Read Roman Urdu Geo ibrāniyoṅ 8 Bible Online

ibrāniyoṅ 8 - Roman Urdu Geo bible

ibrāniyoṅ 8

¹jo kuchh ham kah rahe haiṅ us kī markazī bāt yih hai, hamārā ek aisā imām-e-āzam hai jo āsmān par jalālī ḳhudā ke taḳht ke dahne hāth baiṭhā hai.

²wahāṅ wuh maqdis meṅ ḳhidmat kartā hai, us haqīqī mulāqāt ke ḳhaime meṅ jise insānī hāthoṅ ne khaṛā nahīṅ kiyā balki rab ne.

³har imām-e-āzam ko nazarāne aur qurbāniyāṅ pesh karne ke lie muqarrar kiyā jātā hai. is lie lāzim hai ki hamāre imām-e-āzam ke pās bhī kuchh ho jo wuh pesh kar sake.

⁴agar yih duniyā meṅ hotā to imām-e-āzam na hotā, kyūṅki yahāṅ imām to haiṅ jo sharīat ke matlūbā nazarāne pesh karte haiṅ.

⁵jis maqdis meṅ wuh ḳhidmat karte haiṅ wuh us maqdis kī sirf naqlī sūrat aur sāyā hai jo āsmān par hai. yihī wajah hai ki allāh ne mūsā ko mulāqāt kā ḳhaimā banāne se pahle āgāh karke yih kahā, “ġhaur kar ki sab kuchh ain us namūne ke mutābiq banāyā jāe jo maiṅ tujhe yahāṅ pahāṛ par dikhātā hūṅ.”

⁶lekin jo ḳhidmat īsā ko mil gaī hai wuh duniyā ke imāmoṅ kī ḳhidmat se kahīṅ behtar hai, utnī behtar jitnā wuh ahd jis kā darmiyānī īsā hai purāne ahd se behtar hai. kyūṅki yih ahd behtar wādoṅ kī bunyād par bāndhā gayā.

⁷agar pahlā ahd be'ilzām hotā to phir nae ahd kī zarūrat na hotī.

⁸lekin allāh ko apnī qaum par ilzām lagānā paṛā. us ne kahā, “rab kā farmān hai, aise din ā rahe haiṅ jab maiṅ isrāīl ke gharāne aur yahūdāh ke gharāne se ek nayā ahd bāndhūṅgā.

⁹yih us ahd kī mānind nahīṅ hogā jo maiṅ ne un ke bāpdādā ke sāth us din bāndhā thā jab maiṅ un kā hāth pakaṛ kar unheṅ misr se nikāl lāyā. kyūṅki wuh us ahd ke wafādār na rahe jo maiṅ ne un se bāndhā thā. natīje meṅ merī un ke lie fikr na rahī.

¹⁰ḳhudāwand farmātā hai ki jo nayā ahd maiṅ un dinoṅ ke bād un se bāndhūṅgā us ke taht maiṅ apnī sharīat un ke zahnoṅ meṅ ḍāl kar un ke diloṅ par kandā karūṅga. tab maiṅ hī un kā ḳhudā hūṅgā, aur wuh merī qaum hoṅge.

¹¹us waqt se is kī zarūrat nahīṅ rahegī ki koī apne paṛosī yā bhāī ko tālīm de kar kahe, ‘rab ko jān lo.’ kyūṅki chhoṭe se le kar baṛe tak sab mujhe jāneṅge,

¹²kyūṅki maiṅ un kā qusūr muāf karūṅga aur āindā un ke gunāhoṅ ko yād nahīṅ karūṅga.”

¹³in alfāz meṅ allāh ek nae ahd kā zikr kartā hai aur yūṅ purāne ahd ko matrūk qarār detā hai. aur jo matrūk aur purānā hai us kā anjām qarīb hī hai.