Read Roman Urdu Geo 1-tīmuthiyus 2 Bible Online

1-tīmuthiyus 2 - Roman Urdu Geo bible

1-tīmuthiyus 2

¹pahle maiṅ is par zor denā chāhtā hūṅ ki āp sab ke lie darḳhwāsteṅ, duāeṅ, siphārisheṅ aur shukrguzāriyāṅ pesh kareṅ,

²bādshāhoṅ aur iḳhtiyār wāloṅ ke lie bhī tāki ham ārām aur sukūn se ḳhudātars aur sharīf zindagī guzār sakeṅ.

³yih achchhā aur hamāre najātdahindā allāh ko pasandīdā hai.

⁴hāṅ, wuh chāhtā hai ki tamām insān najāt pā kar sachchāī ko jān leṅ.

⁵kyūṅki ek hī ḳhudā hai aur allāh aur insān ke bīch meṅ ek hī darmiyānī hai yānī masīh īsā, wuh insān

⁶jis ne apne āp ko fidyā ke taur par sab ke lie de diyā tāki wuh maḳhlasī pāeṅ. yūṅ us ne muqarrarā waqt par gawāhī dī

⁷aur yih gawāhī sunāne ke lie mujhe munād, rasūl aur ġhairyahūdiyoṅ kā ustād muqarrar kiyā tāki unheṅ īmān aur sachchāī kā paiġhām sunāūṅ. maiṅ jhūṭ nahīṅ bol rahā balki sach kah rahā hūṅ.

⁸ab maiṅ chāhtā hūṅ ki har maqāmī jamā'at ke mard muqaddas hāth uṭhā kar duā kareṅ. wuh ġhusse yā bahs-mubāhasā kī hālat meṅ aisā na kareṅ.

⁹isī tarah maiṅ chāhtā hūṅ ki ḳhawātīn munāsib kapṛe pahan kar sharāfat aur shāistagī se apne āp ko ārāstā kareṅ. wuh gundhe hue bāl, sonā, motī yā had se zyādā mahange kapṛoṅ se apne āp ko ārāstā na kareṅ

¹⁰balki nek kāmoṅ se. kyūṅki yihī aisī ḳhawātīn ke lie munāsib hai jo ḳhudātars hone kā dāwā kartī haiṅ.

¹¹ḳhātūn ḳhāmoshī se aur pūrī farmāṅbardārī ke sāth sīkhe.

¹²maiṅ ḳhawātīn ko tālīm dene yā ādmiyoṅ par hukūmat karne kī ijāzat nahīṅ detā. wuh ḳhāmosh raheṅ.

¹³kyūṅki pahle ādam ko tashkīl diyā gayā, phir hawwā ko.

¹⁴aur ādam ne iblīs se dhokā na khāyā balki hawwā ne, jis kā natījā gunāh thā.

¹⁵lekin ḳhawātīn bachche janm dene se najāt pāeṅgī. shart yih hai ki wuh samajh ke sāth īmān, muhabbat aur muqaddas hālat meṅ zindagī guzārtī raheṅ.