Read Roman Urdu Geo quzāt 11 Bible Online

quzāt 11 - Roman Urdu Geo bible

quzāt 11

¹us waqt jiliād meṅ ek zabardast sūrmā banām iftāh thā. bāp kā nām jiliād thā jabki māṅ kasbī thī.

²lekin bāp kī bīwī ke beṭe bhī the. jab bāliġh hue to unhoṅ ne iftāh se kahā, “ham mīrās tere sāth nahīṅ bāṅṭeṅge, kyūṅki tū hamārā sagā bhāī nahīṅ hai.” unhoṅ ne use bhagā diyā,

³aur wuh wahāṅ se hijrat karke mulk-e-tob meṅ jā basā. wahāṅ kuchh āwārā log us ke pīchhe ho lie jo us ke sāth idhar udhar ghūmte phirte rahe.

⁴jab kuchh der ke bād ammonī fauj isrāīl se laṛne āī

⁵to jiliād ke buzurg iftāh ko wāpas lāne ke lie mulk-e-tob meṅ āe.

⁶unhoṅ ne guzārish kī, “āeṅ, ammoniyoṅ se laṛne meṅ hamārī rāhnumāī kareṅ.”

⁷lekin iftāh ne etirāz kiyā, “āp is waqt mere pās kyūṅ āe haiṅ jab musībat meṅ haiṅ? āp hī ne mujh se nafrat karke mujhe bāp ke ghar se nikāl diyā thā.”

⁸buzurgoṅ ne jawāb diyā, “ham is lie āp ke pās wāpas āe haiṅ ki āp ammoniyoṅ ke sāth jang meṅ hamārī madad kareṅ. agar āp aisā kareṅ to ham āp ko pūre jiliād kā hukmrān banā leṅge.”

⁹iftāh ne pūchhā, “agar maiṅ āp ke sāth ammoniyoṅ ke ḳhilāf laṛūṅ aur rab mujhe un par fath de to kyā āp wāqaī mujhe apnā hukmrān banā leṅge?”

¹⁰unhoṅ ne jawāb diyā, “rab hamārā gawāh hai! wuhī hameṅ sazā de agar ham apnā wādā pūrā na kareṅ.”

¹¹yih sun kar iftāh jiliād ke buzurgoṅ ke sāth misfāh gayā. wahāṅ logoṅ ne use apnā sardār aur fauj kā kamānḍar banā liyā. misfāh meṅ us ne rab ke huzūr wuh tamām bāteṅ dohrāīṅ jin kā faislā us ne buzurgoṅ ke sāth kiyā thā.

¹²phir iftāh ne ammonī bādshāh ke pās apne qāsidoṅ ko bhej kar pūchhā, “hamārā āp se kyā wāstā ki āp ham se laṛne āe haiṅ?”

¹³bādshāh ne jawāb diyā, “jab isrāīlī misr se nikle to unhoṅ ne arnon, yabboq aur yardan ke daryāoṅ ke darmiyān kā ilāqā mujh se chhīn liyā. ab use jhagaṛā kie baġhair mujhe wāpas kar do.”

¹⁴phir iftāh ne apne qāsidoṅ ko dubārā ammonī bādshāh ke pās bhej kar

¹⁵kahā, “isrāīl ne na to moābiyoṅ se aur na ammoniyoṅ se zamīn chhīnī.

¹⁶haqīqat yih hai ki jab hamārī qaum misr se niklī to wuh registān meṅ se guzar kar bahr-e-qulzum aur wahāṅ se ho kar qādis pahuṅch gaī.

¹⁷qādis se unhoṅ ne adom ke bādshāh ke pās qāsid bhej kar guzārish kī, ‘hameṅ apne mulk meṅ se guzarne deṅ.’ lekin us ne inkār kiyā. phir isrāīliyoṅ ne moāb ke bādshāh se darḳhwāst kī, lekin us ne bhī apne mulk meṅ se guzarne kī ijāzat na dī. is par hamārī qaum kuchh der ke lie qādis meṅ rahī.

¹⁸āḳhirkār wuh registān meṅ wāpas jā kar adom aur moāb ke junūb meṅ chalte chalte moāb ke mashriqī kināre par pahuṅchī, wahāṅ jahāṅ daryā-e-arnon us kī sarhad hai. lekin wuh moāb ke ilāqe meṅ dāḳhil na hue balki daryā ke mashriq meṅ ḳhaimāzan hue.

¹⁹wahāṅ se isrāīliyoṅ ne hasbon ke rahne wāle amorī bādshāh sīhon ko paiġhām bhijwāyā, ‘hameṅ apne mulk meṅ se guzarne deṅ tāki ham apne mulk meṅ dāḳhil ho sakeṅ.’

²⁰lekin sīhon ko shak huā. use yaqīn nahīṅ thā ki wuh mulk meṅ se guzar kar āge baṛheṅge. us ne na sirf inkār kiyā balki apne faujiyoṅ ko jamā karke yahaz shahr meṅ ḳhaimāzan huā aur isrāīliyoṅ ke sāth laṛne lagā.

