Read Roman Urdu Geo yashūa 3 Bible Online

yashūa 3 - Roman Urdu Geo bible

yashūa 3

¹subhsawere uṭh kar yashūa aur tamām isrāīlī shittīm se rawānā hue. jab wuh daryā-e-yardan par pahuṅche to use ubūr na kiyā balki rāt ke lie kināre par ruk gae.

²wuh tīn din wahāṅ rahe. phir nigahbānoṅ ne ḳhaimāgāh meṅ se guzar kar

³logoṅ ko hukm diyā, “jab āp dekheṅ ki lāwī ke qabīle ke imām rab āp ke ḳhudā ke ahd kā sandūq uṭhāe hue haiṅ to apne apne maqām se rawānā ho kar us ke pīchhe ho leṅ.

⁴phir āp ko patā chalegā ki kahāṅ jānā hai, kyūṅki āp pahle kabhī wahāṅ nahīṅ gae. lekin sandūq ke taqrīban ek kilomīṭar pīchhe raheṅ aur zyādā qarīb na jāeṅ.”

⁵yashūa ne logoṅ ko batāyā, “apne āp ko maḳhsūs-o-muqaddas kareṅ, kyūṅki kal rab āp ke darmiyān hairatangez kām karegā.”

⁶agle din yashūa ne imāmoṅ se kahā, “ahd kā sandūq uṭhā kar logoṅ ke āge āge daryā ko pār kareṅ.” chunāṅche imām sandūq ko uṭhā kar āge āge chal die.

⁷aur rab ne yashūa se farmāyā, “maiṅ tujhe tamām isrāīliyoṅ ke sāmne sarfarāz kar dūṅgā, aur āj hī maiṅ yih kām shurū karūṅga tāki wuh jān leṅ ki jis tarah maiṅ mūsā ke sāth thā usī tarah tere sāth bhī hūṅ.

⁸ahd kā sandūq uṭhāne wāle imāmoṅ ko batā denā, ‘jab āp daryā-e-yardan ke kināre pahuṅcheṅge to wahāṅ pānī meṅ ruk jāeṅ’.”

⁹yashūa ne isrāīliyoṅ se kahā, “mere pās āeṅ aur rab apne ḳhudā ke farmān sun leṅ.

¹⁰āj āp jān leṅge ki zindā ḳhudā āp ke darmiyān hai aur ki wuh yaqīnan āp ke āge āge jā kar dūsrī qaumoṅ ko nikāl degā, ḳhwāh wuh kan'ānī, hittī, hiwwī, farizzī, jirjāsī, amorī yā yabūsī hoṅ.

¹¹yih yūṅ zāhir hogā ki ahd kā yih sandūq jo tamām duniyā ke mālik kā hai āp ke āge āge daryā-e-yardan meṅ jāegā.

¹²ab aisā kareṅ ki har qabīle meṅ se ek ek ādmī ko chun leṅ tāki bārah afrād jamā ho jāeṅ.

¹³phir imām tamām duniyā ke mālik rab ke ahd kā sandūq uṭhā kar daryā meṅ jāeṅge. aur jūṅ hī wuh apne pāoṅ pānī meṅ rakheṅge to pānī kā bahāo ruk jāegā aur āne wālā pānī ḍher ban kar khaṛā rahegā.”

¹⁴chunāṅche isrāīlī apne ḳhaimoṅ ko sameṭ kar rawānā hue, aur ahd kā sandūq uṭhāne wāle imām un ke āge āge chal die.

¹⁵fasal kī kaṭāī kā mausam thā, aur daryā kā pānī kināroṅ se bāhar ā gayā thā. lekin jūṅ hī sandūq ko uṭhāne wāle imāmoṅ ne daryā ke kināre pahuṅch kar pānī meṅ qadam rakhā

¹⁶to āne wāle pānī kā bahāo ruk gayā. wuh un se dūr ek shahr ke qarīb ḍher ban gayā jis kā nām ādam thā aur jo zartān ke nazdīk hai. jo pānī dūsrī yānī bahīrā-e-murdār kī taraf bah rahā thā wuh pūrī tarah utar gayā. tab isrāīliyoṅ ne yarīhū shahr ke muqābil daryā ko pār kiyā.

¹⁷rab kā ahd kā sandūq uṭhāne wāle imām daryā-e-yardan ke bīch meṅ ḳhushk zamīn par khaṛe rahe jabki bāqī log ḳhushk zamīn par se guzar gae. imām us waqt tak wahāṅ khaṛe rahe jab tak tamām isrāīliyoṅ ne ḳhushk zamīn par chal kar daryā ko pār na kar liyā.