Read Roman Urdu Geo yāqūb 3 Bible Online

yāqūb 3 - Roman Urdu Geo bible

yāqūb 3

¹mere bhāiyo, āp meṅ se zyādā ustād na baneṅ. āp ko mālūm hai ki ham ustādoṅ kī zyādā saḳhtī se adālat kī jāegī.

²ham sab se to kaī tarah kī ġhaltiyāṅ sarzad hotī haiṅ. lekin jis shaḳhs se bolne meṅ kabhī ġhaltī nahīṅ hotī wuh kāmil hai aur apne pūre badan ko qābū meṅ rakhne ke qābil hai.

³ham ghoṛe ke muṅh meṅ lagām kā dahānā rakh dete haiṅ tāki wuh hamāre hukm par chale, aur is tarah ham apnī marzī se us kā pūrā jism chalā lete haiṅ.

⁴yā bādbānī jahāz kī misāl leṅ. jitnā bhī baṛā wuh ho aur jitnī bhī tez hawā chaltī ho nāḳhudā ek chhoṭī sī patwār ke zarī'e us kā ruḳh ṭhīk rakhtā hai. yūṅ hī wuh use apnī marzī se chalā letā hai.

⁵isī tarah zabān ek chhoṭā sā azu hai, lekin wuh baṛī baṛī bāteṅ kartī hai. dekheṅ, ek baṛe jangal ko bhasm karne ke lie ek hī chingārī kāfī hotī hai.

⁶zabān bhī āg kī mānind hai. badan ke dīgar āzā ke darmiyān rah kar us meṅ nārāstī kī pūrī duniyā pāī jātī hai. wuh pūre badan ko ālūdā kar detī hai, hāṅ insān kī pūrī zindagī ko āg lagā detī hai, kyūṅki wuh ḳhud jahannum kī āg se sulgāī gaī hai.

⁷dekheṅ, insān har qism ke jānwaroṅ par qābū pā letā hai aur us ne aisā kiyā bhī hai, ḳhwāh janglī jānwar hoṅ yā parinde, reṅgne wāle hoṅ yā samundarī jānwar.

⁸lekin zabān par koī qābū nahīṅ pā saktā, is betāb aur sharīr chīz par jo mohlak zahr se labālab bharī hai.

⁹zabān se ham apne ḳhudāwand aur bāp kī satāish bhī karte haiṅ aur dūsroṅ par lānat bhī bhejte haiṅ, jinheṅ allāh kī sūrat par banāyā gayā hai.

¹⁰ek hī muṅh se satāish aur lānat nikaltī hai. mere bhāiyo, aisā nahīṅ honā chāhie.

¹¹yih kaise ho saktā hai ki ek hī chashme se mīṭhā aur kaṛwā pānī phūṭ nikle.

¹²mere bhāiyo, kyā anjīr ke daraḳht par zaitūn lag sakte haiṅ yā angūr kī bel par anjīr? hargiz nahīṅ! isī tarah namkīn chashme se mīṭhā pānī nahīṅ nikal saktā.

¹³kyā āp meṅ se koī dānā aur samajhdār hai? wuh yih bāt apne achchhe chāl-chalan se zāhir kare, hikmat se paidā hone wālī halīmī ke nek kāmoṅ se.

¹⁴lekin ḳhabardār! agar āp dil meṅ hasad kī kaṛwāhaṭ aur ḳhudġharzī pāl rahe haiṅ to is par sheḳhī mat mārnā, na sachchāī ke ḳhilāf jhūṭ boleṅ.

¹⁵aisā faḳhr āsmān kī taraf se nahīṅ hai, balki dunyāwī, ġhairrūhānī aur iblīs se hai.

¹⁶kyūṅki jahāṅ hasad aur ḳhudġharzī hai wahāṅ fasād aur har sharīr kām pāyā jātā hai.

¹⁷āsmān kī hikmat farq hai. awwal to wuh pāk aur muqaddas hai. nīz wuh amnpasand, narmdil, farmāṅbardār, rahm aur achchhe phal se bharī huī, ġhairjānibdār aur ḳhulūsdil hai.

¹⁸aur jo sulah karāte haiṅ un ke lie rāstbāzī kā phal salāmatī se boyā jātā hai.