Read Roman Urdu Geo quzāt 18 Bible Online

quzāt 18 - Roman Urdu Geo bible

quzāt 18

¹un dinoṅ meṅ isrāīl kā bādshāh nahīṅ thā. aur ab tak dān ke qabīle ko apnā koī qabāilī ilāqā nahīṅ milā thā, is lie us ke log kahīṅ ābād hone kī talāsh meṅ rahe.

²unhoṅ ne apne ḳhāndānoṅ meṅ se sur'ā aur istāl ke pāṅch tajribākār faujiyoṅ ko chun kar unheṅ mulk kī taftīsh karne ke lie bhej diyā. yih mard ifrāīm ke pahāṛī ilāqe meṅ se guzar kar mīkāh ke ghar ke pās pahuṅch gae. jab wuh wahāṅ rāt ke lie ṭhahre hue the

³to unhoṅ ne dekhā ki jawān lāwī bait-laham kī bolī boltā hai. us ke pās jā kar unhoṅ ne pūchhā, “kaun āp ko yahāṅ lāyā hai? āp yahāṅ kyā karte haiṅ? aur āp kā is ghar meṅ rahne kā kyā maqsad hai?”

⁴lāwī ne unheṅ apnī kahānī sunāī, “mīkāh ne mujhe naukarī de kar apnā imām banā liyā hai.”

⁵phir unhoṅ ne us se guzārish kī, “allāh se daryāft kareṅ ki kyā hamāre safar kā maqsad pūrā ho jāegā yā nahīṅ?”

⁶lāwī ne unheṅ tasallī dī, “salāmatī se āge baṛheṅ. āp ke safar kā maqsad rab ko qabūl hai, aur wuh āp ke sāth hai.”

⁷tab yih pāṅch ādmī āge nikle aur safar karte karte lais pahuṅch gae. unhoṅ ne dekhā ki wahāṅ ke log saidāniyoṅ kī tarah pursukūn aur befikr zindagī guzār rahe haiṅ. koī nahīṅ thā jo unheṅ dabātā yā un par zulm kartā. yih bhī mālūm huā ki agar un par hamlā kiyā jāe to un kā ittihādī shahr saidā un se itnī dūr hai ki un kī madad nahīṅ kar sakegā, aur qarīb koī ittihādī nahīṅ hai jo un kā sāth de.

⁸wuh pāṅch jāsūs sur'ā aur istāl wāpas chale gae. jab wahāṅ pahuṅche to dūsroṅ ne pūchhā, “safar kaisā rahā?”

⁹jāsūsoṅ ne jawāb meṅ kahā, “āeṅ, ham jang ke lie nikleṅ! hameṅ ek behtarīn ilāqā mil gayā hai. āp kyūṅ jhijak rahe haiṅ? jaldī kareṅ, ham nikleṅ aur us mulk par qabzā kar leṅ!

¹⁰wahāṅ ke log befikr haiṅ aur hamle kī tawaqqo hī nahīṅ karte. aur zamīn wasī aur zarḳhez hai, us meṅ kisī bhī chīz kī kamī nahīṅ hai. allāh āp ko wuh mulk dene kā irādā rakhtā hai.”

¹¹dān ke qabīle ke 600 musallah ādmī sur'ā aur istāl se rawānā hue.

¹²rāste meṅ unhoṅ ne apnī lashkargāh yahūdāh ke shahr qiryat-yārīm ke qarīb lagāī. is lie yih jagah āj tak mahane-dān yānī dān kī ḳhaimāgāh kahlātī hai.

¹³wahāṅ se wuh ifrāīm ke pahāṛī ilāqe meṅ dāḳhil hue aur chalte chalte mīkāh ke ghar pahuṅch gae.

¹⁴jin pāṅch mardoṅ ne lais kī taftīsh kī thī unhoṅ ne apne sāthiyoṅ se kahā, “kyā āp ko mālūm hai ki in gharoṅ meṅ ek afod, ek tarāshā aur ḍhālā huā but aur dīgar kaī but haiṅ? ab soch leṅ ki kyā kiyā jāe.”

