Read Roman Urdu Geo quzāt 12 Bible Online

quzāt 12 - Roman Urdu Geo bible

quzāt 12

¹ammoniyoṅ par fath ke bād ifrāīm ke qabīle ke ādmī jamā hue aur daryā-e-yardan ko pār karke iftāh ke pās āe jo safon meṅ thā. unhoṅ ne shikāyat kī, “āp kyūṅ hameṅ bulāe baġhair ammoniyoṅ se laṛne gae. ab ham āp ko āp ke ghar samet jalā deṅge!”

²iftāh ne etirāz kiyā, “jab merī aur merī qaum kā ammoniyoṅ ke sāth saḳht jhagaṛā chhiṛ gayā to maiṅ ne āp ko bulāyā, lekin āp ne mujhe un ke hāth se na bachāyā.

³jab maiṅ ne dekhā ki āp madad nahīṅ kareṅge to apnī jān ḳhatre meṅ ḍāl kar āp ke baġhair hī ammoniyoṅ se laṛne gayā. aur rab ne mujhe un par fath baḳhshī. ab mujhe batāeṅ ki āp kyūṅ mere pās ā kar mujh par hamlā karnā chāhte haiṅ?”

⁴ifrāīmiyoṅ ne jawāb diyā, “tum jo jiliād meṅ rahte ho bas ifrāīm aur manassī ke qabīloṅ se nikle hue bhagoṛe ho.” tab iftāh ne jiliād ke mardoṅ ko jamā kiyā aur ifrāīmiyoṅ se laṛ kar unheṅ shikast dī.

⁵phir jiliādiyoṅ ne daryā-e-yardan ke kam-gahre maqāmoṅ par qabzā kar liyā. jab koī guzarnā chāhtā to wuh pūchhte, “kyā āp ifrāīmī haiṅ?” agar wuh inkār kartā

⁶to jiliād ke mard kahte, “to phir lafz ‘shibbolet’ [3] boleṅ.” agar wuh ifrāīmī hotā to is ke bajāe “sibbolet” kahtā. phir jiliādī use pakaṛ kar wahīṅ mār ḍālte. us waqt kul 42,000 ifrāīmī halāk hue.

⁷iftāh ne chhih sāl isrāīl kī rāhnumāī kī. jab faut huā to use jiliād ke kisī shahr meṅ dafnāyā gayā.

⁸iftāh ke bād ibzān isrāīl kā qāzī banā. wuh bait-laham meṅ ābād thā,

⁹aur us ke 30 beṭe aur 30 beṭiyāṅ thīṅ. us kī tamām beṭiyāṅ shādīshudā thīṅ aur is wajah se bāp ke ghar meṅ nahīṅ rahtī thīṅ. lekin use 30 beṭoṅ ke lie bīwiyāṅ mil gaī thīṅ, aur sab us ke ghar meṅ rahte the. ibzān ne sāt sāl ke daurān isrāīl kī rāhnumāī kī.

¹⁰phir wuh intiqāl kar gayā aur bait-laham meṅ dafnāyā gayā.

¹¹us ke bād ailon qāzī banā. wuh zabūlūn ke qabīle se thā aur 10 sāl ke daurān isrāīl kī rāhnumāī kartā rahā.

¹²jab wuh kūch kar gayā to use zabūlūn ke ayyālon meṅ dafn kiyā gayā.

¹³phir abdon bin hillel qāzī banā. wuh shahr fir'āton kā thā.

¹⁴us ke 40 beṭe aur 30 pote the jo 70 gadhoṅ par safar kiyā karte the. abdon ne āṭh sāl ke daurān isrāīl kī rāhnumāī kī.

¹⁵phir wuh bhī jāṅ-ba-haq ho gayā, aur use amālīqiyoṅ ke pahāṛī ilāqe ke shahr fir'āton meṅ dafnāyā gayā, jo us waqt ifrāīm kā hissā thā.