Read Roman Urdu Geo yashūa 5 Bible Online

yashūa 5 - Roman Urdu Geo bible

yashūa 5

¹yih ḳhabar daryā-e-yardan ke maġhrib meṅ ābād tamām amorī bādshāhoṅ aur sāhilī ilāqe meṅ ābād tamām kan'ānī bādshāhoṅ tak pahuṅch gaī ki rab ne isrāīliyoṅ ke sāmne daryā ko us waqt tak ḳhushk kar diyā jab tak sab ne pār na kar liyā thā. tab un kī himmat ṭūṭ gaī aur un meṅ isrāīliyoṅ kā sāmnā karne kī jur'at na rahī.

²us waqt rab ne yashūa se kahā, “patthar kī chhuriyāṅ banā kar pahle kī tarah isrāīliyoṅ kā ḳhatnā karwā de.”

³chunāṅche yashūa ne patthar kī chhuriyāṅ banā kar ek jagah par isrāīliyoṅ kā ḳhatnā karwāyā jis kā nām bād meṅ ‘ḳhatnā pahāṛ’ rakhā gayā.

⁴bāt yih thī ki jo mard misr se nikalte waqt jang karne ke qābil the wuh registān meṅ chalte chalte mar chuke the.

⁵misr se rawānā hone wāle in tamām mardoṅ kā ḳhatnā huā thā, lekin jitne laṛkoṅ kī paidāish registān meṅ huī thī un kā ḳhatnā nahīṅ huā thā.

⁶chūṅki isrāīlī rab ke tābe nahīṅ rahe the is lie us ne qasam khāī thī ki wuh us mulk ko nahīṅ dekheṅge jis meṅ dūdh aur shahd kī kasrat hai aur jis kā wādā us ne qasam khā kar un ke bāpdādā se kiyā thā. natīje meṅ isrāīlī fauran mulk meṅ dāḳhil na ho sake balki unheṅ us waqt tak registān meṅ phirnā paṛā jab tak wuh tamām mard mar na gae jo misr se nikalte waqt jang karne ke qābil the.

⁷un kī jagah rab ne un ke beṭoṅ ko khaṛā kiyā thā. yashūa ne un hī kā ḳhatnā karwāyā. un kā ḳhatnā is lie huā ki registān meṅ safar ke daurān un kā ḳhatnā nahīṅ kiyā gayā thā.

⁸pūrī qaum ke mardoṅ kā ḳhatnā hone ke bād wuh us waqt tak ḳhaimāgāh meṅ rahe jab tak un ke zaḳhm ṭhīk nahīṅ ho gae the.

⁹aur rab ne yashūa se kahā, “āj maiṅ ne misr kī ruswāī tum se dūr kar dī hai.” [2] is lie us jagah kā nām āj tak jiljāl yānī luṛhkānā rahā hai.

¹⁰jab isrāīlī yarīhū ke maidānī ilāqe meṅ wāqe jiljāl meṅ ḳhaimāzan the to unhoṅ ne fasah kī īd bhī manāī. mahīne kā chaudhwāṅ din thā,

¹¹aur agle hī din wuh pahlī dafā us mulk kī paidāwār meṅ se beḳhamīrī roṭī aur anāj ke bhune hue dāne khāne lage.

¹²us ke bād ke din man kā silsilā ḳhatm huā aur isrāīliyoṅ ke lie yih sahūlat na rahī. us sāl se wuh kan'ān kī paidāwār se khāne lage.

¹³ek din yashūa yarīhū shahr ke qarīb thā. achānak ek ādmī us ke sāmne khaṛā nazar āyā jis ke hāth meṅ nangī talwār thī. yashūa ne us ke pās jā kar pūchhā, “kyā āp hamāre sāth yā hamāre dushmanoṅ ke sāth haiṅ?”

¹⁴ādmī ne kahā, “nahīṅ, maiṅ rab ke lashkar kā sardār hūṅ aur abhī abhī tere pās pahuṅchā hūṅ.” yih sun kar yashūa ne gir kar use sijdā kiyā aur pūchhā, “mere āqā apne ḳhādim ko kyā farmānā chāhte haiṅ?”

¹⁵rab ke lashkar ke sardār ne jawāb meṅ kahā, “apne jūte utār de, kyūṅki jis jagah par tū khaṛā hai wuh muqaddas hai.” yashūa ne aisā hī kiyā.