Read Roman Urdu Geo ibrāniyoṅ 6 Bible Online

ibrāniyoṅ 6 - Roman Urdu Geo bible

ibrāniyoṅ 6

¹is lie āeṅ, ham masīh ke bāre meṅ bunyādī tālīm ko chhoṛ kar balūġhat kī taraf āge baṛheṅ. kyūṅki aisī bāteṅ dohrāne kī zarūrat nahīṅ honī chāhie jin se īmān kī bunyād rakhī jātī hai, masalan maut tak pahuṅchāne wāle kām se taubā,

²baptismā kyā hai, kisī par hāth rakhne kī tālīm, murdoṅ ke jī uṭhne aur abadī sazā pāne kī tālīm.

³chunāṅche allāh kī marzī huī to ham yih chhoṛ kar āge baṛheṅge.

⁴nāmumkin hai ki unheṅ bahāl karke dubārā taubā tak pahuṅchāyā jāe jinhoṅ ne apnā īmān tark kar diyā ho. unheṅ to ek bār allāh ke nūr meṅ lāyā gayā thā, unhoṅ ne āsmān kī nemat chakh lī thī, wuh rūh-ul-quds meṅ sharīk hue,

⁵unhoṅ ne allāh ke kalām kī bhalāī aur āne wāle zamāne kī kuwwatoṅ kā tajribā kiyā thā.

⁶aur phir unhoṅ ne apnā īmān tark kar diyā! aise logoṅ ko bahāl karke dubārā taubā tak pahuṅchānā nāmumkin hai. kyūṅki aisā karne se wuh allāh ke farzand ko dubārā maslūb karke use lān-tān kā nishānā banā dete haiṅ.

⁷allāh us zamīn ko barkat detā hai jo apne par bār bār paṛne wālī bārish ko jazb karke aisī fasal paidā kartī hai jo khetībāṛī karne wāle ke lie mufīd ho.

⁸lekin agar wuh sirf ḳhārdār paude aur ūṅṭkaṭāre paidā kare to wuh bekār hai aur is ḳhatre meṅ hai ki us par lānat bhejī jāe. anjām-e-kār us par kā sab kuchh jalāyā jāegā.

⁹azīzo, go ham is tarah kī bāteṅ kar rahe haiṅ to bhī hamārā etimād yih hai ki āp ko wuh behtarīn barkateṅ hāsil haiṅ jo najāt se miltī haiṅ.

¹⁰kyūṅki allāh be'insāf nahīṅ hai. wuh āp kā kām aur wuh muhabbat nahīṅ bhūlegā jo āp ne us kā nām le kar zāhir kī jab āp ne muqaddasīn kī ḳhidmat kī balki āj tak kar rahe haiṅ.

¹¹lekin hamārī baṛī ḳhwāhish yih hai ki āp meṅ se har ek isī sargarmī kā izhār āḳhir tak kartā rahe tāki jin bātoṅ kī ummīd āp rakhte haiṅ wuh wāqaī pūrī ho jāeṅ.

¹²ham nahīṅ chāhte ki āp sust ho jāeṅ balki yih ki āp un ke namūne par chaleṅ jo īmān aur sabar se wuh kuchh mīrās meṅ pā rahe haiṅ jis kā wādā allāh ne kiyā hai.

¹³jab allāh ne qasam khā kar ibrāhīm se wādā kiyā to us ne apnī hī qasam khā kar yih wādā kiyā. kyūṅki koī aur nahīṅ thā jo us se baṛā thā jis kī qasam wuh khā saktā.

¹⁴us waqt us ne kahā, “maiṅ zarūr tujhe bahut barkat dūṅgā, aur maiṅ yaqīnan tujhe kasrat kī aulād dūṅgā.”

¹⁵is par ibrāhīm ne sabar se intizār karke wuh kuchh pāyā jis kā wādā kiyā gayā thā.

¹⁶qasam khāte waqt log us kī qasam khāte haiṅ jo un se baṛā hotā hai. is tarah se qasam meṅ bayānkardā bāt kī tasdīq bahs-mubāhasā kī har gunjāish ko ḳhatm kar detī hai.

¹⁷allāh ne bhī qasam khā kar apne wāde kī tasdīq kī. kyūṅki wuh apne wāde ke wārisoṅ par sāf zāhir karnā chāhtā thā ki us kā irādā kabhī nahīṅ badlegā.

¹⁸ġharz, yih do bāteṅ qāim rahī haiṅ, allāh kā wādā aur us kī qasam. wuh inheṅ na to badal saktā na in ke bāre meṅ jhūṭ bol saktā hai. yūṅ ham jinhoṅ ne us ke pās panāh lī hai baṛī tasallī pā kar us ummīd ko mazbūtī se thāme rakh sakte haiṅ jo hameṅ pesh kī gaī hai.

¹⁹kyūṅki yih ummīd hamārī jān ke lie mazbūt langar hai. aur yih āsmānī bait-ul-muqaddas ke muqaddastarīn kamre ke parde meṅ se guzar kar us meṅ dāḳhil hotī hai.

²⁰wahīṅ īsā hamāre āge āge jā kar hamārī ḳhātir dāḳhil huā hai. yūṅ wuh malik-e-sidq kī mānind hameshā ke lie imām-e-āzam ban gayā hai.