Read Roman Urdu Geo ibrāniyoṅ 11 Bible Online

ibrāniyoṅ 11 - Roman Urdu Geo bible

ibrāniyoṅ 11

¹īmān kyā hai? yih ki ham us meṅ qāim raheṅ jis par ham ummīd rakhte haiṅ aur ki ham us kā yaqīn rakheṅ jo ham nahīṅ dekh sakte.

²īmān hī se purāne zamānoṅ ke logoṅ ko allāh kī qabūliyat hāsil huī.

³īmān ke zarī'e ham jān lete haiṅ ki kāināt ko allāh ke kalām se ḳhalaq kiyā gayā, ki jo kuchh ham dekh sakte haiṅ nazar āne wālī chīzoṅ se nahīṅ banā.

⁴yih īmān kā kām thā ki hābīl ne allāh ko ek aisī qurbānī pesh kī jo qābīl kī qurbānī se behtar thī. is īmān kī binā par allāh ne use rāstbāz ṭhahrā kar us kī achchhī gawāhī dī, jab us ne us kī qurbāniyoṅ ko qabūl kiyā. aur īmān ke zarī'e wuh ab tak boltā rahtā hai hālāṅki wuh murdā hai.

⁵yih īmān kā kām thā ki hanūk na marā balki zindā hālat meṅ āsmān par uṭhāyā gayā. koī bhī use ḍhūnḍ kar pā na sakā kyūṅki allāh use āsmān par uṭhā le gayā thā. wajah yih thī ki uṭhāe jāne se pahle use yih gawāhī milī ki wuh allāh ko pasand āyā.

⁶aur īmān rakhe baġhair ham allāh ko pasand nahīṅ ā sakte. kyūṅki lāzim hai ki allāh ke huzūr āne wālā īmān rakhe ki wuh hai aur ki wuh unheṅ ajr detā hai jo us ke tālib haiṅ.

⁷yih īmān kā kām thā ki nūh ne allāh kī sunī jab us ne use āne wālī bātoṅ ke bāre meṅ āgāh kiyā, aisī bātoṅ ke bāre meṅ jo abhī deḳhne meṅ nahīṅ āī thīṅ. nūh ne ḳhudā kā ḳhauf mān kar ek kashtī banāī tāki us kā ḳhāndān bach jāe. yūṅ us ne apne īmān ke zarī'e duniyā ko mujrim qarār diyā aur us rāstbāzī kā wāris ban gayā jo īmān se hāsil hotī hai.

⁸yih īmān kā kām thā ki ibrāhīm ne allāh kī sunī jab us ne use bulā kar kahā ki wuh ek aise mulk meṅ jāe jo use bād meṅ mīrās meṅ milegā. hāṅ, wuh apne mulk ko chhoṛ kar rawānā huā, hālāṅki use mālūm na thā ki wuh kahāṅ jā rahā hai.

⁹īmān ke zarī'e wuh wādā kie hue mulk meṅ ajnabī kī haisiyat se rahne lagā. wuh ḳhaimoṅ meṅ rahtā thā aur isī tarah is'hāq aur yāqūb bhī jo us ke sāth usī wāde ke wāris the.

¹⁰kyūṅki ibrāhīm us shahr ke intizār meṅ thā jis kī mazbūt bunyād hai aur jis kā naqsh banāne aur tāmīr karne wālā ḳhud allāh hai.

¹¹yih īmān kā kām thā ki ibrāhīm bāp banane ke qābil ho gayā, hālāṅki wuh buṛhāpe kī wajah se bāp nahīṅ ban saktā thā. isī tarah sārā bhī bachche janm nahīṅ de saktī thī. lekin ibrāhīm samajhtā thā ki allāh jis ne wādā kiyā hai wafādār hai.

¹²go ibrāhīm taqrīban mar chukā thā to bhī usī ek shaḳhs se beshumār aulād niklī, tādād meṅ āsmān par ke sitāroṅ aur sāhil par kī ret ke zarroṅ ke barābar.

¹³yih tamām log īmān rakhte rakhte mar gae. unheṅ wuh kuchh na milā jis kā wādā kiyā gayā thā. unhoṅ ne use sirf dūr hī se dekh kar ḳhushāmdīd [4] kahā. aur unhoṅ ne taslīm kiyā ki ham zamīn par [5] sirf mehmān aur ārizī taur par rahne wāle ajnabī haiṅ.

¹⁴jo is qism kī bāteṅ karte haiṅ wuh zāhir karte haiṅ ki ham ab tak apne watan kī talāsh meṅ haiṅ.

¹⁵agar un ke zahan meṅ wuh mulk hotā jis se wuh nikal āe the to wuh ab bhī wāpas jā sakte the.

¹⁶is ke bajāe wuh ek behtar mulk yānī ek āsmānī mulk kī ārzū kar rahe the. is lie allāh un kā ḳhudā kahlāne se nahīṅ sharmātā, kyūṅki us ne un ke lie ek shahr tayyār kiyā hai.

¹⁷yih īmān kā kām thā ki ibrāhīm ne us waqt is'hāq ko qurbānī ke taur par pesh kiyā jab allāh ne use āzmāyā. hāṅ, wuh apne iklaute beṭe ko qurbān karne ke lie tayyār thā agarche use allāh ke wāde mil gae the

¹⁸ki “terī nasl is'hāq hī se qāim rahegī.”

