Read Roman Urdu Geo 1-patras 5 Bible Online

1-patras 5 - Roman Urdu Geo bible

1-patras 5

¹ab maiṅ āp ko jo jamā'atoṅ ke buzurg haiṅ nasīhat karnā chāhtā hūṅ. maiṅ ḳhud bhī buzurg hūṅ balki masīh ke dukhoṅ kā gawāh bhī hūṅ, aur maiṅ āp ke sāth us āne wāle jalāl meṅ sharīk ho jāūṅgā jo zāhir ho jāegā. is haisiyat se maiṅ āp se apīl kartā hūṅ,

²gallābān hote hue allāh ke us galle kī dekh-bhāl kareṅ jo āp ke sapurd kiyā gayā hai. yih ḳhidmat majbūran na kareṅ balki ḳhushī se, kyūṅki yih allāh kī marzī hai. lālach ke baġhair pūrī lagan se yih ḳhidmat saranjām deṅ.

³jinheṅ āp ke sapurd kiyā gayā hai un par hukūmat mat karnā balki galle ke lie achchhā namūnā baneṅ.

⁴phir jab hamārā sardār gallābān zāhir hogā to āp ko jalāl kā ġhairfānī tāj milegā.

⁵isī tarah lāzim hai ki āp jo jawān haiṅ buzurgoṅ ke tābe raheṅ. sab inkisārī kā libās pahan kar ek dūsre kī ḳhidmat kareṅ, kyūṅki allāh maġhrūroṅ kā muqābalā kartā lekin farotanoṅ par mehrbānī kartā hai.

⁶chunāṅche allāh ke qādir hāth ke nīche jhuk jāeṅ tāki wuh mauzūṅ waqt par āp ko sarfarāz kare.

⁷apnī tamām pareshāniyāṅ us par ḍāl deṅ, kyūṅki wuh āp kī fikr kartā hai.

⁸hoshmand raheṅ, jāgte raheṅ. āp kā dushman iblīs garajte hue sherbabar kī tarah ghūmtā phirtā aur kisī ko haṛap kar lene kī talāsh meṅ rahtā hai.

⁹īmān meṅ mazbūt rah kar us kā muqābalā kareṅ. āp ko to mālūm hai ki pūrī duniyā meṅ āp ke bhāī isī qism kā dukh uṭhā rahe haiṅ.

¹⁰lekin āp ko zyādā der ke lie dukh uṭhānā nahīṅ paṛegā. kyūṅki har tarah ke fazl kā ḳhudā jis ne āp ko masīh meṅ apne abadī jalāl meṅ sharīk hone ke lie bulāyā hai wuh ḳhud āp ko kāmiliyat tak pahuṅchāegā, mazbūt banāegā, taqwiyat degā aur ek ṭhos bunyād par khaṛā karegā.

¹¹abad tak qudrat usī ko hāsil rahe. āmīn.

¹²maiṅ āp ko yih muḳhtasar ḳhat silwānus kī madad se likh rahā hūṅ jise maiṅ wafādār bhāī samajhtā hūṅ. maiṅ is se āp kī hauslā-afzāī aur is kī tasdīq karnā chāhtā hūṅ ki yihī allāh kā haqīqī fazl hai. is par qāim raheṅ.

¹³bābal meṅ jo jamā'at allāh ne āp kī tarah chunī hai wuh āp ko salām kahtī hai, aur isī tarah merā beṭā marqus bhī.

¹⁴ek dūsre ko muhabbat kā bosā denā. āp sab kī jo masīh meṅ haiṅ salāmatī ho.