Read Roman Urdu Geo 1-yūhannā 5 Bible Online

1-yūhannā 5 - Roman Urdu Geo bible

1-yūhannā 5

¹jo bhī īmān rakhtā hai ki īsā hī masīh hai wuh allāh se paidā ho kar us kā farzand ban gayā hai. aur jo bāp se muhabbat rakhtā hai wuh us ke farzand se bhī muhabbat rakhtā hai.

²ham kis tarah jān lete haiṅ ki ham allāh ke farzand se muhabbat rakhte haiṅ? is se ki ham allāh se muhabbat rakhte aur us ke ahkām par amal karte haiṅ.

³kyūṅki allāh se muhabbat se murād yih hai ki ham us ke ahkām par amal kareṅ. aur us ke ahkām hamāre lie bojh kā bāis nahīṅ haiṅ,

⁴kyūṅki jo bhī allāh se paidā ho kar us kā farzand ban gayā hai wuh duniyā par ġhālib ā jātā hai. aur ham yih fath apne īmān ke zarī'e pāte haiṅ.

⁵kaun duniyā par ġhālib ā saktā hai? sirf wuh jo īmān rakhtā hai ki īsā allāh kā farzand hai.

⁶īsā masīh wuh hai jo apne baptisme ke pānī aur apnī maut ke ḳhūn ke zarī'e zāhir huā, na sirf pānī ke zarī'e balki pānī aur ḳhūn donoṅ hī ke zarī'e. aur rūh-ul-quds jo sachchāī hai is kī gawāhī detā hai.

⁷kyūṅki is ke tīn gawāh haiṅ,

⁸rūh-ul-quds, pānī aur ḳhūn. aur tīnoṅ ek hī bāt kī tasdīq karte haiṅ.

⁹ham to insān kī gawāhī qabūl karte haiṅ, lekin allāh kī gawāhī is se kahīṅ afzal hai. aur allāh kī gawāhī yih hai ki us ne apne farzand kī tasdīq kī hai.

¹⁰jo allāh ke farzand par īmān rakhtā hai us ke dil meṅ yih gawāhī hai. aur jo allāh par īmān nahīṅ rakhtā us ne use jhūṭā qarār diyā hai. kyūṅki us ne wuh gawāhī na mānī jo allāh ne apne farzand ke bāre meṅ dī.

¹¹aur gawāhī yih hai, allāh ne hameṅ abadī zindagī atā kī hai, aur yih zindagī us ke farzand meṅ hai.

¹²jis ke pās farzand hai us ke pās zindagī hai, aur jis ke pās allāh kā farzand nahīṅ hai us ke pās zindagī bhī nahīṅ hai.

¹³maiṅ āp ko jo allāh ke farzand ke nām par īmān rakhte haiṅ is lie likh rahā hūṅ ki āp jān leṅ ki āp ko abadī zindagī hāsil hai.

¹⁴hamārā allāh par yih etimād hai ki jab bhī ham us kī marzī ke mutābiq kuchh māṅgte haiṅ to wuh hamārī suntā hai.

¹⁵aur chūṅki ham jānte haiṅ ki jab māṅgte haiṅ to wuh hamārī suntā hai is lie ham yih ilm bhī rakhte haiṅ ki hameṅ wuh kuchh hāsil bhī hai jo ham ne us se māṅgā thā.

¹⁶agar koī apne bhāī ko aisā gunāh karte dekhe jis kā anjām maut na ho to wuh duā kare, aur allāh use zindagī atā karegā. maiṅ un gunāhoṅ kī bāt kar rahā hūṅ jin kā anjām maut nahīṅ. lekin ek aisā gunāh bhī hai jis kā anjām maut hai. maiṅ nahīṅ kah rahā ki aise shaḳhs ke lie duā kī jāe jis se aisā gunāh sarzad huā ho.

¹⁷har nārāst harkat gunāh hai, lekin har gunāh kā anjām maut nahīṅ hotā.

¹⁸ham jānte haiṅ ki jo allāh se paidā ho kar us kā farzand ban gayā hai wuh gunāh kartā nahīṅ rahtā, kyūṅki allāh kā farzand aise shaḳhs ko mahfūz rakhtā hai aur iblīs use nuqsān nahīṅ pahuṅchā saktā.

¹⁹ham jānte haiṅ ki ham allāh ke farzand haiṅ aur ki tamām duniyā iblīs ke qabze meṅ hai.

²⁰ham jānte haiṅ ki allāh kā farzand ā gayā hai aur hameṅ samajh atā kī hai tāki ham use jān leṅ jo haqīqī hai. aur ham us meṅ haiṅ jo haqīqī hai yānī us ke farzand īsā masīh meṅ. wuhī haqīqī ḳhudā aur abadī zindagī hai.

²¹pyāre bachcho, apne āp ko butoṅ se mahfūz rakheṅ!