Read Roman Urdu Geo quzāt 2 Bible Online

quzāt 2 - Roman Urdu Geo bible

quzāt 2

¹rab kā farishtā jiljāl se chaṛh kar bokīm pahuṅchā. wahāṅ us ne isrāīliyoṅ se kahā, “maiṅ tumheṅ misr se nikāl kar us mulk meṅ lāyā jis kā wādā maiṅ ne qasam khā kar tumhāre bāpdādā se kiyā thā. us waqt maiṅ ne kahā ki maiṅ tumhāre sāth apnā ahd kabhī nahīṅ toṛūṅgā.

²aur maiṅ ne hukm diyā, ‘is mulk kī qaumoṅ ke sāth ahd mat bāndhnā balki un kī qurbāngāhoṅ ko girā denā.’ lekin tum ne merī na sunī. yih tum ne kyā kiyā?

³is lie ab maiṅ tumheṅ batātā hūṅ ki maiṅ unheṅ tumhāre āge se nahīṅ nikālūṅgā. wuh tumhāre pahlū'oṅ meṅ kāṅṭe baneṅge, aur un ke dewatā tumhāre lie phandā bane raheṅge.”

⁴rab ke farishte kī yih bāt sun kar isrāīlī ḳhūb roe.

⁵yihī wajah hai ki us jagah kā nām bokīm yānī rone wāle paṛ gayā. phir unhoṅ ne wahāṅ rab ke huzūr qurbāniyāṅ pesh kīṅ.

⁶yashūa ke qaum ko ruḳhsat karne ke bād har ek qabīlā apne ilāqe par qabzā karne ke lie rawānā huā thā.

⁷jab tak yashūa aur wuh buzurg zindā rahe jinhoṅ ne wuh azīm kām dekhe hue the jo rab ne isrāīliyoṅ ke lie kie the us waqt tak isrāīlī rab kī wafādārī se ḳhidmat karte rahe.

⁸phir rab kā ḳhādim yashūa bin nūn intiqāl kar gayā. us kī umr 110 sāl thī.

⁹use timnat-haris meṅ us kī apnī maurūsī zamīn meṅ dafnāyā gayā. (yih shahr ifrāīm ke pahāṛī ilāqe meṅ jās pahāṛ ke shimāl meṅ hai.)

¹⁰jab hamasar isrāīlī sab mar kar apne bāpdādā se jā mile to naī nasl ubhar āī jo na to rab ko jāntī, na un kāmoṅ se wāqif thī jo rab ne isrāīl ke lie kie the.

¹¹us waqt wuh aisī harkateṅ karne lage jo rab ko burī lagīṅ. unhoṅ ne bāl dewatā ke butoṅ kī pūjā karke

¹²rab apne bāpdādā ke ḳhudā ko tark kar diyā jo unheṅ misr se nikāl lāyā thā. wuh gird-o-nawāh kī qaumoṅ ke dīgar mābūdoṅ ke pīchhe lag gae aur un kī pūjā bhī karne lage. is se rab kā ġhazab un par bhaṛkā,

¹³kyūṅki unhoṅ ne us kī ḳhidmat chhoṛ kar bāl dewatā aur astārāt dewī kī pūjā kī.

¹⁴rab yih dekh kar isrāīliyoṅ se nārāz huā aur unheṅ ḍākuoṅ ke hawāle kar diyā jinhoṅ ne un kā māl lūṭā. us ne unheṅ irdgird ke dushmanoṅ ke hāth bech ḍālā, aur wuh un kā muqābalā karne ke qābil na rahe.

¹⁵jab bhī isrāīlī laṛne ke lie nikle to rab kā hāth un ke ḳhilāf thā. natījatan wuh hārte gae jis tarah us ne qasam khā kar farmāyā thā. jab wuh is tarah baṛī musībat meṅ the

¹⁶to rab un ke darmiyān qāzī barpā kartā jo unheṅ lūṭne wāloṅ ke hāth se bachāte.

¹⁷lekin wuh un kī na sunte balki zinā karke dīgar mābūdoṅ ke pīchhe lage aur un kī pūjā karte rahte. go un ke bāpdādā rab ke ahkām ke tābe rahe the, lekin wuh ḳhud baṛī jaldī se us rāh se haṭ jāte jis par un ke bāpdādā chale the.

¹⁸lekin jab bhī wuh dushman ke zulm aur dabāo tale karāhne lagte to rab ko un par tars ā jātā, aur wuh kisī qāzī ko barpā kartā aur us kī madad karke unheṅ bachātā. jitne arse tak qāzī zindā rahtā utnī der tak isrāīlī dushmanoṅ ke hāth se mahfūz rahte.

¹⁹lekin us ke marne par wuh dubārā apnī purānī rāhoṅ par chalne lagte, balki jab wuh muṛ kar dīgar mābūdoṅ kī pairawī aur pūjā karne lagte to un kī rawish bāpdādā kī rawish se bhī burī hotī. wuh apnī sharīr harkatoṅ aur haṭdharm rāhoṅ se bāz āne ke lie tayyār hī na hote.

²⁰is lie allāh ko isrāīl par baṛā ġhussā āyā. us ne kahā, “is qaum ne wuh ahd toṛ diyā hai jo maiṅ ne is ke bāpdādā se bāndhā thā. yih merī nahīṅ suntī,

²¹is lie maiṅ un qaumoṅ ko nahīṅ nikālūṅgā jo yashūa kī maut se le kar āj tak mulk meṅ rah gaī haiṅ. yih qaumeṅ is meṅ ābād raheṅgī,

²²aur maiṅ un se isrāīliyoṅ ko āzmā kar dekhūṅgā ki āyā wuh apne bāpdādā kī tarah rab kī rāh par chaleṅge yā nahīṅ.”

²³chunāṅche rab ne in qaumoṅ ko na yashūa ke hawāle kiyā, na fauran nikālā balki unheṅ mulk meṅ hī rahne diyā.