Read Roman Urdu Geo titus 3 Bible Online

titus 3 - Roman Urdu Geo bible

titus 3

¹unheṅ yād dilānā ki wuh hukmrānoṅ aur iḳhtiyār wāloṅ ke tābe aur farmāṅbardār raheṅ. wuh har nek kām karne ke lie tayyār raheṅ,

²kisī par tohmat na lagāeṅ, amnpasand aur narmdil hoṅ aur tamām logoṅ ke sāth narmmizājī se pesh āeṅ.

³kyūṅki ek waqt thā jab ham bhī nāsamajh, nāfarmān aur sahīh rāh se bhaṭke hue the. us waqt ham kaī tarah kī shahwatoṅ aur ġhalat ḳhwāhishoṅ kī ġhulāmī meṅ the. ham bure kāmoṅ aur hasad karne meṅ zindagī guzārte the. dūsre ham se nafrat karte the aur ham bhī un se nafrat karte the.

⁴lekin jab hamāre najātdahindā allāh kī mehrbānī aur muhabbat zāhir huī

⁵to us ne hameṅ bachāyā. yih nahīṅ ki ham ne rāst kām karne ke bāis najāt hāsil kī balki us ke rahm hī ne hameṅ rūh-ul-quds ke wasīle se bachāyā jis ne hameṅ dho kar nae sire se janm diyā aur naī zindagī atā kī.

⁶allāh ne apne is rūh ko baṛī fayyāzī se hamāre najātdahindā īsā masīh ke wasīle se ham par unḍel diyā

⁷tāki hameṅ us ke fazl se rāstbāz qarār diyā jāe aur ham us abadī zindagī ke wāris ban jāeṅ jis kī ummīd ham rakhte haiṅ.

⁸is bāt par pūrā etimād kiyā jā saktā hai. maiṅ chāhtā hūṅ ki āp in bātoṅ par ḳhās zor deṅ tāki jo allāh par īmān lāe haiṅ wuh dhyān se nek kām karne meṅ lage raheṅ. yih bāteṅ sab ke lie achchhī aur mufīd haiṅ.

⁹lekin behūdā bahsoṅ, nasabnāmoṅ, jhagaṛoṅ aur sharīat ke bāre meṅ tanāzoṅ se bāz raheṅ, kyūṅki aisā karnā befāidā aur fuzūl hai.

¹⁰jo shaḳhs pārṭībāz hai use do bār samjhāeṅ. agar wuh is ke bād bhī na māne to use rifāqat se ḳhārij kareṅ.

¹¹kyūṅki āp ko patā hogā ki aisā shaḳhs ġhalat rāh par hai aur gunāh meṅ phaṅsā huā hotā hai. us ne apnī harkatoṅ se apne āp ko mujrim ṭhahrāyā hai.

¹²jab maiṅ artimās yā tuḳhikus ko āp ke pās bhej dūṅgā to mere pās āne meṅ jaldī kareṅ. maiṅ nīkupulis shahr meṅ hūṅ, kyūṅki maiṅ ne faislā kar liyā hai ki sardiyoṅ kā mausam yahāṅ guzārūṅ.

¹³jab zenās wakīl aur apullos safar kī tayyāriyāṅ kar rahe haiṅ to un kī madad kareṅ. ḳhayāl rakheṅ ki un kī har zarūrat pūrī kī jāe.

¹⁴lāzim hai ki hamāre log nek kām karne meṅ lage rahnā sīkheṅ, ḳhāskar jahāṅ bahut zarūrat hai, aisā na ho ki āḳhirkār wuh bephal nikleṅ.

¹⁵sab jo mere sāth haiṅ āp ko salām kahte haiṅ. unheṅ merā salām denā jo īmān meṅ ham se muhabbat rakhte haiṅ. allāh kā fazl āp sab ke sāth hotā rahe.