¹⁹ibrāhīm ne sochā, “allāh murdoṅ ko bhī zindā kar saktā hai,” aur majāzan use wāqaī is'hāq murdoṅ meṅ se wāpas mil gayā.

²⁰yih īmān kā kām thā ki is'hāq ne āne wālī chīzoṅ ke lihāz se yāqūb aur esau ko barkat dī.

²¹yih īmān kā kām thā ki yāqūb ne marte waqt yūsuf ke donoṅ beṭoṅ ko barkat dī aur apnī lāṭhī ke sire par ṭek lagā kar allāh ko sijdā kiyā.

²²yih īmān kā kām thā ki yūsuf ne marte waqt yih peshgoī kī ki isrāīlī misr se nikleṅge balki yih bhī kahā ki nikalte waqt merī haḍḍiyāṅ bhī apne sāth le jāo.

²³yih īmān kā kām thā ki mūsā ke māṅ-bāp ne use paidāish ke bād tīn māh tak chhupāe rakhā, kyūṅki unhoṅ ne dekhā ki wuh ḳhūbsūrat hai. wuh bādshāh ke hukm kī ḳhilāfwarzī karne se na ḍare.

²⁴yih īmān kā kām thā ki mūsā ne parwān chaṛh kar inkār kiyā ki use fir'aun kī beṭī kā beṭā ṭhahrāyā jāe.

²⁵ārizī taur par gunāh se lutfandoz hone ke bajāe us ne allāh kī qaum ke sāth badsulūkī kā nishānā banane ko tarjīh dī.

²⁶wuh samjhā ki jab merī masīh kī ḳhātir ruswāī kī jātī hai to yih misr ke tamām ḳhazānoṅ se zyādā qīmtī hai, kyūṅki us kī āṅkheṅ āne wāle ajr par lagī rahīṅ.

²⁷yih īmān kā kām thā ki mūsā ne bādshāh ke ġhusse se ḍare baġhair misr ko chhoṛ diyā, kyūṅki wuh goyā andekhe ḳhudā ko musalsal apnī āṅkhoṅ ke sāmne rakhtā rahā.

²⁸yih īmān kā kām thā ki us ne fasah kī īd manā kar hukm diyā ki ḳhūn ko chaukhaṭoṅ par lagāyā jāe tāki halāk karne wālā farishtā un ke pahlauṭhe beṭoṅ ko na chhue.

²⁹yih īmān kā kām thā ki isrāīlī bahr-e-qulzum meṅ se yūṅ guzar sake jaise ki yih ḳhushk zamīn thī. jab misriyoṅ ne yih karne kī koshish kī to wuh ḍūb gae.

³⁰yih īmān kā kām thā ki sāt din tak yarīhū shahr kī fasīl ke gird chakkar lagāne ke bād pūrī dīwār gir gaī.

³¹yih bhī īmān kā kām thā ki rāhab fāhishā apne shahr ke bāqī nāfarmān bāshindoṅ ke sāth halāk na huī, kyūṅki us ne isrāīlī jāsūsoṅ ko salāmatī ke sāth ḳhushāmdīd kahā thā.

³²maiṅ mazīd kyā kuchh kahūṅ? mere pās itnā waqt nahīṅ ki maiṅ jidāūn, baraq, samsūn, iftāh, dāūd, samūel aur nabiyoṅ ke bāre meṅ sunātā rahūṅ.

³³yih sab īmān ke sabab se hī kāmyāb rahe. wuh bādshāhiyoṅ par ġhālib āe aur insāf karte rahe. unheṅ allāh ke wāde hāsil hue. unhoṅ ne sherbabaroṅ ke muṅh band kar die

³⁴aur āg ke bhaṛakte sholoṅ ko bujhā diyā. wuh talwār kī zad se bach nikle. wuh kamzor the lekin unheṅ quwwat hāsil huī. jab jang chhiṛ gaī to wuh itne tāqatwar sābit hue ki unhoṅ ne ġhairmulkī lashkaroṅ ko shikast dī.

³⁵īmān rakhne ke bāis ḳhawātīn ko un ke murdā azīz zindā hālat meṅ wāpas mile. lekin aise bhī the jinheṅ tashaddud bardāsht karnā paṛā aur jinhoṅ ne āzād ho jāne se inkār kiyā tāki unheṅ ek behtar chīz yānī jī uṭhne kā tajribā hāsil ho jāe.

³⁶bāz ko lān-tān aur koṛoṅ balki zanjīroṅ aur qaid kā bhī sāmnā karnā paṛā.

³⁷unheṅ sangsār kiyā gayā, unheṅ āre se chīrā gayā, unheṅ talwār se mār ḍālā gayā. bāz ko bheṛ-bakriyoṅ kī khāloṅ meṅ ghūmnā phirnā paṛā. zarūratmand hālat meṅ unheṅ dabāyā aur un par zulm kiyā jātā rahā.

³⁸duniyā un ke lāiq nahīṅ thī! wuh wīrān jaghoṅ meṅ, pahāṛoṅ par, ġhāroṅ aur gaṛhoṅ meṅ āwārā phirte rahe.

³⁹in sab ko īmān kī wajah se achchhī gawāhī milī. to bhī inheṅ wuh kuchh hāsil na huā jis kā wādā allāh ne kiyā thā.

⁴⁰kyūṅki us ne hamāre lie ek aisā mansūbā banāyā thā jo kahīṅ behtar hai. wuh chāhtā thā ki yih log hamāre baġhair kāmiliyat tak na pahuṅcheṅ.