Read Roman Urdu Geo 1-yūhannā 4 Bible Online

1-yūhannā 4 - Roman Urdu Geo bible

1-yūhannā 4

¹azīzo, har ek rūh kā yaqīn mat karnā balki rūhoṅ ko parakh kar mālūm kareṅ ki wuh allāh se haiṅ yā nahīṅ, kyūṅki muta'addid jhūṭe nabī duniyā meṅ nikle haiṅ.

²is se āp allāh ke rūh ko pahchān lete haiṅ: jo bhī rūh is kā etirāf kartī hai ki īsā masīh mujassam ho kar āyā hai wuh allāh se hai.

³lekin jo bhī rūh īsā ke bāre meṅ yih taslīm na kare wuh allāh se nahīṅ hai. yih muḳhālif-e-masīh kī rūh hai jis ke bāre meṅ āp ko ḳhabar milī ki wuh āne wālā hai balki is waqt duniyā meṅ ā chukā hai.

⁴lekin āp pyāre bachcho, allāh se haiṅ aur un par ġhālib ā gae haiṅ. kyūṅki jo āp meṅ hai wuh us se baṛā hai jo duniyā meṅ hai.

⁵yih log duniyā se haiṅ aur is lie duniyā kī bāteṅ karte haiṅ aur duniyā un kī suntī hai.

⁶ham to allāh se haiṅ aur jo allāh ko jāntā hai wuh hamārī suntā hai. lekin jo allāh se nahīṅ hai wuh hamārī nahīṅ suntā. yūṅ ham sachchāī kī rūh aur fareb dene wālī rūh meṅ imtiyāz kar sakte haiṅ.

⁷azīzo, āeṅ ham ek dūsre se muhabbat rakheṅ. kyūṅki muhabbat allāh kī taraf se hai, aur jo muhabbat rakhtā hai wuh allāh se paidā ho kar us kā farzand ban gayā hai aur allāh ko jāntā hai.

⁸jo muhabbat nahīṅ rakhtā wuh allāh ko nahīṅ jāntā, kyūṅki allāh muhabbat hai.

⁹is meṅ allāh kī muhabbat hamāre darmiyān zāhir huī ki us ne apne iklaute farzand ko duniyā meṅ bhej diyā tāki ham us ke zarī'e jieṅ.

¹⁰yihī muhabbat hai, yih nahīṅ ki ham ne allāh se muhabbat kī balki yih ki us ne ham se muhabbat karke apne farzand ko bhej diyā tāki wuh hamāre gunāhoṅ ko miṭāne ke lie kaffārā de.

¹¹azīzo, chūṅki allāh ne hameṅ itnā pyār kiyā is lie lāzim hai ki ham bhī ek dūsre ko pyār kareṅ.

¹²kisī ne bhī allāh ko nahīṅ dekhā. lekin jab ham ek dūsre ko pyār karte haiṅ to allāh hamāre andar bastā hai aur us kī muhabbat hamāre andar takmīl pātī hai.

¹³ham kis tarah jān lete haiṅ ki ham us meṅ rahte haiṅ aur wuh ham meṅ? is tarah ki us ne hameṅ apnā rūh baḳhsh diyā hai.

¹⁴aur ham ne yih bāt dekh lī aur is kī gawāhī dete haiṅ ki ḳhudā bāp ne apne farzand ko duniyā kā najātdahindā banane ke lie bhej diyā hai.

¹⁵agar koī iqrār kare ki īsā allāh kā farzand hai to allāh us meṅ rahtā hai aur wuh allāh meṅ.

¹⁶aur ḳhud ham ne wuh muhabbat jān lī hai aur us par īmān lāe haiṅ jo allāh ham se rakhtā hai. allāh muhabbat hī hai. jo bhī muhabbat meṅ qāim rahtā hai wuh allāh meṅ rahtā hai aur allāh us meṅ.

¹⁷isī tarah muhabbat hamāre darmiyān takmīl tak pahuṅchtī hai, aur yūṅ ham adālat ke din pūre etimād ke sāth khaṛe ho sakeṅge, kyūṅki jaise wuh hai waise hī ham bhī is duniyā meṅ haiṅ.

¹⁸muhabbat meṅ ḳhauf nahīṅ hotā balki kāmil muhabbat ḳhauf ko bhagā detī hai, kyūṅki ḳhauf ke pīchhe sazā kā ḍar hai. jo ḍartā hai us kī muhabbat takmīl tak nahīṅ pahuṅchī.

¹⁹ham is lie muhabbat rakhte haiṅ ki allāh ne pahle ham se muhabbat rakhī.

²⁰agar koī kahe, “maiṅ allāh se muhabbat rakhtā hūṅ” lekin apne bhāī se nafrat kare to wuh jhūṭā hai. kyūṅki jo apne bhāī se jise us ne dekhā hai muhabbat nahīṅ rakhtā wuh kis tarah allāh se muhabbat rakh saktā hai jise us ne nahīṅ dekhā?

²¹jo hukm masīh ne hameṅ diyā hai wuh yih hai, jo allāh se muhabbat rakhtā hai wuh apne bhāī se bhī muhabbat rakhe.