Read Roman Urdu Geo 2-thissalunīkiyoṅ 2 Bible Online

2-thissalunīkiyoṅ 2 - Roman Urdu Geo bible

2-thissalunīkiyoṅ 2

¹bhāiyo, yih sawāl uṭhā hai ki hamāre ḳhudāwand īsā masīh kī āmad kaisī hogī? ham kis tarah us ke sāth jamā ho jāeṅge? is nāte se hamārī āp se darḳhwāst hai

²ki jab log kahte haiṅ ki ḳhudāwand kā din ā chukā hai to āp jaldī se bechain yā pareshān na ho jāeṅ. un kī bāt na māneṅ, chāhe wuh yih dāwā bhī kareṅ ki un ke pās hamārī taraf se koī nabuwwat, paiġhām yā ḳhat hai.

³koī bhī āp ko kisī bhī chāl se fareb na de, kyūṅki yih din us waqt tak nahīṅ āegā jab tak āḳhirī baġhāwat pesh na āe aur “bedīnī kā ādmī” zāhir na ho jāe, wuh jis kā anjām halākat hogā.

⁴wuh har ek kī muḳhālafat karegā jo ḳhudā aur mābūd kahlātā hai aur apne āp ko un sab se baṛā ṭhahrāegā. hāṅ, wuh allāh ke ghar meṅ baiṭh kar elān karegā, “maiṅ allāh hūṅ.”

⁵kyā āp ko yād nahīṅ ki maiṅ āp ko yih batātā rahā jab abhī āp ke pās thā?

⁶aur ab āp jānte haiṅ ki kyā kuchh use rok rahā hai tāki wuh apne muqarrarā waqt par zāhir ho jāe.

⁷kyūṅki yih purasrār bedīnī ab bhī asar kar rahī hai. lekin yih us waqt tak zāhir nahīṅ hogī jab tak wuh shaḳhs haṭ na jāe jo ab tak use rok rahā hai.

⁸phir hī “bedīnī kā ādmī” zāhir hogā. lekin jab ḳhudāwand īsā āegā to wuh use apne muṅh kī phūṅk se mār ḍālegā, zāhir hone par hī wuh use halāk kar degā.

⁹“bedīnī ke ādmī” meṅ iblīs kām karegā. jab wuh āegā to har qism kī tāqat kā izhār karegā. wuh jhūṭe nishān aur mojize pesh karegā.

¹⁰yūṅ wuh unheṅ har tarah ke sharīr fareb meṅ phaṅsāegā jo halāk hone wāle haiṅ. log is lie halāk ho jāeṅge ki unhoṅ ne sachchāī se muhabbat karne se inkār kiyā, warnā wuh bach jāte.

¹¹is wajah se allāh unheṅ burī tarah se fareb meṅ phaṅsne detā hai tāki wuh is jhūṭ par īmān lāeṅ.

¹²natīje meṅ sab jo sachchāī par īmān na lāe balki nārāstī se lutfandoz hue mujrim ṭhahreṅge.

¹³mere bhāiyo, wājib hai ki ham har waqt āp ke lie ḳhudā kā shukr kareṅ jinheṅ ḳhudāwand pyār kartā hai. kyūṅki allāh ne āp ko shurū hī se najāt pāne ke lie chun liyā, aisī najāt ke lie jo rūh-ul-quds se pākīzagī pā kar sachchāī par īmān lāne se hāsil hotī hai.

¹⁴allāh ne āp ko us waqt yih najāt pāne ke lie bulā liyā jab ham ne āp ko us kī ḳhushḳhabrī sunāī. aur ab āp hamāre ḳhudāwand īsā masīh ke jalāl meṅ sharīk ho sakte haiṅ.

¹⁵bhāiyo, is lie sābitqadam raheṅ aur un riwāyāt ko thāme rakheṅ jo ham ne āp ko sikhāī haiṅ, ḳhwāh zabānī yā ḳhat ke zarī'e.

¹⁶hamārā ḳhudāwand īsā masīh ḳhud aur ḳhudā hamārā bāp jis ne ham se muhabbat rakhī aur apne fazl se hameṅ abadī tasallī aur ṭhos ummīd baḳhshī

¹⁷āp kī hauslā-afzāī kare aur yūṅ mazbūt kare ki āp hameshā wuh kuchh boleṅ aur kareṅ jo achchhā hai.