Read Roman Urdu Geo 1-yūhannā 2 Bible Online

1-yūhannā 2 - Roman Urdu Geo bible

1-yūhannā 2

¹mere bachcho, maiṅ āp ko yih is lie likh rahā hūṅ ki āp gunāh na kareṅ. lekin agar koī gunāh kare to ek hai jo ḳhudā bāp ke sāmne hamārī shafā'at kartā hai, īsā masīh jo rāst hai.

²wuhī hamāre gunāhoṅ kā kaffārā dene wālī qurbānī hai, aur na sirf hamāre gunāhoṅ kā balki pūrī duniyā ke gunāhoṅ kā bhī.

³is se hameṅ patā chaltā hai ki ham ne use jān liyā hai, jab ham us ke ahkām par amal karte haiṅ.

⁴jo kahtā hai, “maiṅ use jāntā hūṅ” lekin us ke ahkām par amal nahīṅ kartā wuh jhūṭā hai aur sachchāī us meṅ nahīṅ hai.

⁵lekin jo us ke kalām kī pairawī kartā hai us meṅ allāh kī muhabbat haqīqatan takmīl tak pahuṅch gaī hai. is se hameṅ patā chaltā hai ki ham us meṅ haiṅ.

⁶jo kahtā hai ki wuh us meṅ qāim hai us ke lie lāzim hai ki wuh yūṅ chale jis tarah īsā chaltā thā.

⁷azīzo, maiṅ āp ko koī nayā hukm nahīṅ likh rahā, balki wuhī purānā hukm jo āp ko shurū se milā hai. yih purānā hukm wuhī paiġhām hai jo āp ne sun liyā hai.

⁸lekin dūsrī taraf se yih hukm nayā bhī hai, aur is kī sachchāī masīh aur āp meṅ zāhir huī hai. kyūṅki tārīkī ḳhatm hone wālī hai aur haqīqī raushnī chamakne lag gaī hai.

⁹jo nūr meṅ hone kā dāwā karke apne bhāī se nafrat kartā hai wuh ab tak tārīkī meṅ hai.

¹⁰jo apne bhāī se muhabbat rakhtā hai wuh nūr meṅ rahtā hai aur us meṅ koī bhī chīz nahīṅ pāī jātī jo ṭhokar kā bāis ban sake.

¹¹lekin jo apne bhāī se nafrat kartā hai wuh tārīkī hī meṅ hai aur andhere meṅ chaltā phirtā hai. us ko yih nahīṅ mālūm ki wuh kahāṅ jā rahā hai, kyūṅki tārīkī ne use andhā kar rakhā hai.

¹²pyāre bachcho, maiṅ āp ko is lie likh rahā hūṅ ki āp ke gunāhoṅ ko us ke nām kī ḳhātir muāf kar diyā gayā hai.

¹³wālido, maiṅ āp ko is lie likh rahā hūṅ ki āp ne use jān liyā hai jo ibtidā hī se hai. jawān mardo, maiṅ āp ko is lie likh rahā hūṅ ki āp iblīs par ġhālib ā gae haiṅ. bachcho, maiṅ āp ko is lie likh rahā hūṅ ki āp ne bāp ko jān liyā hai.

¹⁴wālido, maiṅ āp ko is lie likh rahā hūṅ ki āp ne use jān liyā hai jo ibtidā hī se hai. jawān mardo, maiṅ āp ko is lie likh rahā hūṅ ki āp mazbūt haiṅ. allāh kā kalām āp meṅ bastā hai aur āp iblīs par ġhālib ā gae haiṅ.

¹⁵duniyā ko pyār mat karnā, na kisī chīz ko jo duniyā meṅ hai. agar koī duniyā ko pyār kare to ḳhudā bāp kī muhabbat us meṅ nahīṅ hai.

¹⁶kyūṅki jo bhī chīz duniyā meṅ hai wuh bāp kī taraf se nahīṅ balki duniyā kī taraf se hai, ḳhwāh wuh jism kī burī ḳhwāhishāt, āṅkhoṅ kā lālach yā apnī milkiyat par faḳhr ho.

¹⁷duniyā aur us kī wuh chīzeṅ jo insān chāhtā hai ḳhatm ho rahī haiṅ, lekin jo allāh kī marzī pūrī kartā hai wuh abad tak jītā rahegā.

¹⁸bachcho, ab āḳhirī ghaṛī ā pahuṅchī hai. āp ne ḳhud sun liyā hai ki muḳhālif-e-masīh ā rahā hai, aur haqīqatan bahut se aise muḳhālif-e-masīh ā chuke haiṅ. is se hameṅ patā chaltā hai ki āḳhirī ghaṛī ā gaī hai.

¹⁹yih log ham meṅ se nikle to haiṅ, lekin haqīqat meṅ ham meṅ se nahīṅ the. kyūṅki agar wuh ham meṅ se hote to wuh hamāre sāth hī rahte. lekin hameṅ chhoṛne se zāhir huā ki sab ham meṅ se nahīṅ haiṅ.

²⁰lekin āp farq haiṅ. āp ko us se jo quddūs hai rūh kā masah mil gayā hai, aur āp pūrī sachchāī ko jānte haiṅ.

²¹maiṅ āp ko is lie nahīṅ likh rahā ki āp sachchāī ko nahīṅ jānte balki is lie ki āp sachchāī jānte haiṅ aur ki koī bhī jhūṭ sachchāī kī taraf se nahīṅ ā saktā.

²²kaun jhūṭā hai? wuh jo īsā ke masīh hone kā inkār kartā hai. muḳhālif-e-masīh aisā shaḳhs hai. wuh bāp aur farzand kā inkār kartā hai.

²³jo farzand kā inkār kartā hai us ke pās bāp bhī nahīṅ hai, aur jo farzand kā iqrār kartā hai us ke pās bāp bhī hai.

²⁴chunāṅche lāzim hai ki jo kuchh āp ne ibtidā se sunā wuh āp meṅ rahe. agar wuh āp meṅ rahe to āp bhī farzand aur bāp meṅ raheṅge.

²⁵aur jo wādā us ne ham se kiyā hai wuh hai abadī zindagī.

²⁶maiṅ āp ko yih un ke bāre meṅ likh rahā hūṅ jo āp ko sahīh rāh se haṭāne kī koshish kar rahe haiṅ.

²⁷lekin āp ko us se rūh kā masah mil gayā hai. wuh āp ke andar bastā hai, is lie āp ko is kī zarūrat hī nahīṅ ki koī āp ko tālīm de. kyūṅki masīh kā rūh āp ko sab bātoṅ ke bāre meṅ tālīm detā hai aur jo kuchh bhī wuh sikhātā hai wuh sach hai, jhūṭ nahīṅ. chunāṅche jis tarah us ne āp ko tālīm dī hai, usī tarah masīh meṅ raheṅ.

²⁸aur ab pyāre bachcho, us meṅ qāim raheṅ tāki us ke zāhir hone par ham pūre etimād ke sāth us ke sāmne khaṛe ho sakeṅ aur us kī āmad par sharmindā na honā paṛe.

²⁹agar āp jānte haiṅ ki masīh rāstbāz hai to āp yih bhī jānte haiṅ ki jo bhī rāst kām kartā hai wuh allāh se paidā ho kar us kā farzand ban gayā hai.