Read Roman Urdu Geo titus 1 Bible Online

titus 1 - Roman Urdu Geo bible

titus 1

¹yih ḳhat paulus kī taraf se hai jo allāh kā ḳhādim aur īsā masīh kā rasūl hai. mujhe chun kar bhejā gayā tāki maiṅ īmān lāne aur ḳhudātars zindagī kī sachchāī jān lene meṅ allāh ke chune hue logoṅ kī madad karūṅ.

²kyūṅki us se unheṅ abadī zindagī kī ummīd dilāī jātī hai, aisī zindagī kī jis kā wādā allāh ne duniyā ke zamānoṅ se peshtar hī kiyā thā. aur wuh jhūṭ nahīṅ boltā.

³apne muqarrarā waqt par allāh ne apne kalām kā elān karke use zāhir kar diyā. yihī elān mere sapurd kiyā gayā hai aur maiṅ ise hamāre najātdahindā allāh ke hukm ke mutābiq sunātā hūṅ.

⁴maiṅ titus ko likh rahā hūṅ jo hamāre mushtarakā īmān ke mutābiq merā haqīqī beṭā hai. ḳhudā bāp aur hamārā najātdahindā masīh īsā āp ko fazl aur salāmatī atā kareṅ.

⁵maiṅ ne āp ko krete meṅ is lie chhoṛā thā ki āp wuh kamiyāṅ durust kareṅ jo ab tak rah gaī thīṅ. yih bhī ek maqsad thā ki āp har shahr kī jamā'at meṅ buzurg muqarrar kareṅ, jis tarah maiṅ ne āp ko kahā thā.

⁶buzurg be'ilzām ho. us kī sirf ek bīwī ho. us ke bachche īmāndār hoṅ aur log un par ayyāsh yā sarkash hone kā ilzām na lagā sakeṅ.

⁷nigarān ko to allāh kā gharānā saṅbhālne kī zimmādārī dī gaī hai, is lie lāzim hai ki wuh be'ilzām ho. wuh ḳhudsar, ġhusīlā, sharābī, laṛākā yā lālchī na ho.

⁸is ke bajāe wuh mehmān-nawāz ho aur sab achchhī chīzoṅ se pyār karne wālā ho. wuh samajhdār, rāstbāz aur muqaddas ho. wuh apne āp par qābū rakh sake.

⁹wuh us kalām ke sāth lipṭā rahe jo qābil-e-etimād aur hamārī tālīm ke mutābiq hai. kyūṅki is tarah hī wuh sehhatbaḳhsh tālīm de kar dūsroṅ kī hauslā-afzāī kar sakegā aur muḳhālafat karne wāloṅ ko samjhā bhī sakegā.

¹⁰bāt yih hai ki bahut se aise log haiṅ jo sarkash haiṅ, jo fuzūl bāteṅ karke dūsroṅ ko dhokā dete haiṅ. yih bāt ḳhāskar un par sādiq ātī hai jo yahūdiyoṅ meṅ se haiṅ.

¹¹lāzim hai ki unheṅ chup karā diyā jāe, kyūṅki yih lālach meṅ ā kar kaī logoṅ ke pūre ghar apnī ġhalat tālīm se ḳharāb kar rahe haiṅ.

¹²un ke apne ek nabī ne kahā hai, “krete ke bāshinde hameshā jhūṭ bolne wāle, wahshī jānwar aur sust peṭū hote haiṅ.”

¹³us kī yih gawāhī durust hai. is wajah se lāzim hai ki āp unheṅ saḳhtī se samjhāeṅ tāki un kā īmān sehhatmand rahe

¹⁴aur wuh yahūdī farzī kahāniyoṅ yā un insānoṅ ke ahkām par dhyān na deṅ jo sachchāī se haṭ gae haiṅ.

¹⁵jo log pāk-sāf haiṅ un ke lie sab kuchh pāk hai. lekin jo nāpāk aur īmān se ḳhālī haiṅ un ke lie kuchh bhī pāk nahīṅ hotā balki un kā zahan aur un kā zamīr donoṅ nāpāk ho gae haiṅ.

¹⁶yih allāh ko jānane kā dāwā to karte haiṅ, lekin un kī harkateṅ is bāt kā inkār kartī haiṅ. yih ghinaune, nāfarmān aur koī bhī achchhā kām karne ke qābil nahīṅ haiṅ.