Read Roman Urdu Geo yashūa 23 Bible Online

yashūa 23 - Roman Urdu Geo bible

yashūa 23

¹ab isrāīlī kāfī der se salāmatī se apne mulk meṅ rahte the, kyūṅki rab ne unheṅ irdgird ke dushmanoṅ ke hamloṅ se mahfūz rakhā. jab yashūa bahut būṛhā ho gayā thā

²to us ne isrāīl ke tamām buzurgoṅ, sardāroṅ, qāziyoṅ aur nigahbānoṅ ko apne pās bulā kar kahā, “ab maiṅ būṛhā ho gayā hūṅ.

³āp ne apnī āṅkhoṅ se dekhā ki rab ne is ilāqe kī tamām qaumoṅ ke sāth kyā kuchh kiyā hai. rab āp ke ḳhudā hī ne āp ke lie jang kī.

⁴yād rakheṅ ki maiṅ ne mashriq meṅ daryā-e-yardan se le kar maġhrib meṅ samundar tak sārā mulk āp ke qabīloṅ meṅ taqsīm kar diyā hai. bahut sī qaumoṅ par maiṅ ne fath pāī, lekin chand ek ab tak bāqī rah gaī haiṅ.

⁵lekin rab āp kā ḳhudā āp ke āge āge chalte hue unheṅ bhī nikāl kar bhagā degā. āp un kī zamīnoṅ par qabzā kar leṅge jis tarah rab āp ke ḳhudā ne wādā kiyā hai.

⁶ab pūrī himmat se har bāt par amal kareṅ jo mūsā kī sharīat kī kitāb meṅ likhī huī hai. na dāīṅ aur na bāīṅ taraf haṭeṅ.

⁷un dīgar qaumoṅ se rishtā mat bāndhnā jo ab tak mulk meṅ bāqī rah gaī haiṅ. un ke butoṅ ke nām apnī zabān par na lānā, na un ke nām le kar qasam khānā. na un kī ḳhidmat karnā, na unheṅ sijdā karnā.

⁸rab apne ḳhudā ke sāth yūṅ lipṭe rahnā jis tarah āj tak lipṭe rahe haiṅ.

⁹rab ne āp ke āge āge chal kar baṛī baṛī aur tāqatwar qaumeṅ nikāl dī haiṅ. āj tak āp ke sāmne koī nahīṅ khaṛā rah sakā.

¹⁰āp meṅ se ek shaḳhs hazār dushmanoṅ ko bhagā detā hai, kyūṅki rab āp kā ḳhudā ḳhud āp ke lie laṛtā hai jis tarah us ne wādā kiyā thā.

¹¹chunāṅche sanjīdagī se dhyān deṅ ki āp rab apne ḳhudā se pyār kareṅ, kyūṅki āp kī zindagī isī par munhasir hai.

¹²agar āp us se dūr ho kar un dīgar qaumoṅ se lipaṭ jāeṅ jo ab tak mulk meṅ bāqī haiṅ aur un ke sāth rishtā bāndheṅ

¹³to rab āp kā ḳhudā yaqīnan in qaumoṅ ko āp ke āge se nahīṅ nikālegā. is ke bajāe yih āp ko phaṅsāne ke lie phandā aur jāl baneṅge. yih yaqīnan āp kī pīṭhoṅ ke lie koṛe aur āṅkhoṅ ke lie kāṅṭe ban jāeṅge. āḳhir meṅ āp us achchhe mulk meṅ se miṭ jāeṅge jo rab āp ke ḳhudā ne āp ko de diyā hai.

¹⁴āj maiṅ wahāṅ jā rahā hūṅ jahāṅ kisī na kisī din duniyā ke har shaḳhs ko jānā hotā hai. lekin āp ne pūre dil-o-jān se jān liyā hai ki jo bhī wādā rab āp ke ḳhudā ne āp ke sāth kiyā wuh pūrā huā hai. ek bhī adhūrā nahīṅ rah gayā.

¹⁵lekin jis tarah rab ne har wādā pūrā kiyā hai bilkul usī tarah wuh tamām āfateṅ āp par nāzil karegā jin ke bāre meṅ us ne āp ko ḳhabardār kiyā hai agar āp us ke tābe na raheṅ. phir wuh āp ko us achchhe mulk meṅ se miṭā degā jo us ne āp ko de diyā hai.

¹⁶agar āp us ahd ko toṛeṅ jo us ne āp ke sāth bāndhā hai aur dīgar mābūdoṅ kī pūjā karke unheṅ sijdā kareṅ to phir rab kā pūrā ġhazab āp par nāzil hogā aur āp jald hī us achchhe mulk meṅ se miṭ jāeṅge jo us ne āp ko de diyā hai.”