Read Roman Urdu Geo yashūa 22 Bible Online

yashūa 22 - Roman Urdu Geo bible

yashūa 22

¹phir yashūa ne rūbin, jad aur manassī ke ādhe qabīle ke mardoṅ ko apne pās bulā kar

²kahā, “jo bhī hukm rab ke ḳhādim mūsā ne āp ko diyā thā use āp ne pūrā kiyā. aur āp ne merī har bāt mānī hai.

³āp ne kāfī arse se āj tak apne bhāiyoṅ ko tark nahīṅ kiyā balki bilkul wuhī kuchh kiyā hai jo rab kī marzī thī.

⁴ab rab āp ke ḳhudā ne āp ke bhāiyoṅ ko mau'ūdā mulk de diyā hai, aur wuh salāmatī ke sāth us meṅ rah rahe haiṅ. is lie ab waqt ā gayā hai ki āp apne ghar wāpas chale jāeṅ, us mulk meṅ jo rab ke ḳhādim mūsā ne āp ko daryā-e-yardan ke pār de diyā hai.

⁵lekin ḳhabardār, ehtiyāt se un hidāyāt par chalte raheṅ jo rab ke ḳhādim mūsā ne āp ko de dīṅ. rab apne ḳhudā se pyār kareṅ, us kī tamām rāhoṅ par chaleṅ, us ke ahkām māneṅ, us ke sāth lipṭe raheṅ, aur pūre dil-o-jān se us kī ḳhidmat kareṅ.”

⁶yih kah kar yashūa ne unheṅ barkat de kar ruḳhsat kar diyā, aur wuh apne ghar chale gae.

⁷manassī ke ādhe qabīle ko mūsā se mulk-e-basan meṅ zamīn mil gaī thī. dūsre hisse ko yashūa se zamīn mil gaī thī, yānī daryā-e-yardan ke maġhrib meṅ jahāṅ bāqī qabīle ābād hue the. manassī ke mardoṅ ko ruḳhsat karte waqt yashūa ne unheṅ barkat de kar

⁸kahā, “āp baṛī daulat ke sāth apne ghar lauṭ rahe haiṅ. āp ko baṛe rewaṛ, sonā, chāṅdī, lohā aur bahut se kapṛe mil gae haiṅ. jab āp apne ghar pahuṅcheṅge to māl-e-ġhanīmat un ke sāth bāṅṭeṅ jo ghar meṅ rah gae haiṅ.”

⁹phir rūbin, jad aur manassī ke ādhe qabīle ke mard bāqī isrāīliyoṅ ko sailā meṅ chhoṛ kar mulk-e-jiliād kī taraf rawānā hue jo daryā-e-yardan ke mashriq meṅ hai. wahāṅ un ke apne ilāqe the jin meṅ un ke qabīle rab ke us hukm ke mutābiq ābād hue the jo us ne mūsā kī mārifat diyā thā.

¹⁰yih mard chalte chalte daryā-e-yardan ke maġhrib meṅ ek jagah pahuṅche jis kā nām galīlot thā. wahāṅ yānī mulk-e-kan'ān meṅ hī unhoṅ ne ek baṛī aur shāndār qurbāngāh banāī.

¹¹isrāīliyoṅ ko ḳhabar dī gaī, “rūbin, jad aur manassī ke ādhe qabīle ne kan'ān kī sarhad par galīlot meṅ qurbāngāh banā lī hai. yih qurbāngāh daryā-e-yardan ke maġhrib meṅ yānī hamāre hī ilāqe meṅ hai!”

¹²tab isrāīl kī pūrī jamā'at mashriqī qabīloṅ se laṛne ke lie sailā meṅ jamā huī.

¹³lekin pahle unhoṅ ne ilīazar imām ke beṭe fīnhās ko mulk-e-jiliād ko bhejā jahāṅ rūbin, jad aur manassī kā ādhā qabīlā ābād the.

¹⁴us ke sāth 10 ādmī yānī har maġhribī qabīle kā ek numāindā thā. har ek apne ābāī gharāne aur kunbe kā sarbarāh thā.

¹⁵jiliād meṅ pahuṅch kar unhoṅ ne mashriqī qabīloṅ se bāt kī.

¹⁶“rab kī pūrī jamā'at āp se pūchhtī hai ki āp isrāīl ke ḳhudā se bewafā kyūṅ ho gae haiṅ? āp ne rab se apnā muṅh pher kar yih qurbāngāh kyūṅ banāī hai? is se āp ne rab se sarkashī kī hai.

¹⁷kyā yih kāfī nahīṅ thā ki ham se faġhūr ke but kī pūjā karne kā gunāh sarzad huā? ham to āj tak pūre taur par us gunāh se pāk-sāf nahīṅ hue go us waqt rab kī jamā'at ko wabā kī sūrat meṅ sazā mil gaī thī.

¹⁸to phir āp kyā kar rahe haiṅ? āp dubārā rab se apnā muṅh pher kar dūr ho rahe haiṅ. dekheṅ, agar āp āj rab se sarkashī kareṅ to kal wuh isrāīl kī pūrī jamā'at ke sāth nārāz hogā.

¹⁹agar āp samajhte haiṅ ki āp kā mulk nāpāk hai aur āp is lie us meṅ rab kī ḳhidmat nahīṅ kar sakte to hamāre pās rab ke mulk meṅ āeṅ jahāṅ rab kī sukūnatgāh hai, aur hamārī zamīnoṅ meṅ sharīk ho jāeṅ. lekin rab se yā ham se sarkashī mat karnā. rab hamāre ḳhudā kī qurbāngāh ke ilāwā apne lie koī aur qurbāngāh na banāeṅ!

