Read Roman Urdu Geo yāqūb 5 Bible Online

yāqūb 5 - Roman Urdu Geo bible

yāqūb 5

¹daulatmando, ab merī bāt suneṅ! ḳhūb roeṅ aur giryā-o-zārī kareṅ, kyūṅki āp par musībat āne wālī hai.

²āp kī daulat saṛ gaī hai aur kīṛe āp ke shāndār kapṛe khā gae haiṅ.

³āp ke sone aur chāṅdī ko zang lag gayā hai. aur un kī zangālūdā hālat āp ke ḳhilāf gawāhī degī aur āp ke jismoṅ ko āg kī tarah khā jāegī. kyūṅki āp ne in āḳhirī dinoṅ meṅ apne lie ḳhazāne jamā kar lie haiṅ.

⁴dekheṅ, jo mazdūrī āp ne fasal kī kaṭāī karne wāloṅ se bāz rakhī hai wuh āp ke ḳhilāf chillā rahī hai. aur āp kī fasal jamā karne wāloṅ kī chīḳheṅ āsmānī lashkaroṅ ke rab ke kānoṅ tak pahuṅch gaī haiṅ.

⁵āp ne duniyā meṅ ayyāshī aur aish-o-ishrat kī zindagī guzārī hai. zabah ke din āp ne apne āp ko moṭā-tāzā kar diyā hai.

⁶āp ne rāstbāz ko mujrim ṭhahrā kar qatl kiyā hai, aur us ne āp kā muqābalā nahīṅ kiyā.

⁷bhāiyo, ab sabar se ḳhudāwand kī āmad ke intizār meṅ raheṅ. kisān par ġhaur kareṅ jo is intizār meṅ rahtā hai ki zamīn apnī qīmtī fasal paidā kare. wuh kitne sabar se ḳharīf aur bahār kī bārishoṅ kā intizār kartā hai!

⁸āp bhī sabar kareṅ aur apne diloṅ ko mazbūt rakheṅ, kyūṅki ḳhudāwand kī āmad qarīb ā gaī hai.

⁹bhāiyo, ek dūsre par mat buṛbuṛānā, warnā āp kī adālat kī jāegī. munsif to darwāze par khaṛā hai.

¹⁰bhāiyo, un nabiyoṅ ke namūne par chaleṅ jinhoṅ ne rab ke nām meṅ kalām pesh karke sabar se dukh uṭhāyā.

¹¹dekheṅ, ham unheṅ mubārak kahte haiṅ jo sabar se dukh bardāsht karte the. āp ne ayyūb kī sābitqadmī ke bāre meṅ sunā hai aur yih bhī dekh liyā ki rab ne āḳhir meṅ kyā kuchh kiyā, kyūṅki rab bahut mehrbān aur rahīm hai.

¹²mere bhāiyo, sab se baṛh kar yih ki āp qasam na khāeṅ, na āsmān kī qasam, na zamīn kī, na kisī aur chīz kī. jab āp “hāṅ” kahnā chāhte haiṅ to bas “hāṅ” hī kāfī hai. aur agar inkār karnā chāheṅ to bas “nahīṅ” kahnā kāfī hai, warnā āp mujrim ṭhahreṅge.

¹³kyā āp meṅ se koī musībat meṅ phaṅsā huā hai? wuh duā kare. kyā koī ḳhush hai? wuh satāish ke gīt gāe.

¹⁴kyā āp meṅ se koī bīmār hai? wuh jamā'at ke buzurgoṅ ko bulāe tāki wuh ā kar us ke lie duā kareṅ aur ḳhudāwand ke nām meṅ us par tel maleṅ.

¹⁵phir īmān se kī gaī duā marīz ko bachāegī aur ḳhudāwand use uṭhā khaṛā karegā. aur agar us ne gunāh kiyā ho to use muāf kiyā jāegā.

¹⁶chunāṅche ek dūsre ke sāmne apne gunāhoṅ kā iqrār kareṅ aur ek dūsre ke lie duā kareṅ tāki āp shifā pāeṅ. rāst shaḳhs kī muassir duā se bahut kuchh ho saktā hai.

¹⁷ilyās ham jaisā insān thā. lekin jab us ne zor se duā kī ki bārish na ho to sāṛhe tīn sāl tak bārish na huī.

¹⁸phir us ne dubārā duā kī to āsmān ne bārish atā kī aur zamīn ne apnī fasleṅ paidā kīṅ.

¹⁹mere bhāiyo, agar āp meṅ se koī sachchāī se bhaṭak jāe aur koī use sahīh rāh par wāpas lāe

²⁰to yaqīn jāneṅ, jo kisī gunāhgār ko us kī ġhalat rāh se wāpas lātā hai wuh us kī jān ko maut se bachāegā aur gunāhoṅ kī baṛī tādād ko chhupā degā.