¹⁵pāṅchoṅ ne mīkāh ke ghar meṅ dāḳhil ho kar jawān lāwī ko salām kiyā

¹⁶jabki bāqī 600 musallah mard geṭ par khaṛe rahe.

¹⁷jab lāwī bāhar khaṛe mardoṅ ke pās gayā to in pāṅchoṅ ne andar ghus kar tarāshā aur ḍhālā huā but, afod aur bāqī but chhīn lie.

¹⁸yih dekh kar lāwī chīḳhne lagā, “kyā kar rahe ho!”

¹⁹unhoṅ ne kahā, “chup! koī bāt na karo balki hamāre sāth jā kar hamāre bāp aur imām bano. hamāre sāth jāoge to pūre qabīle ke imām banoge. kyā yih ek hī ḳhāndān kī ḳhidmat karne se kahīṅ behtar nahīṅ hogā?”

²⁰yih sun kar imām ḳhush huā. wuh afod, tarāshā huā but aur bāqī butoṅ ko le kar musāfiroṅ meṅ sharīk ho gayā.

²¹phir dān ke mard rawānā hue. un ke bāl-bachche, maweshī aur qīmtī māl-o-matā un ke āge āge thā.

²²jab mīkāh ko bāt kā patā chalā to wuh apne paṛosiyoṅ ko jamā karke un ke pīchhe dauṛā. itne meṅ dān ke log ghar se dūr nikal chuke the.

²³jab wuh sāmne nazar āe to mīkāh aur us ke sāthiyoṅ ne chīḳhte chillāte unheṅ rukne ko kahā. dān ke mardoṅ ne pīchhe dekh kar mīkāh se kahā, “kyā bāt hai? apne in logoṅ ko bulā kar kyūṅ le āe ho?”

²⁴mīkāh ne jawāb diyā, “tum logoṅ ne mere butoṅ ko chhīn liyā go maiṅ ne unheṅ ḳhud banwāyā hai. mere imām ko bhī sāth le gae ho. mere pās kuchh nahīṅ rahā to ab tum pūchhte ho ki kyā bāt hai?”

²⁵dān ke afrād bole, “ḳhāmosh! ḳhabardār, hamāre kuchh log tezmizāj haiṅ. aisā na ho ki wuh ġhusse meṅ ā kar tum ko tumhāre ḳhāndān samet mār ḍāleṅ.”

²⁶yih kah kar unhoṅ ne apnā safar jārī rakhā. mīkāh ne jān liyā ki maiṅ apne thoṛe ādmiyoṅ ke sāth un kā muqābalā nahīṅ kar sakūṅgā, is lie wuh muṛ kar apne ghar wāpas chalā gayā.

²⁷us ke but dān ke qabze meṅ rahe, aur imām bhī un meṅ ṭik gayā. phir wuh lais ke ilāqe meṅ dāḳhil hue jis ke bāshinde pursukūn aur befikr zindagī guzār rahe the. dān ke faujī un par ṭūṭ paṛe aur sab ko talwār se qatl karke shahr ko bhasm kar diyā.

²⁸kisī ne bhī un kī madad na kī, kyūṅki saidā bahut dūr thā, aur qarīb koī ittihādī nahīṅ thā jo un kā sāth detā. yih shahr bait-rahob kī wādī meṅ thā. dān ke afrād shahr ko az sar-e-nau tāmīr karke us meṅ ābād hue.

²⁹aur unhoṅ ne us kā nām apne qabīle ke bānī ke nām par dān rakhā (dān isrāīl kā beṭā thā).

³⁰wahāṅ unhoṅ ne tarāshā huā but rakh kar pūjā ke intizām par yūnatan muqarrar kiyā jo mūsā ke beṭe jairsom kī aulād meṅ se thā. jab yūnatan faut huā to us kī aulād qaum kī jilāwatanī tak dān ke qabīle meṅ yihī ḳhidmat kartī rahī.

³¹mīkāh kā banwāyā huā but tab tak dān meṅ rahā jab tak allāh kā ghar sailā meṅ thā.