Read Roman Urdu Geo quzāt 10 Bible Online

quzāt 10 - Roman Urdu Geo bible

quzāt 10

¹abīmalik kī maut ke bād tolā bin fuwwā bin dodo isrāīl ko bachāne ke lie uṭhā. wuh ishkār ke qabīle se thā aur ifrāīm ke pahāṛī ilāqe ke shahr samīr meṅ rihāishpazīr thā.

²tolā 23 sāl isrāīl kā qāzī rahā. phir wuh faut huā aur samīr meṅ dafnāyā gayā.

³us ke bād jiliād kā rahne wālā yāīr qāzī ban gayā. us ne 22 sāl isrāīl kī rāhnumāī kī.

⁴yāīr ke 30 beṭe the. har beṭe kā ek ek gadhā aur jiliād meṅ ek ek ābādī thī. āj tak in kā nām ‘hawwot-yāīr’ yānī yāīr kī bastiyāṅ hai.

⁵jab yāīr intiqāl kar gayā to use qāmon meṅ dafnāyā gayā.

⁶yāīr kī maut ke bād isrāīlī dubārā aisī harkateṅ karne lage jo rab ko burī lagīṅ. wuh kaī dewatāoṅ ke pīchhe lag gae jin meṅ bāl dewatā, astārāt dewī aur shām, saidā, moāb, ammoniyoṅ aur filistiyoṅ ke dewatā shāmil the. yūṅ wuh rab kī parastish aur ḳhidmat karne se bāz āe.

⁷tab us kā ġhazab un par nāzil huā, aur us ne unheṅ filistiyoṅ aur ammoniyoṅ ke hawāle kar diyā.

⁸usī sāl ke daurān in qaumoṅ ne jiliād meṅ isrāīliyoṅ ke us ilāqe par qabzā kiyā jis meṅ purāne zamāne meṅ amorī ābād the aur jo daryā-e-yardan ke mashriq meṅ thā. filistī aur ammonī 18 sāl tak isrāīliyoṅ ko kuchalte aur dabāte rahe.

⁹na sirf yih balki ammoniyoṅ ne daryā-e-yardan ko pār karke yahūdāh, binyamīn aur ifrāīm ke qabīloṅ par bhī hamlā kiyā. jab isrāīlī baṛī musībat meṅ the

¹⁰to āḳhirkār unhoṅ ne madad ke lie rab ko pukārā aur iqrār kiyā, “ham ne terā gunāh kiyā hai. apne ḳhudā ko tark karke ham ne bāl ke butoṅ kī pūjā kī hai.”

¹¹rab ne jawāb meṅ kahā, “jab misrī, amorī, ammonī, filistī,

¹²saidānī, amālīqī aur māonī tum par zulm karte the aur tum madad ke lie mujhe pukārne lage to kyā maiṅ ne tumheṅ na bachāyā?

¹³is ke bāwujūd tum bār bār mujhe tark karke dīgar mābūdoṅ kī pūjā karte rahe ho. is lie ab se maiṅ tumhārī madad nahīṅ karūṅga.

¹⁴jāo, un dewatāoṅ ke sāmne chīḳhte chillāte raho jinheṅ tum ne chun liyā hai! wuhī tumheṅ musībat se nikāleṅ.”

¹⁵lekin isrāīliyoṅ ne rab se faryād kī, “ham se ġhaltī huī hai. jo kuchh bhī tū munāsib samajhtā hai wuh hamāre sāth kar. lekin tū hī hameṅ āj bachā.”

¹⁶wuh ajnabī mābūdoṅ ko apne bīch meṅ se nikāl kar rab kī dubārā ḳhidmat karne lage. tab wuh isrāīl kā dukh bardāsht na kar sakā.

¹⁷un dinoṅ meṅ ammonī apne faujiyoṅ ko jamā karke jiliād meṅ ḳhaimāzan hue. jawāb meṅ isrāīlī bhī jamā hue aur misfāh meṅ apne ḳhaime lagāe.

¹⁸jiliād ke rāhnumāoṅ ne elān kiyā, “hameṅ aise ādmī kī zarūrat hai jo hamāre āge chal kar ammoniyoṅ par hamlā kare. jo koī aisā kare wuh jiliād ke tamām bāshindoṅ kā sardār banegā.”