Read Roman Urdu Geo yashūa 21 Bible Online

yashūa 21 - Roman Urdu Geo bible

yashūa 21

¹phir lāwī ke qabīle ke ābāī gharānoṅ ke sarbarāh ilīazar imām, yashūa bin nūn aur isrāīl ke bāqī qabīloṅ ke ābāī gharānoṅ ke sarbarāhoṅ ke pās āe

²jo us waqt sailā meṅ jamā the. lāwiyoṅ ne kahā, “rab ne mūsā kī mārifat hukm diyā thā ki hameṅ basne ke lie shahr aur rewaṛoṅ ko charāne ke lie charāgāheṅ dī jāeṅ.”

³chunāṅche isrāīliyoṅ ne rab kī yih bāt mān kar apne ilāqoṅ meṅ se shahr aur charāgāheṅ alag karke lāwiyoṅ ko de dīṅ.

⁴qur'ā ḍālā gayā to lāwī ke gharāne qihāt ko us ke kunboṅ ke mutābiq pahlā hissā mil gayā. pahle hārūn ke kunbe ko yahūdāh, shamāūn aur binyamīn ke qabīloṅ ke 13 shahr die gae.

⁵bāqī qihātiyoṅ ko dān, ifrāīm aur maġhribī manassī ke qabīloṅ ke 10 shahr mil gae.

⁶jairson ke gharāne ko ishkār, āshar, naftālī aur manassī ke qabīloṅ ke 13 shahr die gae. yih manassī kā wuh ilāqā thā jo daryā-e-yardan ke mashriq meṅ mulk-e-basan meṅ thā.

⁷mirārī ke gharāne ko us ke kunboṅ ke mutābiq rūbin, jad aur zabūlūn ke qabīloṅ ke 12 shahr mil gae.

⁸yūṅ isrāīliyoṅ ne qur'ā ḍāl kar lāwiyoṅ ko mazkūrā shahr aur un ke gird-o-nawāh kī charāgāheṅ de dīṅ. waisā hī huā jaisā rab ne mūsā kī mārifat hukm diyā thā.

⁹qur'ā ḍālte waqt lāwī ke gharāne qihāt meṅ se hārūn ke kunbe ko pahlā hissā mil gayā. use yahūdāh aur shamāūn ke qabīloṅ ke yih shahr die gae:

¹¹pahlā shahr anāqiyoṅ ke bāp kā shahr qiryat-arbā thā jo yahūdāh ke pahāṛī ilāqe meṅ hai aur jis kā maujūdā nām habrūn hai. us kī charāgāheṅ bhī dī gaīṅ,

¹²lekin habrūn ke irdgird kī ābādiyāṅ aur khet kālib bin yafunnā kī milkiyat rahe.

¹³hārūn ke kunbe kā yih shahr panāh kā shahr bhī thā jis meṅ har wuh shaḳhs panāh le saktā thā jis se koī ġhairirādī taur par halāk huā thā. is ke ilāwā hārūn ke kunbe ko libnā,

¹⁴yattīr, istimūa,

¹⁵haulūn, dabīr,

¹⁶ain, yūttā aur bait-shams ke shahr bhī mil gae. use yahūdāh aur shamāūn ke qabīloṅ ke kul 9 shahr un kī charāgāhoṅ samet mil gae.

¹⁷in ke ilāwā binyamīn ke qabīle ke chār shahr us kī milkiyat meṅ āe yānī jibaūn, jibā, anatot aur almon.

¹⁹ġharz hārūn ke kunbe ko 13 shahr un kī charāgāhoṅ samet mil gae.

²⁰lāwī ke qabīle ke gharāne qihāt ke bāqī kunboṅ ko qur'ā ḍālte waqt ifrāīm ke qabīle ke shahr mil gae.

²¹in meṅ ifrāīm ke pahāṛī ilāqe kā shahr sikam shāmil thā jis meṅ har wuh shaḳhs panāh le saktā thā jis se koī ġhairirādī taur par halāk huā thā, phir jazr,

²²qibzaim aur bait-haurūn. in chār shahroṅ kī charāgāheṅ bhī mil gaīṅ.

²³dān ke qabīle ne bhī unheṅ chār shahr un kī charāgāhoṅ samet die yānī iltaqih, jibbatūn, ayyālon aur jāt-rimmon.

²⁵manassī ke maġhribī hisse se unheṅ do shahr tānak aur jāt-rimmon un kī charāgāhoṅ samet mil gae.

²⁶ġharz qihāt ke bāqī kunboṅ ko kul 10 shahr un kī charāgāhoṅ samet mile.

²⁷lāwī ke qabīle ke gharāne jairson ko manassī ke mashriqī hisse ke do shahr un kī charāgāhoṅ samet die gae: mulk-e-basan meṅ jaulān jis meṅ har wuh shaḳhs panāh le saktā thā jis se koī ġhairirādī taur par halāk huā thā, aur ba'istarāh.

²⁸ishkār ke qabīle ne use chār shahr un kī charāgāhoṅ samet die: qisiyon, dābarat, yarmūt aur ain-jannīm.

³⁰isī tarah use āshar ke qabīle ke bhī chār shahr un kī charāgāhoṅ samet die gae: misāl, abdon, ḳhilqat aur rahob.

³²naftālī ke qabīle ne tīn shahr un kī charāgāhoṅ samet die: galīl kā qādis jis meṅ har wuh shaḳhs panāh le saktā thā jis se koī ġhairirādī taur par halāk huā thā, phir hammāt-dor aur qartān.

³³ġharz jairson ke gharāne ko 13 shahr un kī charāgāhoṅ samet mil gae.

³⁴ab rah gayā lāwī ke qabīle kā gharānā mirārī. use zabūlūn ke qabīle ke chār shahr un kī charāgāhoṅ samet mil gae: yuqniām, qartā, dimnā aur nahlāl.

³⁶isī tarah use rūbin ke qabīle ke bhī chār shahr un kī charāgāhoṅ samet mil gae: basar, yahaz, qadīmāt aur mifāt.

³⁸jad ke qabīle ne use chār shahr un kī charāgāhoṅ samet die: mulk-e-jiliād kā rāmāt jis meṅ har wuh shaḳhs panāh le saktā thā jis se koī ġhairirādī taur par halāk huā thā, phir mahanāim, hasbon aur yāzer.

⁴⁰ġharz mirārī ke gharāne ko kul 12 shahr un kī charāgāhoṅ samet mil gae.

⁴¹isrāīl ke muḳhtalif ilāqoṅ meṅ jo lāwiyoṅ ke shahr un kī charāgāhoṅ samet the un kī kul tādād 48 thī.

⁴²har shahr ke irdgird charāgāheṅ thīṅ.

⁴³yūṅ rab ne isrāīliyoṅ ko wuh pūrā mulk de diyā jis kā wādā us ne un ke bāpdādā se qasam khā kar kiyā thā. wuh us par qabzā karke us meṅ rahne lage.

⁴⁴aur rab ne chāroṅ taraf amn-o-amān muhayyā kiyā jis tarah us ne un ke bāpdādā se qasam khā kar wādā kiyā thā. usī kī madad se isrāīlī tamām dushmanoṅ par ġhālib āe the.

⁴⁵jo achchhe wāde rab ne isrāīl se kie the un meṅ se ek bhī nāmukammal na rahā balki sab ke sab pūre ho gae.