Read Roman Urdu Geo quzāt 19 Bible Online

quzāt 19 - Roman Urdu Geo bible

quzāt 19

¹us zamāne meṅ jab isrāīl kā koī bādshāh nahīṅ thā ek lāwī ne apne ghar meṅ dāshtā rakhī jo yahūdāh ke shahr bait-laham kī rahne wālī thī. ādmī ifrāīm ke pahāṛī ilāqe ke kisī dūrdarāz kone meṅ ābād thā.

²lekin ek din aurat mard se nārāz huī aur maike wāpas chalī gaī. chār māh ke bād

³lāwī do gadhe aur apne naukar ko le kar bait-laham ke lie rawānā huā tāki dāshtā kā ġhussā ṭhanḍā karke use wāpas āne par āmādā kare. jab us kī mulāqāt dāshtā se huī to wuh use apne bāp ke ghar meṅ le gaī. use dekh kar susar itnā ḳhush huā

⁴ki us ne use jāne na diyā. dāmād ko tīn din wahāṅ ṭhaharnā paṛā jis daurān susar ne us kī ḳhūb mehmān-nawāzī kī.

⁵chauthe din lāwī subhsawere uṭh kar apnī dāshtā ke sāth rawānā hone kī tayyāriyāṅ karne lagā. lekin susar use rok kar bolā, “pahle thoṛā bahut khā kar tāzādam ho jāeṅ, phir chale jānā.”

⁶donoṅ dubārā khāne-pīne ke lie baiṭh gae. susar ne kahā, “barāh-e-karm ek aur rāt yahāṅ ṭhahar kar apnā dil bahlāeṅ.”

⁷mehmān jāne kī tayyāriyāṅ karne to lagā, lekin susar ne use ek aur rāt ṭhaharne par majbūr kiyā. chunāṅche wuh hār mān kar ruk gayā.

⁸pāṅchweṅ din ādmī subhsawere uṭhā aur jāne ke lie tayyār huā. susar ne zor diyā, “pahle kuchh khānā khā kar tāzādam ho jāeṅ. āp dopahar ke waqt bhī jā sakte haiṅ.” chunāṅche donoṅ khāne ke lie baiṭh gae.

⁹dopahar ke waqt lāwī apnī bīwī aur naukar ke sāth jāne ke lie uṭhā. susar etirāz karne lagā, “ab dekheṅ, din ḍhalne wālā hai. rāt ṭhahar kar apnā dil bahlāeṅ. behtar hai ki āp kal subhsawere hī uṭh kar ghar ke lie rawānā ho jāeṅ.”

¹⁰lekin ab lāwī kisī bhī sūrat meṅ ek aur rāt ṭhaharnā nahīṅ chāhtā thā. wuh apne gadhoṅ par zīn kas kar apnī bīwī aur naukar ke sāth rawānā huā. chalte chalte din ḍhalne lagā. wuh yabūs yānī yarūshalam ke qarīb pahuṅch gae the. shahr ko dekh kar naukar ne mālik se kahā, “āeṅ, ham yabūsiyoṅ ke is shahr meṅ jā kar wahāṅ rāt guzāreṅ.”

¹²lekin lāwī ne etirāz kiyā, “nahīṅ, yih ajnabiyoṅ kā shahr hai. hameṅ aisī jagah rāt nahīṅ guzārnā chāhie jo isrāīlī nahīṅ hai. behtar hai ki ham āge jā kar jibiā kī taraf baṛheṅ.

¹³agar ham jaldī kareṅ to ho saktā hai ki jibiā yā us se āge rāmā tak pahuṅch sakeṅ. wahāṅ ārām se rāt guzār sakeṅge.”

¹⁴chunāṅche wuh āge nikle. jab sūraj ġhurūb hone lagā to wuh binyamīn ke qabīle ke shahr jibiā ke qarīb pahuṅch gae

¹⁵aur rāste se haṭ kar shahr meṅ dāḳhil hue. lekin koī un kī mehmān-nawāzī nahīṅ karnā chāhtā thā, is lie wuh shahr ke chauk meṅ ruk gae.

¹⁶phir andhere meṅ ek būṛhā ādmī wahāṅ se guzarā. asal meṅ wuh ifrāīm ke pahāṛī ilāqe kā rahne wālā thā aur jibiā meṅ ajnabī thā, kyūṅki bāqī bāshinde binyamīnī the. ab wuh khet meṅ apne kām se fāriġh ho kar shahr meṅ wāpas āyā thā.

