Read Roman Urdu Geo ibrāniyoṅ 9 Bible Online

ibrāniyoṅ 9 - Roman Urdu Geo bible

ibrāniyoṅ 9

¹jab pahlā ahd bāndhā gayā to ibādat karne ke lie hidāyāt dī gaīṅ. zamīn par ek maqdis bhī banāyā gayā,

²ek ḳhaimā jis ke pahle kamre meṅ shamādān, mez aur us par paṛī maḳhsūs kī gaī roṭiyāṅ thīṅ. us kā nām “muqaddas kamrā” thā.

³us ke pīchhe ek aur kamrā thā jis kā nām “muqaddastarīn kamrā” thā. pahle aur dūsre kamre ke darmiyān wāqe darwāze par pardā lagā thā.

⁴is pichhle kamre meṅ baḳhūr jalāne ke lie sone kī qurbāngāh aur ahd kā sandūq thā. ahd ke sandūq par sonā manḍhā huā thā aur us meṅ tīn chīzeṅ thīṅ: sone kā martabān jis meṅ man bharā thā, hārūn kā wuh asā jis se koṅpleṅ phūṭ niklī thīṅ aur patthar kī wuh do taḳhtiyāṅ jin par ahd ke ahkām likhe the.

⁵sandūq par ilāhī jalāl ke do karūbī farishte lage the jo sandūq ke ḍhakne ko sāyā dete the jis kā nām “kaffārā kā ḍhaknā” thā. lekin is jagah par ham sab kuchh mazīd tafsīl se bayān nahīṅ karnā chāhte.

⁶yih chīzeṅ isī tartīb se rakhī jātī haiṅ. jab imām apnī ḳhidmat ke farāiz adā karte haiṅ to bāqāidagī se pahle kamre meṅ jāte haiṅ.

⁷lekin sirf imām-e-āzam hī dūsre kamre meṅ dāḳhil hotā hai, aur wuh bhī sāl meṅ sirf ek dafā. jab bhī wuh jātā hai wuh apne sāth ḳhūn le kar jātā hai jise wuh apne aur qaum ke lie pesh kartā hai tāki wuh gunāh miṭ jāeṅ jo logoṅ ne ġhairirādī taur par kie hote haiṅ.

⁸is se rūh-ul-quds dikhātā hai ki muqaddastarīn kamre tak rasāī us waqt tak zāhir nahīṅ kī gaī thī jab tak pahlā kamrā istemāl meṅ thā.

⁹yih majāzan maujūdā zamāne kī taraf ishārā hai. is kā matlab yih hai ki jo nazarāne aur qurbāniyāṅ pesh kī jā rahī haiṅ wuh parastār ke zamīr ko pāk-sāf karke kāmil nahīṅ banā saktīṅ.

¹⁰kyūṅki in kā tālluq sirf khāne-pīne wālī chīzoṅ aur ġhusl kī muḳhtalif rasmoṅ se hotā hai, aisī zāhirī hidāyāt jo sirf nae nizām ke āne tak lāgū haiṅ.

¹¹lekin ab masīh ā chukā hai, un achchhī chīzoṅ kā imām-e-āzam jo ab hāsil huī haiṅ. jis ḳhaime meṅ wuh ḳhidmat kartā hai wuh kahīṅ zyādā azīm aur kāmil hai. yih ḳhaimā insānī hāthoṅ se nahīṅ banāyā gayā yānī yih is kāināt kā hissā nahīṅ hai.

¹²jab masīh ek bār sadā ke lie ḳhaime ke muqaddastarīn kamre meṅ dāḳhil huā to us ne qurbāniyāṅ pesh karne ke lie bakroṅ aur bachhṛoṅ kā ḳhūn istemāl na kiyā. is ke bajāe us ne apnā hī ḳhūn pesh kiyā aur yūṅ hamāre lie abadī najāt hāsil kī.

¹³purāne nizām meṅ bail-bakroṅ kā ḳhūn aur jawān gāy kī rākh nāpāk logoṅ par chhiṛke jāte the tāki un ke jism pāk-sāf ho jāeṅ.

