidāyāt ke mutābiq panāh ke shahr chun lo jinheṅ maiṅ tumheṅ mūsā kī mārifat de chukā hūṅ.

³in shahroṅ meṅ wuh log farār ho sakte haiṅ jin se koī ittifāqan yānī ġhairirādī taur par halāk huā ho. yih unheṅ mare hue shaḳhs ke un rishtedāroṅ se panāh deṅge jo badlā lenā chāheṅge.

⁴lāzim hai ki aisā shaḳhs panāh ke shahr ke pās pahuṅchne par shahr ke darwāze ke pās baiṭhe buzurgoṅ ko apnā muāmalā pesh kare. us kī bāt sun kar buzurg use apne shahr meṅ dāḳhil hone kī ijāzat deṅ aur use apne darmiyān rahne ke lie jagah de deṅ.

⁵ab agar badlā lene wālā us ke pīchhe paṛ kar wahāṅ pahuṅche to buzurg mulzim ko us ke hāth meṅ na deṅ, kyūṅki yih maut ġhairirādī taur par aur nafrat rakhe baġhair huī hai.

⁶wuh us waqt tak shahr meṅ rahe jab tak maqāmī adālat muāmale kā faislā na kar de. agar adālat use begunāh qarār de to wuh us waqt ke imām-e-āzam kī maut tak us shahr meṅ rahe. is ke bād use apne us shahr aur ghar ko wāpas jāne kī ijāzat hai jis se wuh farār ho kar āyā hai.”

⁷isrāīliyoṅ ne panāh ke yih shahr chun lie: naftālī ke pahāṛī ilāqe meṅ galīl kā qādis, ifrāīm ke pahāṛī ilāqe meṅ sikam aur yahūdāh ke pahāṛī ilāqe meṅ qiryat-arbā yānī habrūn.

⁸daryā-e-yardan ke mashriq meṅ unhoṅ ne basar ko chun liyā jo yarīhū se kāfī dūr maidān-e-murtafā meṅ hai aur rūbin ke qabīle kī milkiyat hai. mulk-e-jiliād meṅ rāmāt jo jad ke qabīle kā hai aur basan meṅ jaulān jo manassī ke qabīle kā hai chunā gayā.

⁹yih shahr tamām isrāīliyoṅ aur isrāīl meṅ rahne wāle ajnabiyoṅ ke lie muqarrar kie gae. jis se bhī ġhairirādī taur par koī halāk huā use in meṅ panāh lene kī ijāzat thī. in meṅ wuh us waqt tak badlā lene wāloṅ se mahfūz rahtā thā jab tak maqāmī adālat faislā nahīṅ kar detī thī.