²⁰kyā isrāīl kī pūrī jamā'at par allāh kā ġhazab nāzil na huā jab akan bin zārah ne māl-e-ġhanīmat meṅ se kuchh chorī kiyā jo rab ke lie maḳhsūs thā? us ke gunāh kī sazā sirf us tak hī mahdūd na rahī balki aur bhī halāk hue.”

²¹rūbin, jad aur manassī ke ādhe qabīle ke mardoṅ ne isrāīlī kunboṅ ke sarbarāhoṅ ko jawāb diyā,

²²“rab qādir-e-mutlaq ḳhudā, hāṅ rab qādir-e-mutlaq ḳhudā haqīqat jāntā hai, aur isrāīl bhī yih bāt jān le! na ham sarkash hue haiṅ, na rab se bewafā. agar ham jhūṭ boleṅ to āj hī hameṅ mār ḍāleṅ!

²³ham ne yih qurbāngāh is lie nahīṅ banāī ki rab se dūr ho jāeṅ. ham us par koī bhī qurbānī chaṛhānā nahīṅ chāhte, na bhasm hone wālī qurbāniyāṅ, na ġhallā kī nazareṅ aur na hī salāmatī kī qurbāniyāṅ. agar ham jhūṭ boleṅ to rab ḳhud hamārī adālat kare.

²⁴haqīqat meṅ ham ne yih qurbāngāh is lie tāmīr kī ki ham ḍarte haiṅ ki mustaqbil meṅ kisī din āp kī aulād hamārī aulād se kahe, ‘āp kā rab isrāīl ke ḳhudā ke sāth kyā wāstā hai?

²⁵āḳhir rab ne hamāre aur āp ke darmiyān daryā-e-yardan kī sarhad muqarrar kī hai. chunāṅche āp ko rab kī ibādat karne kā koī haq nahīṅ!’ aisā karne se āp kī aulād hamārī aulād ko rab kī ḳhidmat karne se rokegī.

²⁶yihī wajah hai ki ham ne yih qurbāngāh banāī, bhasm hone wālī qurbāniyāṅ yā zabah kī koī aur qurbānī chaṛhāne ke lie nahīṅ

²⁷balki āp ko aur āne wālī nasloṅ ko is bāt kī yād dilāne ke lie ki hameṅ bhī rab ke ḳhaime meṅ bhasm hone wālī qurbāniyāṅ, zabah kī qurbāniyāṅ aur salāmatī kī qurbāniyāṅ chaṛhāne kā haq hai. yih qurbāngāh hamāre aur āp ke darmiyān gawāh rahegī. ab āp kī aulād kabhī bhī hamārī aulād se nahīṅ kah sakegī, ‘āp ko rab kī jamā'at ke huqūq hāsil nahīṅ.’

²⁸aur agar wuh kisī waqt yih bāt kare to hamārī aulād kah sakegī, ‘yih qurbāngāh dekheṅ jo rab kī qurbāngāh kī hū-ba-hū naql hai. hamāre bāpdādā ne ise banāyā thā, lekin is lie nahīṅ ki ham is par bhasm hone wālī qurbāniyāṅ aur zabah kī qurbāniyāṅ chaṛhāeṅ balki āp ko aur hameṅ gawāhī dene ke lie ki hameṅ mil kar rab kī ibādat karne kā haq hai.’

²⁹hālāt kabhī bhī yahāṅ tak na pahuṅcheṅ ki ham rab se sarkashī karke apnā muṅh us se pher leṅ. nahīṅ, ham ne yih qurbāngāh bhasm hone wālī qurbāniyāṅ, ġhallā kī nazareṅ aur zabah kī qurbāniyāṅ chaṛhāne ke lie nahīṅ banāī. ham sirf rab apne ḳhudā kī sukūnatgāh ke sāmne kī qurbāngāh par hī apnī qurbāniyāṅ pesh karnā chāhte haiṅ.”

³⁰jab fīnhās aur isrāīlī jamā'at ke kunboṅ ke sarbarāhoṅ ne jiliād meṅ rūbin, jad aur manassī ke ādhe qabīle kī yih bāteṅ sunīṅ to wuh mutma'in hue.

³¹fīnhās ne un se kahā, “ab ham jānte haiṅ ki rab āindā bhī hamāre darmiyān rahegā, kyūṅki āp us se bewafā nahīṅ hue haiṅ. āp ne isrāīliyoṅ ko rab kī sazā se bachā liyā hai.”

³²is ke bād fīnhās aur bāqī isrāīlī sardār rūbin, jad aur manassī ke ādhe qabīle ko mulk-e-jiliād meṅ chhoṛ kar mulk-e-kan'ān meṅ lauṭ āe. wahāṅ unhoṅ ne sab kuchh batāyā jo huā thā.

³³bāqī isrāīliyoṅ ko yih bāt pasand āī, aur wuh allāh kī tamjīd karke rūbin aur jad se jang karne aur un kā ilāqā tabāh karne ke irāde se bāz āe.

³⁴rūbin aur jad ke qabīloṅ ne naī qurbāngāh kā nām gawāh rakhā, kyūṅki unhoṅ ne kahā, “yih qurbāngāh hamāre aur dūsre qabīloṅ ke darmiyān gawāh hai ki rab hamārā bhī ḳhudā hai.”