Read Roman Urdu Geo ibrāniyoṅ 5 Bible Online

ibrāniyoṅ 5 - Roman Urdu Geo bible

ibrāniyoṅ 5

¹ab insānoṅ meṅ se chune gae imām-e-āzam ko is lie muqarrar kiyā jātā hai ki wuh un kī ḳhātir allāh kī ḳhidmat kare, tāki wuh gunāhoṅ ke lie nazarāne aur qurbāniyāṅ pesh kare.

²wuh jāhil aur āwārā logoṅ ke sāth narm sulūk rakh saktā hai, kyūṅki wuh ḳhud kaī tarah kī kamzoriyoṅ kī girift meṅ hotā hai.

³yihī wajah hai ki use na sirf qaum ke gunāhoṅ ke lie balki apne gunāhoṅ ke lie bhī qurbāniyāṅ chaṛhānī paṛtī haiṅ.

⁴aur koī apnī marzī se imām-e-āzam kā purwaqār uhdā nahīṅ apnā saktā balki lāzim hai ki allāh use hārūn kī tarah bulā kar muqarrar kare.

⁵isī tarah masīh ne bhī apnī marzī se imām-e-āzam kā purwaqār uhdā nahīṅ apnāyā. is ke bajāe allāh ne us se kahā, “tū merā farzand hai, āj maiṅ terā bāp ban gayā hūṅ.”

⁶kahīṅ aur wuh farmātā hai, “tū abad tak imām hai, aisā imām jaisā malik-e-sidq thā.”

⁷jab īsā is duniyā meṅ thā to us ne zor zor se pukār kar aur āṅsū bahā bahā kar use duāeṅ aur iltijāeṅ pesh kīṅ [2] jo use maut se bachā saktā thā. aur allāh ne us kī sunī, kyūṅki wuh ḳhudā kā ḳhauf rakhtā thā.

⁸wuh allāh kā farzand to thā, to bhī us ne dukh uṭhāne se farmāṅbardārī sīkhī.

⁹jab wuh kāmiliyat tak pahuṅch gayā to wuh un sab kī abadī najāt kā sarchashmā ban gayā jo us kī sunte haiṅ.

¹⁰us waqt allāh ne use imām-e-āzam bhī muta'ayyin kiyā, aisā imām jaisā malik-e-sidq thā.

¹¹is ke bāre meṅ ham mazīd bahut kuchh kah sakte haiṅ, lekin ham mushkil se is kī tashrīh kar sakte haiṅ, kyūṅki āp sunane meṅ sust haiṅ.

¹²asal meṅ itnā waqt guzar gayā hai ki ab āp ko ḳhud ustād honā chāhie. afsos ki aisā nahīṅ hai balki āp ko is kī zarūrat hai ki koī āp ke pās ā kar āp ko allāh ke kalām kī bunyādī sachchāiyāṅ dubārā sikhāe. āp ab tak ṭhos khānā nahīṅ khā sakte balki āp ko dūdh kī zarūrat hai.

¹³jo dūdh hī pī saktā hai wuh abhī chhoṭā bachchā hī hai aur wuh rāstbāzī kī tālīm se nāwāqif hai.

¹⁴is ke muqābale meṅ ṭhos khānā bāliġhoṅ ke lie hai jinhoṅ ne apnī balūġhat ke bāis apnī ruhānī basārat ko itnī tarbiyat dī hai ki wuh bhalāī aur burāī meṅ imtiyāz kar sakte haiṅ.