Read Roman Urdu Geo ibrāniyoṅ 2 Bible Online

ibrāniyoṅ 2 - Roman Urdu Geo bible

ibrāniyoṅ 2

¹is lie lāzim hai ki ham aur zyādā dhyān se kalām-e-muqaddas kī un bātoṅ par ġhaur kareṅ jo ham ne sun lī haiṅ. aisā na ho ki ham samundar par beqābū kashtī kī tarah bemaqsad idhar udhar phireṅ.

²jo kalām farishtoṅ ne insān tak pahuṅchāyā wuh to anmiṭ rahā, aur jis se bhī koī ḳhatā yā nāfarmānī huī use us kī munāsib sazā milī.

³to phir ham kis tarah allāh ke ġhazab se bach sakeṅge agar ham masīh kī itnī azīm najāt ko nazarandāz kareṅ? pahle ḳhudāwand ne ḳhud is najāt kā elān kiyā, aur phir aise logoṅ ne hamāre pās ā kar is kī tasdīq kī jinhoṅ ne use sun liyā thā.

⁴sāth sāth allāh ne is bāt kī is tarah tasdīq bhī kī ki us ne apnī marzī ke mutābiq ilāhī nishān, mojize aur muḳhtalif qism ke zordār kām dikhāe aur rūh-ul-quds kī nemateṅ logoṅ meṅ taqsīm kīṅ.

⁵ab aisā hai ki allāh ne mazkūrā āne wālī duniyā ko farishtoṅ ke tābe nahīṅ kiyā.

⁶kyūṅki kalām-e-muqaddas meṅ kisī ne kahīṅ yih gawāhī dī hai, “insān kaun hai ki tū use yād kare yā ādamzād ki tū us kā ḳhayāl rakhe?

⁷tū ne use thoṛī der ke lie farishtoṅ se kam kar diyā, tū ne use jalāl aur izzat kā tāj pahnā kar

⁸sab kuchh us ke pāoṅ ke nīche kar diyā.” jab likhā hai ki sab kuchh us ke pāoṅ tale kar diyā gayā to is kā matlab hai ki koī chīz na rahī jo us ke tābe nahīṅ hai. beshak hameṅ hāl meṅ yih bāt nazar nahīṅ ātī ki sab kuchh us ke tābe hai,

⁹lekin ham use zarūr deḳhte haiṅ jo “thoṛī der ke lie farishtoṅ se kam” thā yānī īsā ko jise us kī maut tak ke dukh kī wajah se “jalāl aur izzat kā tāj” pahnāyā gayā hai. hāṅ, allāh ke fazl se us ne sab kī ḳhātir maut bardāsht kī.

¹⁰kyūṅki yihī munāsib thā ki allāh jis ke lie aur jis ke wasīle se sab kuchh hai yūṅ bahut se beṭoṅ ko apne jalāl meṅ sharīk kare ki wuh un kī najāt ke bānī īsā ko dukh uṭhāne se kāmiliyat tak pahuṅchāe.

¹¹īsā aur wuh jinheṅ wuh maḳhsūs-o-muqaddas kar detā hai donoṅ kā ek hī bāp hai. yihī wajah hai ki īsā yih kahne se nahīṅ sharmātā ki muqaddasīn mere bhāī haiṅ.

¹²masalan wuh allāh se kahtā hai, “maiṅ apne bhāiyoṅ ke sāmne tere nām kā elān karūṅga, jamā'at ke darmiyān hī terī madahsarāī karūṅga.”

¹³wuh yih bhī kahtā hai, “maiṅ us par bharosā rakhūṅgā.” aur phir “maiṅ hāzir hūṅ, maiṅ aur wuh bachche jo allāh ne mujhe die haiṅ.”

¹⁴ab chūṅki yih bachche gosht-post aur ḳhūn ke insān haiṅ is lie īsā ḳhud un kī mānind ban gayā aur un kī insānī fitrat meṅ sharīk huā. kyūṅki is tarah hī wuh apnī maut se maut ke mālik iblīs ko tabāh kar sakā,

¹⁵aur is tarah hī wuh unheṅ chhuṛā sakā jo maut se ḍarne kī wajah se zindagī bhar ġhulāmī meṅ the.

¹⁶zāhir hai ki jin kī madad wuh kartā hai wuh farishte nahīṅ haiṅ balki ibrāhīm kī aulād.

¹⁷is lie lāzim thā ki wuh har lihāz se apne bhāiyoṅ kī mānind ban jāe. sirf is se us kā yih maqsad pūrā ho sakā ki wuh allāh ke huzūr ek rahīm aur wafādār imām-e-āzam ban kar logoṅ ke gunāhoṅ kā kaffārā de sake.

¹⁸aur ab wuh un kī madad kar saktā hai jo āzmāish meṅ uljhe hue haiṅ, kyūṅki us kī bhī āzmāish huī aur us ne ḳhud dukh uṭhāyā hai.