Read Roman Urdu Geo yashūa 9 Bible Online

yashūa 9 - Roman Urdu Geo bible

yashūa 9

¹in bātoṅ kī ḳhabar daryā-e-yardan ke maġhrib ke tamām bādshāhoṅ tak pahuṅchī, ḳhwāh wuh pahāṛī ilāqe, maġhrib ke nashebī pahāṛī ilāqe yā sāhilī ilāqe meṅ lubnān tak rahte the. un kī yih qaumeṅ thīṅ: hittī, amorī, kan'ānī, farizzī, hiwwī aur yabūsī.

²ab yih yashūa aur isrāīliyoṅ se laṛne ke lie jamā hue.

³lekin jab jibaūn shahr ke bāshindoṅ ko patā chalā ki yashūa ne yarīhū aur aī ke sāth kyā kiyā hai

⁴to unhoṅ ne ek chāl chalī. apne sāth safar ke lie khānā le kar wuh yashūa ke pās chal paṛe. un ke gadhoṅ par ḳhastāhāl boriyāṅ aur mai kī aisī purānī aur ghisī phaṭī mashkeṅ ladī huī thīṅ jin kī bār bār marammat huī thī.

⁵mardoṅ ne aise purāne jūte pahan rakhe the jin par jagah jagah paiwand lage hue the. un ke kapṛe bhī ghise phaṭe the, aur safar ke lie jo roṭī un ke pās thī wuh ḳhushk aur ṭukṛe ṭukṛe ho gaī thī.

⁶aisī hālat meṅ wuh yashūa ke pās jiljāl kī ḳhaimāgāh meṅ pahuṅch gae. unhoṅ ne us se aur bāqī isrāīlī mardoṅ se kahā, “ham ek dūrdarāz mulk se āe haiṅ. āeṅ, hamāre sāth muāhadā kareṅ.”

⁷lekin isrāīliyoṅ ne hiwwiyoṅ se kahā, “shāyad āp hamāre ilāqe ke bīch meṅ kahīṅ baste haiṅ. agar aisā hai to ham kis tarah āp se muāhadā kar sakte haiṅ?”

⁸wuh yashūa se bole, “ham āp kī ḳhidmat ke lie hāzir haiṅ.” yashūa ne pūchhā, “āp kaun haiṅ aur kahāṅ se āe haiṅ?”

⁹unhoṅ ne jawāb diyā, “āp ke ḳhādim āp ke ḳhudā ke nām ke bāis ek nihāyat dūrdarāz mulk se āe haiṅ. kyūṅki us kī ḳhabar ham tak pahuṅch gaī hai, aur ham ne wuh sab kuchh sun liyā hai jo us ne misr meṅ

¹⁰aur daryā-e-yardan ke mashriq meṅ rahne wāle do bādshāhoṅ ke sāth kiyā yānī hasbon ke bādshāh sīhon aur basan ke bādshāh oj ke sāth jo astārāt meṅ rahtā thā.

¹¹tab hamāre buzurgoṅ balki hamāre mulk ke tamām bāshindoṅ ne ham se kahā, ‘safar ke lie khānā le kar un se milne jāeṅ. un se bāt kareṅ ki ham āp kī ḳhidmat ke lie hāzir haiṅ. āeṅ, hamāre sāth muāhadā kareṅ.’

¹²hamārī yih roṭī abhī garm thī jab ham ise safar ke lie apne sāth le kar āp se milne ke lie apne gharoṅ se rawānā hue. aur ab āp ḳhud dekh sakte haiṅ ki yih ḳhushk aur ṭukṛe ṭukṛe ho gaī hai.

¹³aur mai kī in mashkoṅ kī ghisī phaṭī hālat dekheṅ. bharte waqt yih naī aur lachakdār thīṅ. yihī hamāre kapṛoṅ aur jūtoṅ kī hālat bhī hai. safar karte karte yih ḳhatm ho gae haiṅ.”

¹⁴isrāīliyoṅ ne musāfiroṅ kā kuchh khānā liyā. afsos, unhoṅ ne rab se hidāyat na māṅgī.

¹⁵phir yashūa ne un ke sāth sulah kā muāhadā kiyā aur jamā'at ke rāhnumāoṅ ne qasam khā kar us kī tasdīq kī. muāhade meṅ isrāīl ne wādā kiyā ki jibaūniyoṅ ko jīne degā.

¹⁶tīn din guzare to isrāīliyoṅ ko patā chalā ki jibaūnī hamāre qarīb hī aur hamāre ilāqe ke ain bīch meṅ rahte haiṅ.

¹⁷isrāīlī rawānā hue aur tīsre din un ke shahroṅ ke pās pahuṅche jin ke nām jibaūn, kafīrā, bairot aur qiryat-yārīm the.

¹⁸lekin chūṅki jamā'at ke rāhnumāoṅ ne rab isrāīl ke ḳhudā kī qasam khā kar un se wādā kiyā thā is lie unhoṅ ne jibaūniyoṅ ko halāk na kiyā. pūrī jamā'at rāhnumāoṅ par buṛbuṛāne lagī,

¹⁹lekin unhoṅ ne jawāb meṅ kahā, “ham ne rab isrāīl ke ḳhudā kī qasam khā kar un se wādā kiyā, aur ab ham unheṅ chheṛ nahīṅ sakte.

²⁰chunāṅche ham unheṅ jīne deṅge aur wuh qasam na toṛeṅge jo ham ne un ke sāth khāī. aisā na ho ki allāh kā ġhazab ham par nāzil ho jāe.

²¹unheṅ jīne do.” phir faislā yih huā ki jibaūnī lakaṛhāre aur pānī bharne wāle ban kar pūrī jamā'at kī ḳhidmat kareṅ. yūṅ isrāīlī rāhnumāoṅ kā un ke sāth wādā qāim rahā.

²²yashūa ne jibaūniyoṅ ko bulā kar kahā, “tum ne hameṅ dhokā de kar kyūṅ kahā ki ham āp se nihāyat dūr rahte haiṅ hālāṅki tum hamāre ilāqe ke bīch meṅ hī rahte ho?

²³chunāṅche ab tum par lānat ho. tum lakaṛhāre aur pānī bharne wāle ban kar hameshā ke lie mere ḳhudā ke ghar kī ḳhidmat karoge.”

²⁴unhoṅ ne jawāb diyā, “āp ke ḳhādimoṅ ko sāf batāyā gayā thā ki rab āp ke ḳhudā ne apne ḳhādim mūsā ko kyā hukm diyā thā, ki use āp ko pūrā mulk denā aur āp ke āge āge tamām bāshindoṅ ko halāk karnā hai. yih sun kar ham bahut ḍar gae ki hamārī jān nahīṅ bachegī. isī lie ham ne yih sab kuchh kiyā.

²⁵ab ham āp ke hāth meṅ haiṅ. hamāre sāth wuh kuchh kareṅ jo āp ko achchhā aur ṭhīk lagtā hai.”

²⁶chunāṅche yashūa ne unheṅ isrāīliyoṅ se bachāyā, aur unhoṅ ne jibaūniyoṅ ko halāk na kiyā.

²⁷usī din us ne jibaūniyoṅ ko lakaṛhāre aur pānī bharne wāle banā diyā tāki wuh jamā'at aur rab kī us qurbāngāh kī ḳhidmat kareṅ jis kā maqām rab ko abhī chunanā thā. aur yih log āj tak yihī kuchh karte haiṅ.