Read Roman Urdu Geo 1-yūhannā 3 Bible Online

1-yūhannā 3 - Roman Urdu Geo bible

1-yūhannā 3

¹dhyān deṅ ki bāp ne ham se kitnī muhabbat kī hai, yahāṅ tak ki ham allāh ke farzand kahlāte haiṅ. aur ham wāqaī haiṅ bhī. is lie duniyā hameṅ nahīṅ jāntī. wuh to use bhī nahīṅ jāntī.

²azīzo, ab ham allāh ke farzand haiṅ, aur jo kuchh ham hoṅge wuh abhī tak zāhir nahīṅ huā hai. lekin itnā ham jānte haiṅ ki jab wuh zāhir ho jāegā to ham us kī mānind hoṅge. kyūṅki ham us kā mushāhadā waise hī kareṅge jaisā wuh hai.

³jo bhī masīh meṅ yih ummīd rakhtā hai wuh apne āp ko pāk-sāf rakhtā hai, waise hī jaisā masīh ḳhud hai.

⁴jo gunāh kartā hai wuh sharīat kī ḳhilāfwarzī kartā hai. hāṅ, gunāh sharīat kī ḳhilāfwarzī hī hai.

⁵lekin āp jānte haiṅ ki īsā hamāre gunāhoṅ ko uṭhā le jāne ke lie zāhir huā. aur us meṅ gunāh nahīṅ hai.

⁶jo us meṅ qāim rahtā hai wuh gunāh nahīṅ kartā. aur jo gunāh kartā rahtā hai na to us ne use dekhā hai, na use jānā hai.

⁷pyāre bachcho, kisī ko ijāzat na deṅ ki wuh āp ko sahīh rāh se haṭā de. jo rāst kām kartā hai wuh rāstbāz, hāṅ masīh jaisā rāstbāz hai.

⁸jo gunāh kartā hai wuh iblīs se hai, kyūṅki iblīs shurū hī se gunāh kartā āyā hai. allāh kā farzand isī lie zāhir huā ki iblīs kā kām tabāh kare.

⁹jo bhī allāh se paidā ho kar us kā farzand ban gayā hai wuh gunāh nahīṅ karegā, kyūṅki allāh kī fitrat us meṅ rahtī hai. wuh gunāh kar hī nahīṅ saktā kyūṅki wuh allāh se paidā ho kar us kā farzand ban gayā hai.

¹⁰is se patā chaltā hai ki allāh ke farzand kaun haiṅ aur iblīs ke farzand kaun: jo rāst kām nahīṅ kartā, na apne bhāī se muhabbat rakhtā hai, wuh allāh kā farzand nahīṅ hai.

¹¹kyūṅki yihī wuh paiġhām hai jo āp ne shurū se sun rakhā hai, ki hameṅ ek dūsre se muhabbat rakhnā hai.

¹²qābīl kī tarah na hoṅ, jo iblīs kā thā aur jis ne apne bhāī ko qatl kiyā. aur us ne us ko qatl kyūṅ kiyā? is lie ki us kā kām burā thā jabki bhāī kā kām rāst thā.

¹³chunāṅche bhāiyo, jab duniyā āp se nafrat kartī hai to hairān na ho jāeṅ.

¹⁴ham to jānte haiṅ ki ham maut se nikal kar zindagī meṅ dāḳhil ho gae haiṅ. ham yih is lie jānte haiṅ ki ham apne bhāiyoṅ se muhabbat rakhte haiṅ. jo muhabbat nahīṅ rakhtā wuh ab tak maut kī hālat meṅ hai.

¹⁵jo bhī apne bhāī se nafrat rakhtā hai wuh qātil hai. aur āp jānte haiṅ ki jo qātil hai us meṅ abadī zindagī nahīṅ rahtī.

¹⁶is se hī ham ne muhabbat ko jānā hai ki masīh ne hamārī ḳhātir apnī jān de dī. aur hamārā bhī farz yihī hai ki apne bhāiyoṅ kī ḳhātir apnī jān deṅ.

¹⁷agar kisī ke mālī hālāt ṭhīk hoṅ aur wuh apne bhāī kī zarūratmand hālat ko dekh kar rahm na kare to us meṅ allāh kī muhabbat kis tarah qāim rah saktī hai?

¹⁸pyāre bachcho, āeṅ ham alfāz aur bātoṅ se muhabbat kā izhār na kareṅ balki hamārī muhabbat amlī aur haqīqī ho.

¹⁹ġharz is se ham jān lete haiṅ ki ham sachchāī kī taraf se haiṅ, aur yūṅ hī ham apne dil ko tasallī de sakte haiṅ

²⁰jab wuh hameṅ mujrim ṭhahrātā hai. kyūṅki allāh hamāre dil se baṛā hai aur sab kuchh jāntā hai.

²¹aur azīzo, jab hamārā dil hameṅ mujrim nahīṅ ṭhahrātā to ham pūre etimād ke sāth allāh ke huzūr ā sakte haiṅ

²²aur wuh kuchh pāte haiṅ jo us se māṅgte haiṅ. kyūṅki ham us ke ahkām par chalte haiṅ aur wuhī kuchh karte haiṅ jo use pasand hai.

²³aur us kā yih hukm hai ki ham us ke farzand īsā masīh ke nām par īmān lā kar ek dūsre se muhabbat rakheṅ, jis tarah masīh ne hameṅ hukm diyā thā.

²⁴jo allāh ke ahkām ke tābe rahtā hai wuh allāh meṅ bastā hai aur allāh us meṅ. ham kis tarah jān lete haiṅ ki wuh ham meṅ bastā hai? us rūh ke wasīle se jo us ne hameṅ diyā hai.