Read Roman Urdu Geo 1-patras 3 Bible Online

1-patras 3 - Roman Urdu Geo bible

1-patras 3

¹isī tarah āp bīwiyoṅ ko bhī apne apne shauhar ke tābe rahnā hai. kyūṅki is tarah wuh jo īmān nahīṅ rakhte apnī bīwī ke chāl-chalan se jīte jā sakte haiṅ. kuchh kahne kī zarūrat nahīṅ rahegī

²kyūṅki wuh dekheṅge ki āp kitnī pākīzagī se ḳhudā ke ḳhauf meṅ zindagī guzārtī haiṅ.

³is kī fikr mat karnā ki āp zāhirī taur par ārāstā hoṅ, masalan khās taur-tarīqoṅ se gundhe hue bāloṅ se yā sone ke zewar aur shāndār libās pahnane se.

⁴is ke bajāe is kī fikr kareṅ ki āp kī bātinī shaḳhsiyat ārāstā ho. kyūṅki jo rūh narmdilī aur sukūn ke lāfānī zewaroṅ se sajī huī hai wuhī allāh ke nazdīk beshqīmat hai.

⁵māzī meṅ allāh par ummīd rakhne wālī muqaddas ḳhawātīn bhī isī tarah apnā singār kiyā kartī thīṅ. yūṅ wuh apne shauharoṅ ke tābe rahīṅ,

⁶sārā kī tarah jo apne shauhar ibrāhīm ko āqā kah kar us kī māntī thī. āp to sārā kī beṭiyāṅ ban gaī haiṅ. chunāṅche nek kām kareṅ aur kisī bhī chīz se na ḍareṅ, ḳhwāh wuh kitnī hī ḍarāunī kyūṅ na ho.

⁷is tarah lāzim hai ki āp jo shauhar haiṅ samajh ke sāth apnī bīwiyoṅ ke sāth zindagī guzāreṅ, yih jān kar ki yih āp kī nisbat kamzor haiṅ. un kī izzat kareṅ, kyūṅki yih bhī āp ke sāth zindagī ke fazl kī wāris haiṅ. aisā na ho ki is meṅ beparwāī karne se āp kī duāiyā zindagī meṅ rukāwaṭ paidā ho jāe.

⁸āḳhir meṅ ek aur bāt, āp sab ek hī soch rakheṅ aur ek dūsre se tālluqāt meṅ hamdardī, pyār, rahm aur halīmī kā izhār kareṅ.

⁹kisī ke ġhalat kām ke jawāb meṅ ġhalat kām mat karnā, na kisī kī gāliyoṅ ke jawāb meṅ gālī denā. is ke bajāe jawāb meṅ aise shaḳhs ko barkat deṅ, kyūṅki allāh ne āp ko bhī is lie bulāyā hai ki āp us kī barkat wirāsat meṅ pāeṅ.

¹⁰kalām-e-muqaddas yūṅ farmātā hai, “kaun maze se zindagī guzārnā aur achchhe din deḳhnā chāhtā hai? wuh apnī zabān ko sharīr bāteṅ karne se roke aur apne hoṅṭoṅ ko jhūṭ bolne se.

¹¹wuh burāī se muṅh pher kar nek kām kare, sulah-salāmatī kā tālib ho kar us ke pīchhe lagā rahe.

¹²kyūṅki rab kī āṅkheṅ rāstbāzoṅ par lagī rahtī haiṅ, aur us ke kān un kī duāoṅ kī taraf māil haiṅ. lekin rab kā chehrā un ke ḳhilāf hai jo ġhalat kām karte haiṅ.”

¹³agar āp nek kām karne meṅ sargarm hoṅ to kaun āp ko nuqsān pahuṅchāegā?

¹⁴lekin agar āp ko rāst kām karne kī wajah se dukh bhī uṭhānā paṛe to āp mubārak haiṅ. un kī dhamkiyoṅ se mat ḍarnā aur mat ghabrānā

¹⁵balki apne diloṅ meṅ ḳhudāwand masīh ko maḳhsūs-o-muqaddas jāneṅ. aur jo bhī āp se āp kī masīh par ummīd ke bāre meṅ pūchhe har waqt use jawāb dene ke lie tayyār raheṅ. lekin narmdilī se aur ḳhudā ke ḳhauf ke sāth jawāb deṅ.

¹⁶sāth sāth āp kā zamīr sāf ho. phir jo log āp ke masīh meṅ achchhe chāl-chalan ke bāre meṅ ġhalat bāteṅ kar rahe haiṅ unheṅ apnī tohmat par sharm āegī.

¹⁷yād rahe ki ġhalat kām karne kī wajah se dukh sahne kī nisbat behtar yih hai ki ham nek kām karne kī wajah se taqlīf uṭhāeṅ, basharteki yih allāh kī marzī ho.

¹⁸kyūṅki masīh ne hamāre gunāhoṅ ko miṭāne kī ḳhātir ek bār sadā ke lie maut sahī. hāṅ, jo rāstbāz hai us ne yih nārāstoṅ ke lie kiyā tāki āp ko allāh ke pās pahuṅchāe. use badan ke etibār se sazā-e-maut dī gaī, lekin rūh ke etibār se use zindā kar diyā gayā.

¹⁹is rūh ke zarī'e us ne jā kar qaidī rūhoṅ ko paiġhām diyā.

²⁰yih un kī rūh thīṅ jo un dinoṅ meṅ nāfarmān the jab nūh apnī kashtī banā rahā thā. us waqt allāh sabar se intizār kartā rahā, lekin āḳhirkār sirf chand ek log yānī āṭh afrād pānī meṅ se guzar kar bach nikle.

²¹yih pānī us baptisme kī taraf ishārā hai jo is waqt āp ko najāt dilātā hai. is se jism kī gandagī dūr nahīṅ kī jātī balki baptismā lete waqt ham allāh se arz karte haiṅ ki wuh hamārā zamīr pāk-sāf kar de. phir yih āp ko īsā masīh ke jī uṭhne se najāt dilātā hai.

²²ab masīh āsmān par jā kar allāh ke dahne hāth baiṭh gayā hai jahāṅ farishte, iḳhtiyār wāle aur quwwateṅ us ke tābe haiṅ.