Read Roman Urdu Geo ibrāniyoṅ 7 Bible Online

ibrāniyoṅ 7 - Roman Urdu Geo bible

ibrāniyoṅ 7

¹yih malik-e-sidq, sālim kā bādshāh aur allāh t'ālā kā imām thā. jab ibrāhīm chār bādshāhoṅ ko shikast dene ke bād wāpas ā rahā thā to malik-e-sidq us se milā aur use barkat dī.

²is par ibrāhīm ne use tamām lūṭ ke māl kā daswāṅ hissā de diyā. ab malik-e-sidq kā matlab “rāstbāzī kā bādshāh” hai. dūsre, “sālim kā bādshāh” kā matlab “salāmatī kā bādshāh” hai.

³na us kā bāp yā māṅ hai, na koī nasabnāmā. us kī zindagī kā na to āġhāz hai, na iḳhtitām. allāh ke farzand kī tarah wuh abad tak imām rahtā hai.

⁴ġhaur kareṅ ki wuh kitnā azīm thā. hamāre bāpdādā ibrāhīm ne use lūṭe hue māl kā daswāṅ hissā de diyā.

⁵ab sharīat talab kartī hai ki lāwī kī wuh aulād jo imām ban jātī hai qaum yānī apne bhāiyoṅ se paidāwār kā daswāṅ hissā le, hālāṅki un ke bhāī ibrāhīm kī aulād haiṅ.

⁶lekin malik-e-sidq lāwī kī aulād meṅ se nahīṅ thā. to bhī us ne ibrāhīm se daswāṅ hissā le kar use barkat dī jis se allāh ne wādā kiyā thā.

⁷is meṅ koī shak nahīṅ ki kamhaisiyat shaḳhs ko us se barkat miltī hai jo zyādā haisiyat kā ho.

⁸jahāṅ lāwī imāmoṅ kā tālluq hai fānī insān daswāṅ hissā lete haiṅ. lekin malik-e-sidq ke muāmale meṅ yih hissā us ko milā jis ke bāre meṅ gawāhī dī gaī hai ki wuh zindā rahtā hai.

⁹yih bhī kahā jā saktā hai ki jab ibrāhīm ne māl kā daswāṅ hissā de diyā to lāwī ne us ke zarī'e bhī yih hissā diyā, hālāṅki wuh ḳhud daswāṅ hissā letā hai.

¹⁰kyūṅki go lāwī us waqt paidā nahīṅ huā thā to bhī wuh ek tarah se ibrāhīm ke jism meṅ maujūd thā jab malik-e-sidq us se milā.

¹¹agar lāwī kī kahānat (jis par sharīat mabnī thī) kāmiliyat paidā kar saktī to phir ek aur qism ke imām kī kyā zarūrat hotī, us kī jo hārūn jaisā na ho balki malik-e-sidq jaisā?

¹²kyūṅki jab bhī kahānat badal jātī hai to lāzim hai ki sharīat meṅ bhī tabdīlī āe.

¹³aur hamārā ḳhudāwand jis ke bāre meṅ yih bayān kiyā gayā hai wuh ek farq qabīle kā fard thā. us ke qabīle ke kisī bhī fard ne imām kī ḳhidmat adā nahīṅ kī.

¹⁴kyūṅki sāf mālūm hai ki ḳhudāwand masīh yahūdāh qabīle kā fard thā, aur mūsā ne is qabīle ko imāmoṅ kī ḳhidmat meṅ shāmil na kiyā.

¹⁵muāmalā mazīd sāf ho jātā hai. ek farq imām zāhir huā hai jo malik-e-sidq jaisā hai.

¹⁶wuh lāwī ke qabīle kā fard hone se imām na banā jis tarah sharīat taqāzā kartī thī, balki wuh lāfānī zindagī kī quwwat hī se imām ban gayā.

¹⁷kyūṅki kalām-e-muqaddas farmātā hai, “tū abad tak imām hai, aisā imām jaisā malik-e-sidq thā.”

¹⁸yūṅ purāne hukm ko mansūḳh kar diyā jātā hai, kyūṅki wuh kamzor aur bekār thā

¹⁹(mūsā kī sharīat to kisī chīz ko kāmil nahīṅ banā saktī thī) aur ab ek behtar ummīd muhayyā kī gaī hai jis se ham allāh ke qarīb ā jāte haiṅ.

²⁰aur yih nayā nizām allāh kī qasam se qāim huā. aisī koī qasam na khāī gaī jab dūsre imām bane.

²¹lekin īsā ek qasam ke zarī'e imām ban gayā jab allāh ne farmāyā, “rab ne qasam khāī hai aur is se pachhtāegā nahīṅ, ‘tū abad tak imām hai’.”

²²is qasam kī wajah se īsā ek behtar ahd kī zamānat detā hai.

²³ek aur farq, purāne nizām meṅ bahut se imām the, kyūṅki maut ne har ek kī ḳhidmat mahdūd kie rakhī.

²⁴lekin chūṅki īsā abad tak zindā hai is lie us kī kahānat kabhī bhī ḳhatm nahīṅ hogī.

²⁵yūṅ wuh unheṅ abadī najāt de saktā hai jo us ke wasīle se allāh ke pās āte haiṅ, kyūṅki wuh abad tak zindā hai aur un kī shafā'at kartā rahtā hai.

²⁶hameṅ aise hī imām-e-āzam kī zarūrat thī. hāṅ, aisā imām jo muqaddas, bequsūr, bedāġh, gunāhgāroṅ se alag aur āsmānoṅ se buland huā hai.

²⁷use dūsre imāmoṅ kī tarah is kī zarūrat nahīṅ ki har roz qurbāniyāṅ pesh kare, pahle apne lie phir qaum ke lie. balki us ne apne āp ko pesh karke apnī is qurbānī se un ke gunāhoṅ ko ek bār sadā ke lie miṭā diyā.

²⁸mūswī sharīat aise logoṅ ko imām-e-āzam muqarrar kartī hai jo kamzor haiṅ. lekin sharīat ke bād allāh kī qasam farzand ko imām-e-āzam muqarrar kartī hai, aur yih farzand abad tak kāmil hai.