Read Roman Urdu Geo yāqūb 4 Bible Online

yāqūb 4 - Roman Urdu Geo bible

yāqūb 4

¹yih laṛāiyāṅ aur jhagaṛe jo āp ke darmiyān haiṅ kahāṅ se āte haiṅ? kyā in kā sarchashmā wuh burī ḳhwāhishāt nahīṅ jo āp ke āzā meṅ laṛtī rahtī haiṅ?

²āp kisī chīz kī ḳhwāhish rakhte haiṅ, lekin use hāsil nahīṅ kar sakte. āp qatl aur hasad karte haiṅ, lekin jo kuchh āp chāhte haiṅ wuh pā nahīṅ sakte. āp jhagaṛte aur laṛte haiṅ. to bhī āp ke pās kuchh nahīṅ hai, kyūṅki āp allāh se māṅgte nahīṅ.

³aur jab āp māṅgte haiṅ to āp ko kuchh nahīṅ miltā. wajah yih hai ki āp ġhalat nīyat se māṅgte haiṅ. āp is se apnī ḳhudġharz ḳhwāhishāt pūrī karnā chāhte haiṅ.

⁴bewafā logo! kyā āp ko nahīṅ mālūm ki duniyā kā dost allāh kā dushman hotā hai? jo duniyā kā dost bananā chāhtā hai wuh allāh kā dushman ban jātā hai.

⁵yā kyā āp samajhte haiṅ ki kalām-e-muqaddas kī yih bāt betukī sī hai ki allāh ġhairat se us rūh kā ārzūmand hai jis ko us ne hamāre andar sukūnat karne diyā?

⁶lekin wuh hameṅ is se kahīṅ zyādā fazl baḳhshtā hai. kalām-e-muqaddas yūṅ farmātā hai, “allāh maġhrūroṅ kā muqābalā kartā lekin farotanoṅ par mehrbānī kartā hai.”

⁷ġharz, allāh ke tābe ho jāeṅ. iblīs kā muqābalā kareṅ to wuh bhāg jāegā.

⁸allāh ke qarīb ā jāeṅ to wuh āp ke qarīb āegā. gunāhgāro, apne hāthoṅ ko pāk-sāf kareṅ. dodilo, apne diloṅ ko maḳhsūs-o-muqaddas kareṅ.

⁹afsos kareṅ, mātam kareṅ, ḳhūb roeṅ. āp kī haṅsī mātam meṅ badal jāe aur āp kī ḳhushī māyūsī meṅ.

¹⁰apne āp ko ḳhudāwand ke sāmne nīchā kareṅ to wuh āp ko sarfarāz karegā.

¹¹bhāiyo, ek dūsre par tohmat mat lagānā. jo apne bhāī par tohmat lagātā yā use mujrim ṭhahrātā hai wuh sharīat par tohmat lagātā hai aur sharīat ko mujrim ṭhahrātā hai. aur jab āp sharīat par tohmat lagāte haiṅ to āp us ke pairokār nahīṅ rahte balki us ke munsif ban gae haiṅ.

¹²sharīat dene wālā aur munsif sirf ek hī hai aur wuh hai allāh jo najāt dene aur halāk karne ke qābil hai. to phir āp kaun haiṅ jo apne āp ko munsif samajh kar apne paṛosī ko mujrim ṭhahrā rahe haiṅ!

¹³aur ab merī bāt suneṅ, āp jo kahte haiṅ, “āj yā kal ham fulāṅ fulāṅ shahr meṅ jāeṅge. wahāṅ ham ek sāl ṭhahar kar kārobār karke paise kamāeṅge.”

¹⁴dekheṅ, āp yih bhī nahīṅ jānte ki kal kyā hogā. āp kī zindagī chīz hī kiyā hai! āp bhāp hī haiṅ jo thoṛī der ke lie nazar ātī, phir ġhāib ho jātī hai.

¹⁵balki āp ko yih kahnā chāhie, “agar ḳhudāwand kī marzī huī to ham jieṅge aur yih yā wuh kareṅge.”

¹⁶lekin filhāl āp sheḳhī mār kar apne ġhurūr kā izhār karte haiṅ. is qism kī tamām sheḳhībāzī burī hai.

¹⁷chunāṅche jo jāntā hai ki use kyā kyā nek kām karnā hai, lekin phir bhī kuchh nahīṅ kartā wuh gunāh kartā hai.