Read Roman Urdu Geo 2-tīmuthiyus 4 Bible Online

2-tīmuthiyus 4 - Roman Urdu Geo bible

2-tīmuthiyus 4

¹maiṅ allāh aur masīh īsā ke sāmne jo zindoṅ aur murdoṅ kī adālat karegā aur us kī āmad aur bādshāhī kī yād dilā kar sanjīdagī se is kī tākīd kartā hūṅ,

²ki waqt bewaqt kalām-e-muqaddas kī munādī karne ke lie tayyār raheṅ. baṛe sabar se īmāndāroṅ ko tālīm de kar unheṅ samjhāeṅ, malāmat kareṅ aur un kī hauslā-afzāī bhī kareṅ.

³kyūṅki ek waqt āegā jab log sehhatbaḳhsh tālīm bardāsht nahīṅ kareṅge balki apne pās apnī burī ḳhwāhishāt se mutābiqat rakhne wāle ustādoṅ kā ḍher lagā leṅge. yih ustād unheṅ sirf dil bahlāne wālī bāteṅ sunāeṅge, sirf wuh kuchh jo wuh sunanā chāhte haiṅ.

⁴wuh sachchāī ko sunane se bāz ā kar farzī kahāniyoṅ ke pīchhe paṛ jāeṅge.

⁵lekin āp ḳhud har hālat meṅ hosh meṅ raheṅ. dukh ko bardāsht kareṅ, allāh kī ḳhushḳhabrī sunāte raheṅ aur apnī ḳhidmat ke tamām farāiz adā kareṅ.

⁶jahāṅ tak merā tālluq hai, wuh waqt ā chukā hai ki mujhe mai kī nazar kī tarah qurbāngāh par unḍelā jāe. mere kūch kā waqt ā gayā hai.

⁷maiṅ ne achchhī kushtī laṛī hai, maiṅ dauṛ ke iḳhtitām tak pahuṅch gayā hūṅ, maiṅ ne īmān ko mahfūz rakhā hai.

⁸aur ab ek in'ām tayyār paṛā hai, rāstbāzī kā wuh tāj jo ḳhudāwand hamārā rāst munsif mujhe apnī āmad ke din degā. aur na sirf mujhe balki un sab ko jo us kī āmad ke ārzūmand rahe haiṅ.

⁹mere pās āne meṅ jaldī kareṅ.

¹⁰kyūṅki demās ne is duniyā ko pyār karke mujhe chhoṛ diyā hai. wuh thissalunīke chalā gayā. kreskens galatiyā aur titus dalmatiyā chale gae haiṅ.

¹¹sirf lūqā mere pās hai. marqus ko apne sāth le ānā, kyūṅki wuh ḳhidmat ke lie mufīd sābit hogā.

¹²tuḳhikus ko maiṅ ne ifisus bhej diyā hai.

¹³āte waqt merā wuh kūṭ apne sāth le āeṅ jo maiṅ troās meṅ karpus ke pās chhoṛ āyā thā. merī kitābeṅ bhī le āeṅ, ḳhāskar charmī kāġhaz wālī.

¹⁴sikandar lohār ne mujhe bahut nuqsān pahuṅchāyā hai. ḳhudāwand use us ke kām kā badlā degā.

¹⁵us se muhtāt raheṅ kyūṅki us ne baṛī shiddat se hamārī bātoṅ kī muḳhālafat kī.

¹⁶jab mujhe pahlī dafā apne difā ke lie adālat meṅ pesh kiyā gayā to sab ne mujhe tark kar diyā. allāh un se is bāt kā hisāb na le balki ise nazarandāz kar de.

¹⁷lekin ḳhudāwand mere sāth thā. usī ne mujhe taqwiyat dī, kyūṅki us kī marzī thī ki mere wasīle se us kā pūrā paiġhām sunāyā jāe aur tamām ġhairyahūdī use suneṅ. yūṅ allāh ne mujhe sherbabar ke muṅh se nikāl kar bachā liyā.

¹⁸aur āge bhī ḳhudāwand mujhe har sharīr hamle se bachāegā aur apnī āsmānī bādshāhī meṅ lā kar najāt degā. us kā jalāl azal se abad tak hotā rahe. āmīn.

¹⁹priskillā, akwilā aur unesifurus ke gharāne ko hamārā salām kahnā.

²⁰irāstus kurinthus meṅ rahā, aur mujhe trufimus ko mīletus meṅ chhoṛnā paṛā, kyūṅki wuh bīmār thā.

²¹jaldī kareṅ tāki sardiyoṅ ke mausam se pahle yahāṅ pahuṅcheṅ. yūbūlus, pūdens, līnus, klaudiyā aur tamām bhāī āp ko salām kahte haiṅ.

²²ḳhudāwand āp kī rūh ke sāth ho. allāh kā fazl āp ke sāth hotā rahe.