Read Roman Urdu Geo 1-patras 4 Bible Online

1-patras 4 - Roman Urdu Geo bible

1-patras 4

¹ab chūṅki masīh ne jismānī taur par dukh uṭhāyā is lie āp bhī apne āp ko us kī sī soch se les kareṅ. kyūṅki jis ne masīh kī ḳhātir jismānī taur par dukh sah liyā hai us ne gunāh se nipaṭ liyā hai.

²natīje meṅ wuh zamīn par apnī bāqī zindagī insān kī burī ḳhwāhishāt pūrī karne meṅ nahīṅ guzāregā balki allāh kī marzī pūrī karne meṅ.

³māzī meṅ āp ne kāfī waqt wuh kuchh karne meṅ guzārā jo ġhairīmāndār pasand karte haiṅ yānī ayyāshī, shahwatparastī, nashābāzī, sharābnoshī, rangraliyoṅ, nāch-rang aur ghinaunī butparastī meṅ.

⁴ab āp ke ġhairīmāndār dost tājjub karte haiṅ ki āp un ke sāth mil kar ayyāshī ke is tez dhāre meṅ chhalāṅg nahīṅ lagāte. is lie wuh āp par kufr bakte haiṅ.

⁵lekin unheṅ allāh ko jawāb denā paṛegā jo zindoṅ aur murdoṅ kī adālat karne ke lie tayyār khaṛā hai.

⁶yihī wajah hai ki allāh kī ḳhushḳhabrī unheṅ bhī sunāī gaī jo ab murdā haiṅ. maqsad yih thā ki wuh allāh ke sāmne rūh meṅ zindagī guzār sakeṅ agarche insānī lihāz se un ke jism kī adālat kī gaī hai.

⁷tamām chīzoṅ kā ḳhātmā qarīb ā gayā hai. chunāṅche duā karne ke lie chust aur hoshmand raheṅ.

⁸sab se zarūrī bāt yih hai ki āp ek dūsre se lagātār muhabbat rakheṅ, kyūṅki muhabbat gunāhoṅ kī baṛī tādād par pardā ḍāl detī hai.

⁹buṛbuṛāe baġhair ek dūsre kī mehmān-nawāzī kareṅ.

¹⁰allāh apnā fazl muḳhtalif nematoṅ se zāhir kartā hai. fazl kā yih intizām wafādārī se chalāte hue ek dūsre kī ḳhidmat kareṅ, har ek us nemat se jo use milī hai.

¹¹agar koī bole to allāh ke se alfāz ke sāth bole. agar koī ḳhidmat kare to us tāqat ke zarī'e jo allāh use muhayyā kartā hai, kyūṅki is tarah hī allāh ko īsā masīh ke wasīle se jalāl diyā jāegā. azal se abad tak jalāl aur qudrat usī kī ho! āmīn.

¹²azīzo, īzārasānī kī us āg par tājjub na kareṅ jo āp ko āzmāne ke lie āp par ān paṛī hai. yih mat sochnā ki mere sāth kaisī ġhairmāmūlī bāt ho rahī hai.

¹³balki ḳhushī manāeṅ ki āp masīh ke dukhoṅ meṅ sharīk ho rahe haiṅ. kyūṅki phir āp us waqt bhī ḳhushī manāeṅge jab masīh kā jalāl zāhir hogā.

¹⁴agar log is lie āp kī be'izzatī karte haiṅ ki āp masīh ke pairokār haiṅ to āp mubārak haiṅ. kyūṅki is kā matlab hai ki allāh kā jalālī rūh āp par ṭhahrā huā hai.

¹⁵agar āp meṅ se kisī ko dukh uṭhānā paṛe to yih is lie nahīṅ honā chāhie ki āp qātil, chor, mujrim yā fasādī haiṅ.

¹⁶lekin agar āp ko masīh ke pairokār hone kī wajah se dukh uṭhānā paṛe to na sharmāeṅ balki masīh ke nām meṅ allāh kī hamd-o-sanā kareṅ.

¹⁷kyūṅki ab waqt ā gayā hai ki allāh kī adālat shurū ho jāe, aur pahle us ke ghar wāloṅ kī adālat kī jāegī. agar aisā hai to phir is kā anjām un ke lie kyā hogā jo allāh kī ḳhushḳhabrī ke tābe nahīṅ haiṅ?

¹⁸aur agar rāstbāz mushkil se bacheṅge to phir bedīn aur gunāhgār kā kyā hogā?

¹⁹chunāṅche jo allāh kī marzī se dukh uṭhā rahe haiṅ wuh nek kām karne se bāz na āeṅ balki apnī jānoṅ ko usī ke hawāle kareṅ jo un kā wafādār ḳhāliq hai.