Read Roman Urdu Geo yashūa 4 Bible Online

yashūa 4 - Roman Urdu Geo bible

yashūa 4

¹jab pūrī qaum ne daryā-e-yardan ko ubūr kar liyā to rab yashūa se hamkalām huā,

²“har qabīle meṅ se ek ek ādmī ko chun le.

³phir in bārah ādmiyoṅ ko hukm de ki jahāṅ imām daryā-e-yardan ke darmiyān khaṛe haiṅ wahāṅ se bārah patthar uṭhā kar unheṅ us jagah rakh do jahāṅ tum āj rāt ṭhahroge.”

⁴chunāṅche yashūa ne un bārah ādmiyoṅ ko bulāyā jinheṅ us ne isrāīl ke har qabīle se chun liyā thā

⁵aur un se kahā, “rab apne ḳhudā ke sandūq ke āge āge chal kar daryā ke darmiyān tak jāeṅ. āp meṅ se har ādmī ek ek patthar uṭhā kar apne kandhe par rakhe aur bāhar le jāe. kul bārah patthar hoṅge, isrāīl ke har qabīle ke lie ek.

⁶yih patthar āp ke darmiyān ek yādgār nishān raheṅge. āindā jab āp ke bachche āp se pūchheṅge ki in pattharoṅ kā kyā matlab hai

⁷to unheṅ batānā, ‘yih hameṅ yād dilāte haiṅ ki daryā-e-yardan kā bahāo ruk gayā jab rab kā ahd kā sandūq us meṅ se guzarā.’ yih patthar abad tak isrāīl ko yād dilāte raheṅge ki yahāṅ kyā kuchh huā thā.”

⁸isrāīliyoṅ ne aisā hī kiyā. unhoṅ ne daryā-e-yardan ke bīch meṅ se apne qabīloṅ kī tādād ke mutābiq bārah patthar uṭhāe, bilkul usī tarah jis tarah rab ne yashūa ko farmāyā thā. phir unhoṅ ne yih patthar apne sāth le kar us jagah rakh die jahāṅ unheṅ rāt ke lie ṭhaharnā thā.

⁹sāth sāth yashūa ne us jagah bhī bārah patthar khaṛe kie jahāṅ ahd kā sandūq uṭhāne wāle imām daryā-e-yardan ke darmiyān khaṛe the. yih patthar āj tak wahāṅ paṛe haiṅ.

¹⁰sandūq ko uṭhāne wāle imām daryā ke darmiyān khaṛe rahe jab tak logoṅ ne tamām ahkām jo rab ne yashūa ko die the pūre na kar lie. yūṅ sab kuchh waisā hī huā jaisā mūsā ne yashūa ko farmāyā thā. log jaldī jaldī daryā meṅ se guzare.

¹¹jab sab dūsre kināre par the to imām bhī rab kā sandūq le kar kināre par pahuṅche aur dubārā qaum ke āge āge chalne lage.

¹²aur jis tarah mūsā ne farmāyā thā, rūbin, jad aur manassī ke ādhe qabīle ke mard musallah ho kar bāqī isrāīlī qabīloṅ se pahle daryā ke dūsre kināre par pahuṅch gae the.

¹³taqrīban 40,000 musallah mard us waqt rab ke sāmne yarīhū ke maidān meṅ pahuṅch gae tāki wahāṅ jang kareṅ.

¹⁴us din rab ne yashūa ko pūrī isrāīlī qaum ke sāmne sarfarāz kiyā. us ke jīte jī log us kā yūṅ ḳhauf mānte rahe jis tarah pahle mūsā kā.

¹⁵phir rab ne yashūa se kahā,

¹⁶“ahd kā sandūq uṭhāne wāle imāmoṅ ko daryā meṅ se nikalne kā hukm de.”

¹⁷yashūa ne aisā hī kiyā

¹⁸to jūṅ hī imām kināre par pahuṅch gae pānī dubārā bah kar daryā ke kināroṅ se bāhar āne lagā.

¹⁹isrāīliyoṅ ne pahle mahīne ke dasweṅ din [1] daryā-e-yardan ko ubūr kiyā. unhoṅ ne apne ḳhaime yarīhū ke mashriq meṅ wāqe jiljāl meṅ khaṛe kie.

²⁰wahāṅ yashūa ne daryā meṅ se chune hue bārah pattharoṅ ko khaṛā kiyā.

²¹us ne isrāīliyoṅ se kahā, “āindā jab āp ke bachche apne apne bāp se pūchheṅge ki in pattharoṅ kā kyā matlab hai

²²to unheṅ batānā, ‘yih wuh jagah hai jahāṅ isrāīlī qaum ne ḳhushk zamīn par daryā-e-yardan ko pār kiyā.’

²³kyūṅki rab āp ke ḳhudā ne us waqt tak āp ke āge āge daryā kā pānī ḳhushk kar diyā jab tak āp wahāṅ se guzar na gae. bilkul usī tarah jis tarah bahr-e-qulzum ke sāth kiyā thā jab ham us meṅ se guzare.

²⁴us ne yih kām is lie kiyā tāki zamīn kī tamām qaumeṅ allāh kī qudrat ko jān leṅ aur āp hameshā rab apne ḳhudā kā ḳhauf māneṅ.”