¹⁷musāfiroṅ ko chauk meṅ dekh kar us ne pūchhā, “āp kahāṅ se āe aur kahāṅ jā rahe haiṅ?”

¹⁸lāwī ne jawāb diyā, “ham yahūdāh ke bait-laham se āe haiṅ aur ifrāīm ke pahāṛī ilāqe ke ek dūrdarāz kone tak safar kar rahe haiṅ. wahāṅ merā ghar hai aur wahīṅ se maiṅ rawānā ho kar bait-laham chalā gayā thā. is waqt maiṅ rab ke ghar jā rahā hūṅ. lekin yahāṅ jibiā meṅ koī nahīṅ jo hamārī mehmān-nawāzī karne ke lie tayyār ho,

¹⁹hālāṅki hamāre pās khāne kī tamām chīzeṅ maujūd haiṅ. gadhoṅ ke lie bhūsā aur chārā hai, aur hamāre lie bhī kāfī roṭī aur mai hai. hameṅ kisī bhī chīz kī zarūrat nahīṅ hai.”

²⁰būṛhe ne kahā, “phir maiṅ āp ko apne ghar meṅ ḳhushāmdīd kahtā hūṅ. agar āp ko koī chīz darkār ho to maiṅ use muhayyā karūṅga. har sūrat meṅ chauk meṅ rāt mat guzārnā.”

²¹wuh musāfiroṅ ko apne ghar le gayā aur gadhoṅ ko chārā khilāyā. mehmānoṅ ne apne pāoṅ dho kar khānā khāyā aur mai pī.

²²wuh yūṅ khāne kī rifāqat se lutfandoz ho rahe the ki jibiā ke kuchh sharīr mard ghar ko gher kar darwāze ko zor se khaṭkhaṭāne lage. wuh chillāe, “us ādmī ko bāhar lā jo tere ghar meṅ ṭhahrā huā hai tāki ham us se ziyādatī kareṅ!”

²³būṛhā ādmī bāhar gayā tāki unheṅ samjhāe, “nahīṅ, bhāiyo, aisā shaitānī amal mat karnā. yih ajnabī merā mehmān hai. aisī sharmnāk harkat mat karnā!

²⁴is se pahle maiṅ apnī kuṅwārī beṭī aur mehmān kī dāshtā ko bāhar le ātā hūṅ. un hī se ziyādatī kareṅ. jo jī chāhe un ke sāth kareṅ, lekin ādmī ke sāth aisī sharmnāk harkat na kareṅ.”

²⁵lekin bāhar ke mardoṅ ne us kī na sunī. tab lāwī apnī dāshtā ko pakaṛ kar bāhar le gayā aur us ke pīchhe darwāzā band kar diyā. shahr ke ādmī pūrī rāt us kī behurmatī karte rahe. jab pau phaṭne lagī to unhoṅ ne use fāriġh kar diyā.

²⁶sūraj ke tulū hone se pahle aurat us ghar ke pās wāpas āī jis meṅ shauhar ṭhahrā huā thā. darwāze tak to wuh pahuṅch gaī lekin phir gir kar wahīṅ kī wahīṅ paṛī rahī. jab din chaṛh gayā

²⁷to lāwī jāg uṭhā aur safar karne kī tayyāriyāṅ karne lagā. jab darwāzā kholā to kyā deḳhtā hai ki dāshtā sāmne zamīn par paṛī hai aur hāth dahlīz par rakhe haiṅ.

²⁸wuh bolā, “uṭho, ham chalte haiṅ.” lekin dāshtā ne jawāb na diyā. yih dekh kar ādmī ne use gadhe par lād liyā aur apne ghar chalā gayā.

²⁹jab pahuṅchā to us ne chhurī le kar aurat kī lāsh ko 12 ṭukṛoṅ meṅ kāṭ liyā, phir unheṅ isrāīl kī har jagah bhej diyā.

³⁰jis ne bhī yih dekhā us ne ghabrā kar kahā, “aisā jurm hamāre darmiyān kabhī nahīṅ huā. jab se ham misr se nikal kar āe haiṅ aisī harkat deḳhne meṅ nahīṅ āī. ab lāzim hai ki ham ġhaur se socheṅ aur ek dūsre se mashwarā karke agle qadam ke bāre meṅ faislā kareṅ.”