Read Roman Urdu Geo quzāt 14 Bible Online

quzāt 14 - Roman Urdu Geo bible

quzāt 14

¹ek din samsūn timnat meṅ filistiyoṅ ke pās ṭhahrā huā thā. wahāṅ us ne ek filistī aurat dekhī jo use pasand āī.

²apne ghar lauṭ kar us ne apne wālidain ko batāyā, “mujhe timnat kī ek filistī aurat pasand āī hai. us ke sāth merā rishtā bāndhne kī koshish kareṅ.”

³us ke wālidain ne jawāb diyā, “kyā āp ke rishtedāroṅ aur qaum meṅ koī qābil-e-qabūl aurat nahīṅ hai? āp ko nāmaḳhtūn aur bedīn filistiyoṅ ke pās jā kar un meṅ se koī aurat ḍhūṅḍne kī kyā zarūrat thī?” lekin samsūn bazid rahā, “usī ke sāth merī shādī karāeṅ! wuhī mujhe ṭhīk lagtī hai.”

⁴us ke māṅ-bāp ko mālūm nahīṅ thā ki yih sab kuchh rab kī taraf se hai jo filistiyoṅ se laṛne kā mauqā talāsh kar rahā thā. kyūṅki us waqt filistī isrāīl par hukūmat kar rahe the.

⁵chunāṅche samsūn apne māṅ-bāp samet timnat ke lie rawānā huā. jab wuh timnat ke angūr ke bāġhoṅ ke qarīb pahuṅche to samsūn apne māṅ-bāp se alag ho gayā. achānak ek jawān sherbabar dahāṛtā huā us par ṭūṭ paṛā.

⁶tab allāh kā rūh itne zor se samsūn par nāzil huā ki us ne apne hāthoṅ se sher ko yūṅ phāṛ ḍālā, jis tarah ām ādmī bakrī ke chhoṭe bachche ko phāṛ ḍāltā hai. lekin us ne apne wālidain ko is ke bāre meṅ kuchh na batāyā.

⁷āge nikal kar wuh timnat pahuṅch gayā. mazkūrā filistī aurat se bāt huī aur wuh use ṭhīk lagī.

⁸kuchh der ke bād wuh shādī karne ke lie dubārā timnat gae. shahr pahuṅchne se pahle samsūn rāste se haṭ kar sherbabar kī lāsh ko deḳhne gayā. wahāṅ kyā deḳhtā hai ki shahd kī makkhiyoṅ ne sher ke pinjar meṅ apnā chhattā banā liyā hai.

⁹samsūn ne us meṅ hāth ḍāl kar shahd ko nikāl liyā aur use khāte hue chalā. jab wuh apne māṅ-bāp ke pās pahuṅchā to us ne unheṅ bhī kuchh diyā, magar yih na batāyā ki kahāṅ se mil gayā hai.

¹⁰timnat pahuṅch kar samsūn kā bāp dulhan ke ḳhāndān se milā jabki samsūn ne dūlhe kī haisiyat se aisī ziyāfat kī jis tarah us zamāne meṅ dastūr thā.

¹¹jab dulhan ke ghar wāloṅ ko patā chalā ki samsūn timnat pahuṅch gayā hai to unhoṅ ne us ke pās 30 jawān ādmī bhej die ki us ke sāth ḳhushī manāeṅ.

¹²samsūn ne un se kahā, “maiṅ āp se pahelī pūchhtā hūṅ. agar āp ziyāfat ke sāt dinoṅ ke daurān is kā hal batā sakeṅ to maiṅ āp ko katān ke 30 qīmtī kurte aur 30 shāndār sūṭ de dūṅgā.

¹³lekin agar āp mujhe is kā sahīh matlab na batā sakeṅ to āp ko mujhe 30 qīmtī kurte aur 30 shāndār sūṭ dene paṛeṅge.” unhoṅ ne jawāb diyā, “apnī pahelī sunāeṅ.”

¹⁴samsūn ne kahā, “khāne wāle meṅ se khānā niklā aur zor-āwar meṅ se miṭhās.” tīn din guzar gae. jawān pahelī kā matlab na batā sake.

¹⁵chauthe din unhoṅ ne dulhan ke pās jā kar use dhamkī dī, “apne shauhar ko hameṅ pahelī kā matlab batāne par uksāo, warnā ham tumheṅ tumhāre ḳhāndān samet jalā deṅge. kyā tum logoṅ ne hameṅ sirf is lie dāwat dī ki hameṅ lūṭ lo?”

¹⁶dulhan samsūn ke pās gaī aur āṅsū bahā bahā kar kahne lagī, “tū mujhe pyār nahīṅ kartā! haqīqat meṅ tū mujh se nafrat kartā hai. tū ne merī qaum ke logoṅ se pahelī pūchhī hai lekin mujhe is kā matlab nahīṅ batāyā.” samsūn ne jawāb diyā, “maiṅ ne apne māṅ-bāp ko bhī is kā matlab nahīṅ batāyā to tujhe kyūṅ batāūṅ?”

¹⁷ziyāfat ke pūre hafte ke daurān dulhan us ke sāmne rotī rahī. sātweṅ din samsūn dulhan kī iltijāoṅ se itnā tang ā gayā ki us ne use pahelī kā hal batā diyā. tab dulhan ne phurtī se sab kuchh filistiyoṅ ko sunā diyā.

¹⁸sūraj ke ġhurūb hone se pahle pahle shahr ke mardoṅ ne samsūn ko pahelī kā matlab batāyā, “kyā koī chīz shahd se zyādā mīṭhī aur sherbabar se zyādā zor-āwar hotī hai?” samsūn ne yih sun kar kahā, “āp ne merī jawān gāy le kar hal chalāyā hai, warnā āp kabhī bhī pahelī kā hal na nikāl sakte.”

¹⁹phir rab kā rūh us par nāzil huā. us ne askqalūn shahr meṅ jā kar 30 filistiyoṅ ko mār ḍālā aur un ke libās le kar un ādmiyoṅ ko de die jinhoṅ ne use pahelī kā matlab batā diyā thā. is ke bād wuh baṛe ġhusse meṅ apne māṅ-bāp ke ghar chalā gayā.

²⁰lekin us kī bīwī kī shādī samsūn ke shahbāle se karāī gaī jo 30 jawān filistiyoṅ meṅ se ek thā.