Read Roman Urdu Geo 1-tīmuthiyus 5 Bible Online

1-tīmuthiyus 5 - Roman Urdu Geo bible

1-tīmuthiyus 5

¹buzurg bhāiyoṅ ko saḳhtī se na ḍānṭnā balki unheṅ yūṅ samjhānā jis tarah ki wuh āp ke bāp hoṅ. isī tarah jawān ādmiyoṅ ko yūṅ samjhānā jaise wuh āp ke bhāī hoṅ,

²buzurg bahnoṅ ko yūṅ jaise wuh āp kī māeṅ hoṅ aur jawān ḳhawātīn ko tamām pākīzagī ke sāth yūṅ jaise wuh āp kī bahneṅ hoṅ.

³un bewāoṅ kī madad karke un kī izzat kareṅ jo wāqaī zarūratmand haiṅ.

⁴agar kisī bewā ke bachche yā pote-nawāse hoṅ to us kī madad karnā un hī kā farz hai. hāṅ, wuh sīkheṅ ki ḳhudātars hone kā pahlā farz yih hai ki ham apne ghar wāloṅ kī fikr kareṅ aur yūṅ apne māṅ-bāp, dādā-dādī aur nānā-nānī ko wuh kuchh wāpas kareṅ jo hameṅ un se milā hai, kyūṅki aisā amal allāh ko pasand hai.

⁵jo aurat wāqaī zarūratmand bewā aur tanhā rah gaī hai wuh apnī ummīd allāh par rakh kar din rāt apnī iltijāoṅ aur duāoṅ meṅ lagī rahtī hai.

⁶lekin jo bewā aish-o-ishrat meṅ zindagī guzārtī hai wuh zindā hālat meṅ hī murdā hai.

⁷yih hidāyāt logoṅ tak pahuṅchāeṅ tāki un par ilzām na lagāyā jā sake.

⁸kyūṅki agar koī apnoṅ aur ḳhāskar apne ghar wāloṅ kī fikr na kare to us ne apne īmān kā inkār kar diyā. aisā shaḳhs ġhairīmāndāroṅ se badtar hai.

⁹jis bewā kī umr 60 sāl se kam hai use bewāoṅ kī fahrist meṅ darj na kiyā jāe. shart yih bhī hai ki jab us kā shauhar zindā thā to wuh us kī wafādār rahī ho

¹⁰aur ki log us ke nek kāmoṅ kī achchhī gawāhī de sakeṅ, masalan kyā us ne apne bachchoṅ ko achchhī tarah pālā hai? kyā us ne mehmān-nawāzī kī aur muqaddasīn ke pāoṅ dho kar un kī ḳhidmat kī hai? kyā wuh musībat meṅ phaṅse huoṅ kī madad kartī rahī hai? kyā wuh har nek kām ke lie koshāṅ rahī hai?

¹¹lekin jawān bewāeṅ is fahrist meṅ shāmil mat karnā, kyūṅki jab un kī jismānī ḳhwāhishāt un par ġhālib ātī haiṅ to wuh masīh se dūr ho kar shādī karnā chāhtī haiṅ.

¹²yūṅ wuh apnā pahlā īmān chhoṛ kar mujrim ṭhahartī haiṅ.

¹³is ke ilāwā wuh sust hone aur idhar udhar gharoṅ meṅ phirne kī ādī ban jātī haiṅ. na sirf yih balki wuh bātūnī bhī ban jātī haiṅ aur dūsroṅ ke muāmalāt meṅ daḳhl de kar nāmunāsib bāteṅ kartī haiṅ.

¹⁴is lie maiṅ chāhtā hūṅ ki jawān bewāeṅ dubārā shādī karke bachchoṅ ko janm deṅ aur apne gharoṅ ko saṅbhāleṅ. phir wuh dushman ko badgoī karne kā mauqā nahīṅ deṅgī.

¹⁵kyūṅki bāz to sahīh rāh se haṭ kar iblīs ke pīchhe lag chukī haiṅ.

¹⁶lekin jis īmāndār aurat ke ḳhāndān meṅ bewāeṅ haiṅ us kā farz hai ki wuh un kī madad kare tāki wuh ḳhudā kī jamā'at ke lie bojh na baneṅ. warnā jamā'at un bewāoṅ kī sahīh madad nahīṅ kar sakegī jo wāqaī zarūratmand haiṅ.

¹⁷jo buzurg jamā'at ko achchhī tarah saṅbhālte haiṅ unheṅ dugnī izzat ke lāiq samjhā jāe.[2] maiṅ ḳhāskar un kī bāt kar rahā hūṅ jo pāk kalām sunāne aur tālīm dene meṅ mehnat-mashaqqat karte haiṅ.

¹⁸kyūṅki kalām-e-muqaddas farmātā hai, “jab tū fasal gāhne ke lie us par bail chalne detā hai to us kā muṅh bāndh kar na rakhnā.” yih bhī likhā hai, “mazdūr apnī mazdūrī kā haqdār hai.”

¹⁹jab kisī buzurg par ilzām lagāyā jāe to yih bāt sirf is sūrat meṅ māneṅ ki do yā is se zyādā gawāh is kī tasdīq kareṅ.

²⁰lekin jinhoṅ ne wāqaī gunāh kiyā ho unheṅ pūrī jamā'at ke sāmne samjhāeṅ tāki dūsre aisī harkateṅ karne se ḍar jāeṅ.

²¹allāh aur masīh īsā aur us ke chunīdā farishtoṅ ke sāmne maiṅ sanjīdagī se tākīd kartā hūṅ ki in hidāyāt kī yūṅ pairawī kareṅ ki āp kisī muāmale se sahīh taur par wāqif hone se peshtar faislā na kareṅ, na jānibdārī kā shikār ho jāeṅ.

²²jaldī se kisī par hāth rakh kar use kisī ḳhidmat ke lie maḳhsūs mat karnā, na dūsroṅ ke gunāhoṅ meṅ sharīk honā. apne āp ko pāk rakheṅ.

²³chūṅki āp aksar bīmār rahte haiṅ is lie apne mede kā lihāz karke na sirf pānī hī piyā kareṅ balki sāth sāth kuchh mai bhī istemāl kareṅ.

²⁴kuchh logoṅ ke gunāh sāf sāf nazar āte haiṅ, aur wuh un se pahle hī adālat ke taḳht ke sāmne ā pahuṅchte haiṅ. lekin kuchh aise bhī haiṅ jin ke gunāh goyā un ke pīchhe chal kar bād meṅ zāhir hote haiṅ.

²⁵isī tarah kuchh logoṅ ke achchhe kām sāf nazar āte haiṅ jabki bāz ke achchhe kām abhī nazar nahīṅ āte. lekin yih bhī poshīdā nahīṅ raheṅge balki kisī waqt zāhir ho jāeṅge.