Read Roman Urdu Geo quzāt 17 Bible Online

quzāt 17 - Roman Urdu Geo bible

quzāt 17

¹ifrāīm ke pahāṛī ilāqe meṅ ek ādmī rahtā thā jis kā nām mīkāh thā.

²ek din us ne apnī māṅ se bāt kī, “āp ke chāṅdī ke 1,100 sikke chorī ho gae the, nā? us waqt āp ne mere sāmne hī chor par lānat bhejī thī. ab dekheṅ, wuh paise mere pās haiṅ. maiṅ hī chor hūṅ.” yih sun kar māṅ ne jawāb diyā, “mere beṭe, rab tujhe barkat de!”

³mīkāh ne use tamām paise wāpas kar die, aur māṅ ne elān kiyā, “ab se yih chāṅdī rab ke lie maḳhsūs ho! maiṅ āp ke lie tarāshā aur ḍhālā huā but banwā kar chāṅdī āp ko wāpas kar detī hūṅ.”

⁴chunāṅche jab beṭe ne paise wāpas kar die to māṅ ne us ke 200 sikke sunār ke pās le jā kar lakaṛī kā tarāshā aur ḍhālā huā but banwāyā. mīkāh ne yih but apne ghar meṅ khaṛā kiyā,

⁵kyūṅki us kā apnā maqdis thā. us ne mazīd but aur ek afod [4] bhī banwāyā aur phir ek beṭe ko apnā imām banā liyā.

⁶us zamāne meṅ isrāīl kā koī bādshāh nahīṅ thā balki har koī wuhī kuchh kartā jo use durust lagtā thā.

⁷un dinoṅ meṅ lāwī ke qabīle kā ek jawān ādmī yahūdāh ke qabīle ke shahr bait-laham meṅ ābād thā.

⁸ab wuh shahr ko chhoṛ kar rihāish kī koī aur jagah talāsh karne lagā. ifrāīm ke pahāṛī ilāqe meṅ se safar karte karte wuh mīkāh ke ghar pahuṅch gayā.

⁹mīkāh ne pūchhā, “āp kahāṅ se āe haiṅ?” jawān ne jawāb diyā, “maiṅ lāwī hūṅ. maiṅ yahūdāh ke shahr bait-laham kā rahne wālā hūṅ lekin rihāish kī kisī aur jagah kī talāsh meṅ hūṅ.”

¹⁰mīkāh bolā, “yahāṅ mere pās apnā ghar banā kar mere bāp aur imām baneṅ. tab āp ko sāl meṅ chāṅdī ke das sikke aur zarūrat ke mutābiq kapṛe aur ḳhurāk milegī.”

¹¹lāwī muttafiq huā. wuh wahāṅ ābād huā, aur mīkāh ne us ke sāth beṭoṅ kā sā sulūk kiyā.

¹²us ne use imām muqarrar karke sochā,

¹³“ab rab mujh par mehrbānī karegā, kyūṅki lāwī merā imām ban gayā hai.”