Read Roman Urdu Geo quzāt 21 Bible Online

quzāt 21 - Roman Urdu Geo bible

quzāt 21

¹jab isrāīlī misfāh meṅ jamā hue the to sab ne qasam khā kar kahā thā, “ham kabhī bhī apnī beṭiyoṅ kā kisī binyamīnī mard ke sāth rishtā nahīṅ bāndheṅge.”

²ab wuh bait-el chale gae aur shām tak allāh ke huzūr baiṭhe rahe. ro ro kar unhoṅ ne duā kī,

³“ai rab, isrāīl ke ḳhudā, hamārī qaum kā ek pūrā qabīlā miṭ gayā hai! yih musībat isrāīl par kyūṅ āī?”

⁴agle din wuh subhsawere uṭhe aur qurbāngāh banā kar us par bhasm hone wālī aur salāmatī kī qurbāniyāṅ chaṛhāīṅ.

⁵phir wuh ek dūsre se pūchhne lage, “jab ham misfāh meṅ rab ke huzūr jamā hue to hamārī qaum meṅ se kaun kaun ijtimā meṅ sharīk na huā?” kyūṅki us waqt unhoṅ ne qasam khā kar elān kiyā thā, “jis ne yahāṅ rab ke huzūr āne se inkār kiyā use zarūr sazā-e-maut dī jāegī.”

⁶ab isrāīliyoṅ ko binyamīniyoṅ par afsos huā. unhoṅ ne kahā, “ek pūrā qabīlā miṭ gayā hai.

⁷ab ham un thoṛe bache-khuche ādmiyoṅ ko bīwiyāṅ kis tarah muhayyā kar sakte haiṅ? ham ne to rab ke huzūr qasam khāī hai ki apnī beṭiyoṅ kā un ke sāth rishtā nahīṅ bāndheṅge.

⁸lekin ho saktā hai koī ḳhāndān misfāh ke ijtimā meṅ na āyā ho. āo, ham patā kareṅ.” mālūm huā ki yabīs-jiliād ke bāshinde nahīṅ āe the.

⁹yih bāt faujiyoṅ ko ginane se patā chalī, kyūṅki ginte waqt yabīs-jiliād kā koī bhī shaḳhs fauj meṅ nahīṅ thā.

¹⁰tab unhoṅ ne 12,000 faujiyoṅ ko chun kar unheṅ hukm diyā, “yabīs-jiliād par hamlā karke tamām bāshindoṅ ko bāl-bachchoṅ samet mār ḍālo.

¹¹sirf kuṅwāriyoṅ ko zindā rahne do.”

¹²faujiyoṅ ne yabīs meṅ 400 kuṅwāriyāṅ pāīṅ. wuh unheṅ sailā le āe jahāṅ isrāīliyoṅ kā lashkar ṭhahrā huā thā.

¹³wahāṅ se unhoṅ ne apne qāsidoṅ ko rimmon kī chaṭān ke pās bhej kar binyamīniyoṅ ke sāth sulah kar lī.

¹⁴phir binyamīn ke 600 mard registān se wāpas āe, aur un ke sāth yabīs-jiliād kī kuṅwāriyoṅ kī shādī huī. lekin yih sab ke lie kāfī nahīṅ thīṅ.

¹⁵isrāīliyoṅ ko binyamīn par afsos huā, kyūṅki rab ne isrāīl ke qabīloṅ meṅ ḳhalā ḍāl diyā thā.

¹⁶jamā'at ke buzurgoṅ ne dubārā pūchhā, “hameṅ binyamīn ke bāqī mardoṅ ke lie kahāṅ se bīwiyāṅ mileṅgī? un kī tamām aurateṅ to halāk ho gaī haiṅ.

¹⁷lāzim hai ki unheṅ un kā maurūsī ilāqā wāpas mil jāe. aisā na ho ki wuh bilkul miṭ jāeṅ.

¹⁸lekin ham apnī beṭiyoṅ kī un ke sāth shādī nahīṅ karā sakte, kyūṅki ham ne qasam khā kar elān kiyā hai, ‘jo apnī beṭī kā rishtā binyamīn ke kisī mard se bāndhegā us par allāh kī lānat ho’.”

¹⁹yūṅ sochte sochte unheṅ āḳhirkār yih tarkīb sūjhī, “kuchh der ke bād yahāṅ sailā meṅ rab kī sālānā īd manāī jāegī. sailā bait-el ke shimāl meṅ, labūnā ke junūb meṅ aur us rāste ke mashriq meṅ hai jo bait-el se sikam tak le jātā hai.

²⁰ab binyamīnī mardoṅ ke lie hamārā mashwarā hai ki īd ke dinoṅ meṅ angūr ke bāġhoṅ meṅ chhup kar ghāt meṅ baiṭh jāeṅ.

²¹jab laṛkiyāṅ loknāch ke lie sailā se nikleṅgī to phir bāġhoṅ se nikal kar un par jhapaṭ paṛnā. har ādmī ek laṛkī ko pakaṛ kar use apne ghar le jāe.

²²jab un ke bāp aur bhāī hamāre pās ā kar āp kī shikāyat kareṅge to ham un se kaheṅge, ‘binyamīniyoṅ par tars khāeṅ, kyūṅki jab ham ne yabīs par fath pāī to ham un ke lie kāfī aurateṅ hāsil na kar sake. āp bequsūr haiṅ, kyūṅki āp ne unheṅ apnī beṭiyoṅ ko irādatan to nahīṅ diyā’.”

²³binyamīniyoṅ ne buzurgoṅ kī is hidāyat par amal kiyā. īd ke dinoṅ meṅ jab laṛkiyāṅ nāch rahī thīṅ to binyamīniyoṅ ne utnī pakaṛ līṅ ki un kī kamī pūrī ho gaī. phir wuh unheṅ apne qabāilī ilāqe meṅ le gae aur shahroṅ ko dubārā tāmīr karke un meṅ basne lage.

²⁴bāqī isrāīlī bhī wahāṅ se chale gae. har ek apne qabāilī ilāqe meṅ wāpas chalā gayā.

²⁵us zamāne meṅ isrāīl meṅ koī bādshāh nahīṅ thā. har ek wuhī kuchh kartā jo use munāsib lagtā thā.