²¹lekin rab isrāīl ke ḳhudā ne sīhon aur us ke tamām faujiyoṅ ko isrāīl ke hawāle kar diyā. unhoṅ ne unheṅ shikast de kar amoriyoṅ ke pūre mulk par qabzā kar liyā.

²²yih tamām ilāqā junūb meṅ daryā-e-arnon se le kar shimāl meṅ daryā-e-yabboq tak aur mashriq ke registān se le kar maġhrib meṅ daryā-e-yardan tak hamāre qabze meṅ ā gayā.

²³dekheṅ, rab isrāīl ke ḳhudā ne apnī qaum ke āge āge amoriyoṅ ko nikāl diyā hai. to phir āp kā is mulk par qabzā karne kā kyā haq hai?

²⁴āp bhī samajhte haiṅ ki jise āp ke dewatā kamos ne āp ke āge se nikāl diyā hai us ke mulk par qabzā karne kā āp kā haq hai. isī tarah jise rab hamāre ḳhudā ne hamāre āge āge nikāl diyā hai us ke mulk par qabzā karne kā haq hamārā hai.

²⁵kyā āp apne āp ko moābī bādshāh balaq bin safor se behtar samajhte haiṅ? us ne to isrāīl se laṛne balki jhagaṛne tak kī himmat na kī.

²⁶ab isrāīlī 300 sāl se hasbon aur aroīr ke shahroṅ meṅ un ke gird-o-nawāh kī ābādiyoṅ samet ābād haiṅ aur isī tarah daryā-e-arnon ke kināre par ke shahroṅ meṅ. āp ne is daurān in jaghoṅ par qabzā kyūṅ na kiyā?

²⁷chunāṅche maiṅ ne āp se ġhalat sulūk nahīṅ kiyā balki āp hī mere sāth ġhalat sulūk kar rahe haiṅ. kyūṅki mujh se jang chheṛnā ġhalat hai. rab jo munsif hai wuhī āj isrāīl aur ammon ke jhagaṛe kā faislā kare!”

²⁸lekin ammonī bādshāh ne iftāh ke paiġhām par dhyān na diyā.

²⁹phir rab kā rūh iftāh par nāzil huā, aur wuh jiliād aur manassī meṅ se guzar gayā, phir jiliād ke misfāh ke pās wāpas āyā. wahāṅ se wuh apnī fauj le kar ammoniyoṅ se laṛne niklā.

³⁰pahle us ne rab ke sāmne qasam khāī, “agar tū mujhe ammoniyoṅ par fath de

³¹aur maiṅ sahīh-salāmat lauṭūṅ to jo kuchh bhī pahle mere ghar ke darwāze se nikal kar mujh se mile wuh tere lie maḳhsūs kiyā jāegā. maiṅ use bhasm hone wālī qurbānī ke taur par pesh karūṅga.”

³²phir iftāh ammoniyoṅ se laṛne gayā, aur rab ne use un par fath dī.

³³iftāh ne aroīr meṅ dushman ko shikast dī aur isī tarah minnīt aur abīl-karāmīm tak mazīd bīs shahroṅ par qabzā kar liyā. yūṅ isrāīl ne ammon ko zer kar diyā.

³⁴is ke bād iftāh misfāh wāpas chalā gayā. wuh abhī ghar ke qarīb thā ki us kī iklautī beṭī daf bajātī aur nāchtī huī ghar se nikal āī. iftāh kā koī aur beṭā yā beṭī nahīṅ thī.

³⁵apnī beṭī ko dekh kar wuh ranj ke māre apne kapṛe phāṛ kar chīḳh uṭhā, “hāy merī beṭī! tū ne mujhe ḳhāk meṅ dabā kar tabāh kar diyā hai, kyūṅki maiṅ ne rab ke sāmne aisī qasam khāī hai jo badlī nahīṅ jā saktī.”

³⁶beṭī ne kahā, “abbū, āp ne qasam khā kar rab se wādā kiyā hai, is lie lāzim hai ki mere sāth wuh kuchh kareṅ jis kī qasam āp ne khāī hai. āḳhir usī ne āp ko dushman se badlā lene kī kāmyābī baḳhsh dī hai.

³⁷lekin merī ek guzārish hai. mujhe do māh kī muhlat deṅ tāki maiṅ apnī saheliyoṅ ke sāth pahāṛoṅ meṅ jā kar apnī ġhairshādīshudā hālat par mātam karūṅ.”

³⁸iftāh ne ijāzat dī. phir beṭī do māh ke lie apnī saheliyoṅ ke sāth pahāṛoṅ meṅ chalī gaī aur apnī ġhairshādīshudā hālat par mātam kiyā.

³⁹phir wuh apne bāp ke pās wāpas āī, aur us ne apnī qasam kā wādā pūrā kiyā. beṭī ġhairshādīshudā thī. us waqt se isrāīl meṅ dastūr rāij hai

⁴⁰ki isrāīl kī jawān aurateṅ sālānā chār din ke lie apne gharoṅ se nikal kar iftāh kī beṭī kī yād meṅ jashn manātī haiṅ.