Read Roman Urdu Geo ibrāniyoṅ 4 Bible Online

ibrāniyoṅ 4 - Roman Urdu Geo bible

ibrāniyoṅ 4

¹dekheṅ, ab tak allāh kā yih wādā qāim hai, aur ab tak ham sukūn ke mulk meṅ dāḳhil ho sakte haiṅ. is lie āeṅ, ham ḳhabardār raheṅ. aisā na ho ki āp meṅ se koī pīchhe rah kar us meṅ dāḳhil na hone pāe.

²kyūṅki hameṅ bhī un kī tarah ek ḳhushḳhabrī sunāī gaī. lekin yih paiġhām un ke lie befāidā thā, kyūṅki wuh use sun kar īmān na lāe.

³un kī nisbat ham jo īmān lāe haiṅ sukūn ke is mulk meṅ dāḳhil ho sakte haiṅ. ġharz, yih aisā hī hai jis tarah allāh ne farmāyā, “apne ġhazab meṅ maiṅ ne qasam khāī, ‘yih kabhī us mulk meṅ dāḳhil nahīṅ hoṅge jahāṅ maiṅ unheṅ sukūn detā’.” ab ġhaur kareṅ ki us ne yih kahā agarche us kā kām duniyā kī taḳhlīq par iḳhtitām tak pahuṅch gayā thā.

⁴kyūṅki kalām-e-muqaddas meṅ sātweṅ din ke bāre meṅ likhā hai, “sātweṅ din allāh kā sārā kām takmīl tak pahuṅch gayā. is se fāriġh ho kar us ne ārām kiyā.”

⁵ab is kā muqābalā mazkūrā āyat se kareṅ, “yih kabhī us mulk meṅ dāḳhil nahīṅ hoṅge jahāṅ maiṅ unheṅ sukūn detā.”

⁶jinhoṅ ne pahle allāh kī ḳhushḳhabrī sunī unheṅ nāfarmān hone kī wajah se yih sukūn na milā. to bhī yih bāt qāim rahī ki kuchh to sukūn ke is mulk meṅ dāḳhil ho jāeṅge.

⁷yih madd-e-nazar rakh kar allāh ne ek aur din muqarrar kiyā, mazkūrā “āj” kā din. kaī sāloṅ ke bād hī us ne dāūd kī mārifat wuh bāt kī jis par ham ġhaur kar rahe haiṅ, “agar tum āj allāh kī āwāz suno to apne diloṅ ko saḳht na karo.”

⁸jab yashūa unheṅ mulk-e-kan'ān meṅ lāyā tab us ne isrāīliyoṅ ko yih sukūn na diyā, warnā allāh is ke bād ke kisī aur din kā zikr na kartā.

⁹chunāṅche allāh kī qaum ke lie ek ḳhās sukūn bāqī rah gayā hai, aisā sukūn jo allāh ke sātweṅ din ārām karne se mutābiqat rakhtā hai.

¹⁰kyūṅki jo bhī wuh sukūn pātā hai jis kā wādā allāh ne kiyā wuh allāh kī tarah apne kāmoṅ se fāriġh ho kar ārām karegā.

¹¹is lie āeṅ, ham is sukūn meṅ dāḳhil hone kī pūrī koshish kareṅ tāki ham meṅ se koī bhī bāpdādā ke nāfarmān namūne par chal kar gunāh meṅ na gir jāe.

¹²kyūṅki allāh kā kalām zindā, muassir aur har dodhārī talwār se zyādā tez hai. wuh insān meṅ se guzar kar us kī jān rūh se aur us ke joṛoṅ ko gūde se alag kar letā hai. wuhī dil ke ḳhayālāt aur soch ko jāṅch kar un par faislā karne ke qābil hai.

¹³koī maḳhlūq bhī allāh kī nazar se nahīṅ chhup saktī. us kī āṅkhoṅ ke sāmne jis ke jawābdih ham hote haiṅ sab kuchh ayāṅ aur beniqāb hai.

¹⁴ġharz āeṅ, ham us īmān se lipṭe raheṅ jis kā iqrār ham karte haiṅ. kyūṅki hamārā aisā azīm imām-e-āzam hai jo āsmānoṅ meṅ se guzar gayā yānī īsā allāh kā farzand.

¹⁵aur wuh aisā imām-e-āzam nahīṅ hai jo hamārī kamzoriyoṅ ko dekh kar hamdardī na dikhāe balki agarche wuh begunāh rahā to bhī hamārī tarah use har qism kī āzmāish kā sāmnā karnā paṛā.

¹⁶ab āeṅ, ham pūre etimād ke sāth allāh ke taḳht ke sāmne hāzir ho jāeṅ jahāṅ fazl pāyā jātā hai. kyūṅki wahīṅ ham wuh rahm aur fazl pāeṅge jo zarūrat ke waqt hamārī madad kar saktā hai.