¹⁴agar in chīzoṅ kā yih asar thā to phir masīh ke ḳhūn kā kyā zabardast asar hogā! azlī rūh ke zarī'e us ne apne āp ko bedāġh qurbānī ke taur par pesh kiyā. yūṅ us kā ḳhūn hamāre zamīr ko maut tak pahuṅchāne wāle kāmoṅ se pāk-sāf kartā hai tāki ham zindā ḳhudā kī ḳhidmat kar sakeṅ.

¹⁵yihī wajah hai ki masīh ek nae ahd kā darmiyānī hai. maqsad yih thā ki jitne logoṅ ko allāh ne bulāyā hai unheṅ allāh kī mau'ūdā aur abadī mīrās mile. aur yih sirf is lie mumkin huā hai ki masīh ne mar kar fidyā diyā tāki log un gunāhoṅ se chhuṭkārā pāeṅ jo un se us waqt sarzad hue jab wuh pahle ahd ke taht the.

¹⁶jahāṅ wasiyat hai wahāṅ zarūrī hai ki wasiyat karne wāle kī maut kī tasdīq kī jāe.

¹⁷kyūṅki jab tak wasiyat karne wālā zindā ho wasiyat beasar hotī hai. is kā asar wasiyat karne wāle kī maut hī se shurū hotā hai.

¹⁸yihī wajah hai ki pahlā ahd bāndhte waqt bhī ḳhūn istemāl huā.

¹⁹kyūṅki pūrī qaum ko sharīat kā har hukm sunāne ke bād mūsā ne bachhṛoṅ kā ḳhūn pānī se milā kar use zūfe ke guchchhe aur qirmizī rang ke dhāge ke zarī'e sharīat kī kitāb aur pūrī qaum par chhiṛkā.

²⁰us ne kahā, “yih ḳhūn us ahd kī tasdīq kartā hai jis kī pairawī karne kā hukm allāh ne tumheṅ diyā hai.”

²¹isī tarah mūsā ne yih ḳhūn mulāqāt ke ḳhaime aur ibādat ke tamām sāmān par chhiṛkā.

²²na sirf yih balki sharīat taqāzā kartī hai ki taqrīban har chīz ko ḳhūn hī se pāk-sāf kiyā jāe balki allāh ke huzūr ḳhūn pesh kie baġhair muāfī mil hī nahīṅ saktī.

²³ġharz, lāzim thā ki yih chīzeṅ jo āsmān kī aslī chīzoṅ kī naqlī sūrateṅ haiṅ pāk-sāf kī jāeṅ. lekin āsmānī chīzeṅ ḳhud aisī qurbāniyoṅ kā mutālabā kartī haiṅ jo in se kahīṅ behtar hoṅ.

²⁴kyūṅki masīh sirf insānī hāthoṅ se bane maqdis meṅ dāḳhil nahīṅ huā jo aslī maqdis kī sirf naqlī sūrat thī balki wuh āsmān meṅ hī dāḳhil huā tāki ab se hamārī ḳhātir allāh ke sāmne hāzir ho.

²⁵duniyā kā imām-e-āzam to sālānā kisī aur (yānī jānwar) kā ḳhūn le kar muqaddastarīn kamre meṅ dāḳhil hotā hai. lekin masīh is lie āsmān meṅ dāḳhil na huā ki wuh apne āp ko bār bār qurbānī ke taur par pesh kare.

²⁶agar aisā hotā to use duniyā kī taḳhlīq se le kar āj tak bahut dafā dukh sahnā paṛtā. lekin aisā nahīṅ hai balki ab wuh zamānoṅ ke iḳhtitām par ek hī bār sadā ke lie zāhir huā tāki apne āp ko qurbān karne se gunāh ko dūr kare.

²⁷ek bār marnā aur allāh kī adālat meṅ hāzir honā har insān ke lie muqarrar hai.

²⁸isī tarah masīh ko bhī ek hī bār bahutoṅ ke gunāhoṅ ko uṭhā kar le jāne ke lie qurbān kiyā gayā. dūsrī bār jab wuh zāhir hogā to gunāhoṅ ko dūr karne ke lie zāhir nahīṅ hogā balki unheṅ najāt dene ke lie jo shiddat se us kā intizār kar rahe haiṅ.