Read Roman Urdu Geo quzāt 13 Bible Online

quzāt 13 - Roman Urdu Geo bible

quzāt 13

¹phir isrāīlī dubārā aisī harkateṅ karne lage jo rab ko burī lagīṅ. is lie us ne unheṅ filistiyoṅ ke hawāle kar diyā jo unheṅ 40 sāl dabāte rahe.

²us waqt ek ādmī sur'ā shahr meṅ rahtā thā jis kā nām manohā thā. dān ke qabīle kā yih ādmī beaulād thā, kyūṅki us kī bīwī bāṅjh thī.

³ek din rab kā farishtā manohā kī bīwī par zāhir huā aur kahā, “go tujh se bachche paidā nahīṅ ho sakte, ab tū hāmilā hogī, aur tere beṭā paidā hogā.

⁴mai yā koī aur nashā-āwar chīz mat pīnā, na koī nāpāk chīz khānā.

⁵kyūṅki jo beṭā paidā hogā wuh paidāish se hī allāh ke lie maḳhsūs hogā. lāzim hai ki us ke bāl kabhī na kāṭe jāeṅ. yihī bachchā isrāīl ko filistiyoṅ se bachāne lagegā.”

⁶bīwī apne shauhar manohā ke pās gaī aur use sab kuchh batāyā, “allāh kā ek bandā mere pās āyā. wuh allāh kā farishtā lag rahā thā, yahāṅ tak ki maiṅ saḳht ghabrā gaī. maiṅ ne us se na pūchhā ki wuh kahāṅ se hai, aur ḳhud us ne mujhe apnā nām na batāyā.

⁷lekin us ne mujhe batāyā, ‘tū hāmilā hogī, aur tere beṭā paidā hogā. ab mai yā koī aur nashā-āwar chīz mat pīnā, na koī nāpāk chīz khānā. kyūṅki beṭā paidāish se hī maut tak allāh ke lie maḳhsūs hogā’.”

⁸yih sun kar manohā ne rab se duā kī, “ai rab, barāh-e-karm mard-e-ḳhudā ko dubārā hamāre pās bhej tāki wuh hameṅ sikhāe ki ham us beṭe ke sāth kyā kareṅ jo paidā hone wālā hai.”

⁹allāh ne us kī sunī aur apne farishte ko dubārā us kī bīwī ke pās bhej diyā. us waqt wuh shauhar ke baġhair khet meṅ thī.

¹⁰farishte ko dekh kar wuh jaldī se manohā ke pās āī aur use ittilā dī, “jo ādmī pichhle dinoṅ meṅ mere pās āyā wuh dubārā mujh par zāhir huā hai!”

¹¹manohā uṭh kar apnī bīwī ke pīchhe pīchhe farishte ke pās āyā. us ne pūchhā, “kyā āp wuhī ādmī haiṅ jis ne pichhle dinoṅ meṅ merī bīwī se bāt kī thī?” farishte ne jawāb diyā, “jī, maiṅ hī thā.”

¹²phir manohā ne sawāl kiyā, “jab āp kī peshgoī pūrī ho jāegī to hameṅ beṭe ke tarz-e-zindagī aur sulūk ke silsile meṅ kin kin bātoṅ kā ḳhayāl karnā hai?”

¹³rab ke farishte ne jawāb diyā, “lāzim hai ki terī bīwī un tamām chīzoṅ se parhez kare jin kā zikr maiṅ ne kiyā.

¹⁴wuh angūr kī koī bhī paidāwār na khāe. na wuh mai, na koī aur nashā-āwar chīz pie. nāpāk chīzeṅ khānā bhī manā hai. wuh merī har hidāyat par amal kare.”

¹⁵manohā ne rab ke farishte se guzārish kī, “mehrbānī karke thoṛī der hamāre pās ṭhahreṅ tāki ham bakrī kā bachchā zabah karke āp ke lie khānā tayyār kar sakeṅ.”

¹⁶ab tak manohā ne yih bāt nahīṅ pahchānī thī ki mehmān asal meṅ rab kā farishtā hai. farishte ne jawāb diyā, “ḳhwāh tū mujhe roke bhī maiṅ kuchh nahīṅ khāūṅgā. lekin agar tū kuchh karnā chāhe to bakrī kā bachchā rab ko bhasm hone wālī qurbānī ke taur par pesh kar.”

¹⁷manohā ne us se pūchhā, “āp kā kyā nām hai? kyūṅki jab āp kī yih bāteṅ pūrī ho jāeṅgī to ham āp kī izzat karnā chāheṅge.”

¹⁸farishte ne sawāl kiyā, “tū merā nām kyūṅ jānanā chāhtā hai? wuh to terī samajh se bāhar hai.”

¹⁹phir manohā ne ek baṛe patthar par rab ko bakrī kā bachchā aur ġhallā kī nazar pesh kī. tab rab ne manohā aur us kī bīwī ke deḳhte deḳhte ek hairatangez kām kiyā.

²⁰jab āg ke shole āsmān kī taraf buland hue to rab kā farishtā shole meṅ se ūpar chaṛh kar ojhal ho gayā. manohā aur us kī bīwī muṅh ke bal gir gae.

²¹jab rab kā farishtā dubārā manohā aur us kī bīwī par zāhir na huā to manohā ko samajh āī ki rab kā farishtā hī thā.

²²wuh pukār uṭhā, “hāy, ham mar jāeṅge, kyūṅki ham ne allāh ko dekhā hai!”

²³lekin us kī bīwī ne etirāz kiyā, “agar rab hameṅ mār ḍālnā chāhtā to wuh hamārī qurbānī qabūl na kartā. phir na wuh ham par yih sab kuchh zāhir kartā, na hameṅ aisī bāteṅ batātā.”

²⁴kuchh der ke bād manohā ke hāṅ beṭā paidā huā. bīwī ne us kā nām samsūn rakhā. bachchā baṛā hotā gayā, aur rab ne use barkat dī.

²⁵allāh kā rūh pahlī bār mahane-dān meṅ jo sur'ā aur istāl ke darmiyān hai us par nāzil huā.