Read Roman Urdu Geo yashūa 6 Bible Online

yashūa 6 - Roman Urdu Geo bible

yashūa 6

¹un dinoṅ meṅ isrāīliyoṅ kī wajah se yarīhū ke darwāze band hī rahe. na koī bāhar niklā, na koī andar gayā.

²rab ne yashūa se kahā, “maiṅ ne yarīhū ko us ke bādshāh aur faujī afsaroṅ samet tere hāth meṅ kar diyā hai.

³jo isrāīlī jang ke lie tere sāth nikleṅge un ke sāth shahr kī fasīl ke sāth sāth chal kar ek chakkar lagāo aur phir ḳhaimāgāh meṅ wāpas ā jāo. chhih din tak aisā hī karo.

⁴sāt imām ek ek narsingā uṭhāe ahd ke sandūq ke āge āge chaleṅ. phir sātweṅ din shahr ke gird sāt chakkar lagāo. sāth sāth imām narsinge bajāte raheṅ.

⁵jab wuh narsingoṅ ko bajāte bajāte lambī sī phūṅk māreṅge to phir tamām isrāīlī baṛe zor se jang kā nārā lagāeṅ. is par shahr kī fasīl gir jāegī aur tere log har jagah sīdhe shahr meṅ dāḳhil ho sakeṅge.”

⁶yashūa bin nūn ne imāmoṅ ko bulā kar un se kahā, “rab ke ahd kā sandūq uṭhā kar mere sāth chaleṅ. aur sāt imām ek ek narsingā uṭhāe sandūq ke āge āge chaleṅ.”

⁷phir us ne bāqī logoṅ se kahā, “āeṅ, shahr kī fasīl ke sāth sāth chal kar ek chakkar lagāeṅ. musallah ādmī rab ke sandūq ke āge āge chaleṅ.”

⁸sab kuchh yashūa kī hidāyāt ke mutābiq huā. sāt imām narsinge bajāte hue rab ke āge āge chale jabki rab ke ahd kā sandūq un ke pīchhe pīchhe thā.

⁹musallah ādmiyoṅ meṅ se kuchh bajāne wāle imāmoṅ ke āge āge aur kuchh sandūq ke pīchhe pīchhe chalne lage. itne meṅ imām narsinge bajāte rahe.

¹⁰lekin yashūa ne bāqī logoṅ ko hukm diyā thā ki us din jang kā nārā na lagāeṅ. us ne kahā, “jab tak maiṅ hukm na dūṅ us waqt tak ek lafz bhī na bolnā. jab maiṅ ishārā dūṅgā to phir hī ḳhūb nārā lagānā.”

¹¹isī tarah rab ke sandūq ne shahr kī fasīl ke sāth sāth chal kar chakkar lagāyā. phir logoṅ ne ḳhaimāgāh meṅ lauṭ kar wahāṅ rāt guzārī.

¹²agle din yashūa subhsawere uṭhā, aur imāmoṅ aur faujiyoṅ ne dūsrī martabā shahr kā chakkar lagāyā. un kī wuhī tartīb thī. pahle kuchh musallah ādmī, phir sāt narsinge bajāne wāle imām, phir rab ke ahd kā sandūq uṭhāne wāle imām aur āḳhir meṅ mazīd kuchh musallah ādmī the. chakkar lagāne ke daurān imām narsinge bajāte rahe.

¹⁴is dūsre din bhī wuh shahr kā chakkar lagā kar ḳhaimāgāh meṅ lauṭ āe. unhoṅ ne chhih din tak aisā hī kiyā.

¹⁵sātweṅ din unhoṅ ne subhsawere uṭh kar shahr kā chakkar yūṅ lagāyā jaise pahle chhih dinoṅ meṅ, lekin is dafā unhoṅ ne kul sāt chakkar lagāe.

¹⁶sātweṅ chakkar par imāmoṅ ne narsingoṅ ko bajāte hue lambī sī phūṅk mārī. tab yashūa ne logoṅ se kahā, “jang kā nārā lagāeṅ, kyūṅki rab ne āp ko yih shahr de diyā hai.

¹⁷shahr ko aur jo kuchh us meṅ hai tabāh karke rab ke lie maḳhsūs karnā hai. sirf rāhab kasbī ko un logoṅ samet bachānā hai jo us ke ghar meṅ haiṅ. kyūṅki us ne hamāre un jāsūsoṅ ko chhupā diyā jin ko ham ne yahāṅ bhejā thā.

¹⁸lekin allāh ke lie maḳhsūs chīzoṅ ko hāth na lagānā, kyūṅki agar āp un meṅ se kuchh le leṅ to apne āp ko tabāh kareṅge balki isrāīlī ḳhaimāgāh par bhī tabāhī aur āfat lāeṅge.

¹⁹jo kuchh bhī chāṅdī, sone, pītal yā lohe se banā hai wuh rab ke lie maḳhsūs hai. use rab ke ḳhazāne meṅ ḍālnā hai.”

²⁰jab imāmoṅ ne lambī phūṅk mārī to isrāīliyoṅ ne jang ke zordār nāre lagāe. achānak yarīhū kī fasīl gir gaī, aur har shaḳhs apnī apnī jagah par sīdhā shahr meṅ dāḳhil huā. yūṅ shahr isrāīl ke qabze meṅ ā gayā.

²¹jo kuchh bhī shahr meṅ thā use unhoṅ ne talwār se mār kar rab ke lie maḳhsūs kiyā, ḳhwāh mard yā aurat, jawān yā buzurg, gāy-bail, bheṛ-bakrī yā gadhā thā.

²²jin do ādmiyoṅ ne mulk kī jāsūsī kī thī un se yashūa ne kahā, “ab apnī qasam kā wādā pūrā kareṅ. kasbī ke ghar meṅ jā kar use aur us ke tamām ghar wāloṅ ko nikāl lāeṅ.”

²³chunāṅche yih jawān ādmī gae aur rāhab, us ke māṅ-bāp, bhāiyoṅ aur bāqī rishtedāroṅ ko us kī milkiyat samet nikāl kar ḳhaimāgāh se bāhar kahīṅ basā diyā.

²⁴phir unhoṅ ne pūre shahr ko aur jo kuchh us meṅ thā bhasm kar diyā. lekin chāṅdī, sone, pītal aur lohe kā tamām māl unhoṅ ne rab ke ghar ke ḳhazāne meṅ ḍāl diyā.

²⁵yashūa ne sirf rāhab kasbī aur us ke ghar wāloṅ ko bachāe rakhā, kyūṅki us ne un ādmiyoṅ ko chhupā diyā thā jinheṅ yashūa ne yarīhū bhejā thā. rāhab āj tak isrāīliyoṅ ke darmiyān rahtī hai.

²⁶us waqt yashūa ne qasam khāī, “rab kī lānat us par ho jo yarīhū kā shahr nae sire se tāmīr karne kī koshish kare. shahr kī bunyād rakhte waqt wuh apne pahlauṭhe se mahrūm ho jāegā, aur us ke darwāzoṅ ko khaṛā karte waqt wuh apne sab se chhoṭe beṭe se hāth dho baiṭhegā.”

²⁷yūṅ rab yashūa ke sāth thā, aur us kī shohrat pūre mulk meṅ phail gaī.