Read Roman Urdu Geo quzāt 6 Bible Online

quzāt 6 - Roman Urdu Geo bible

quzāt 6

¹phir isrāīlī dubārā wuh kuchh karne lage jo rab ko burā lagā, aur us ne unheṅ sāt sāl tak midiyāniyoṅ ke hawāle kar diyā.

²midiyāniyoṅ kā dabāo itnā zyādā baṛh gayā ki isrāīliyoṅ ne un se panāh lene ke lie pahāṛī ilāqe meṅ shigāf, ġhār aur gaṛhiyāṅ banā līṅ.

³kyūṅki jab bhī wuh apnī fasleṅ lagāte to midiyānī, amālīqī aur mashriq ke dīgar faujī un par hamlā karke

⁴mulk ko gher lete aur fasloṅ ko ġhazzā shahr tak tabāh karte. wuh khāne wālī koī bhī chīz nahīṅ chhoṛte the, na koī bheṛ, na koī bail, aur na koī gadhā.

⁵aur jab wuh apne maweshiyoṅ aur ḳhaimoṅ ke sāth pahuṅchte to ṭiḍḍiyoṅ ke daloṅ kī mānind the. itne mard aur ūṅṭ the ki un ko ginā nahīṅ jā saktā thā. yūṅ wuh mulk par chaṛh āte the tāki use tabāh kareṅ.

⁶isrāīlī midiyān ke sabab se itne pasthāl hue ki āḳhirkār madad ke lie rab ko pukārne lage.

⁷tab us ne un meṅ ek nabī bhej diyā jis ne kahā, “rab isrāīl kā ḳhudā farmātā hai ki maiṅ hī tumheṅ misr kī ġhulāmī se nikāl lāyā.

⁹maiṅ ne tumheṅ misr ke hāth se aur un tamām zālimoṅ ke hāth se bachā liyā jo tumheṅ dabā rahe the. maiṅ unheṅ tumhāre āge āge nikāltā gayā aur un kī zamīn tumheṅ de dī.

¹⁰us waqt maiṅ ne tumheṅ batāyā, ‘maiṅ rab tumhārā ḳhudā hūṅ. jin amoriyoṅ ke mulk meṅ tum rah rahe ho un ke dewatāoṅ kā ḳhauf mat mānanā. lekin tum ne merī na sunī’.”

¹¹ek din rab kā farishtā āyā aur ufrā meṅ balūt ke ek daraḳht ke sāy meṅ baiṭh gayā. yih daraḳht abīazar ke ḳhāndān ke ek ādmī kā thā jis kā nām yūās thā. wahāṅ angūr kā ras nikālne kā hauz thā, aur us meṅ yūās kā beṭā jidāūn chhup kar gandum jhāṛ rahā thā, hauz meṅ is lie ki gandum midiyāniyoṅ se mahfūz rahe.

¹²rab kā farishtā jidāūn par zāhir huā aur kahā, “ai zabardast sūrme, rab tere sāth hai!”

¹³jidāūn ne jawāb diyā, “nahīṅ janāb, agar rab hamāre sāth ho to yih sab kuchh hamāre sāth kyūṅ ho rahā hai? us ke wuh tamām mojize āj kahāṅ nazar āte haiṅ jin ke bāre meṅ hamāre bāpdādā hameṅ batāte rahe haiṅ? kyā wuh nahīṅ kahte the ki rab hameṅ misr se nikāl lāyā? nahīṅ, janāb. ab aisā nahīṅ hai. ab rab ne hameṅ tark karke midiyān ke hawāle kar diyā hai.”

¹⁴rab ne us kī taraf muṛ kar kahā, “apnī is tāqat meṅ jā aur isrāīl ko midiyān ke hāth se bachā. maiṅ hī tujhe bhej rahā hūṅ.”

¹⁵lekin jidāūn ne etirāz kiyā, “ai rab, maiṅ isrāīl ko kis tarah bachāūṅ? merā ḳhāndān manassī ke qabīle kā sab se kamzor ḳhāndān hai, aur maiṅ apne bāp ke ghar meṅ sab se chhoṭā hūṅ.”

¹⁶rab ne jawāb diyā, “maiṅ tere sāth hūṅgā, aur tū midiyāniyoṅ ko yūṅ māregā jaise ek hī ādmī ko.”

¹⁷tab jidāūn ne kahā, “agar mujh par tere karm kī nazar ho to mujhe koī ilāhī nishān dikhā tāki sābit ho jāe ki wāqaī rab hī mere sāth bāt kar rahā hai.

¹⁸maiṅ abhī jā kar qurbānī tayyār kartā hūṅ aur phir wāpas ā kar use tujhe pesh karūṅga. us waqt tak rawānā na ho jānā.” rab ne kahā, “ṭhīk hai, maiṅ terī wāpasī kā intizār karke hī jāūṅgā.”

¹⁹jidāūn chalā gayā. us ne bakrī kā bachchā zabah karke tayyār kiyā aur pūre 16 kilogrām maide se beḳhamīrī roṭī banāī. phir gosht ko ṭokrī meṅ rakh kar aur us kā shorbā alag bartan meṅ ḍāl kar wuh sab kuchh rab ke farishte ke pās lāyā aur use balūt ke sāy meṅ pesh kiyā.

²⁰rab ke farishte ne kahā, “gosht aur beḳhamīrī roṭī ko le kar is patthar par rakh de, phir shorbā us par unḍel de.” jidāūn ne aisā hī kiyā.

²¹rab ke farishte ke hāth meṅ lāṭhī thī. ab us ne lāṭhī ke sire se gosht aur beḳhamīrī roṭī ko chhū diyā. achānak patthar se āg bhaṛak uṭhī aur ḳhurāk bhasm ho gaī. sāth sāth rab kā farishtā ojhal ho gayā.

²²phir jidāūn ko yaqīn āyā ki yih wāqaī rab kā farishtā thā, aur wuh bol uṭhā, “hāy rab qādir-e-mutlaq! mujh par afsos, kyūṅki maiṅ ne rab ke farishte ko rū-ba-rū dekhā hai.”

²³lekin rab us se hamkalām huā aur kahā, “terī salāmatī ho. mat ḍar, tū nahīṅ maregā.”

²⁴wahīṅ jidāūn ne rab ke lie qurbāngāh banāī aur us kā nām ‘rab salāmat hai’ rakhā. yih āj tak abīazar ke ḳhāndān ke shahr ufrā meṅ maujūd hai.

²⁵usī rāt rab jidāūn se hamkalām huā, “apne bāp ke bailoṅ meṅ se dūsre bail ko jo sāt sāl kā hai chun le. phir apne bāp kī wuh qurbāngāh girā de jis par bāl dewatā ko qurbāniyāṅ chaṛhāī jātī haiṅ, aur yasīrat dewī kā wuh khambā kāṭ ḍāl jo sāth khaṛā hai.

²⁶is ke bād usī pahāṛī qile kī choṭī par rab apne ḳhudā ke lie sahīh qurbāngāh banā de. yasīrat ke khambe kī kaṭī huī lakaṛī aur bail ko us par rakh kar mujhe bhasm hone wālī qurbānī pesh kar.”

²⁷chunāṅche jidāūn ne apne das naukaroṅ ko sāth le kar wuh kuchh kiyā jis kā hukm rab ne use diyā thā. lekin wuh apne ḳhāndān aur shahr ke logoṅ se ḍartā thā, is lie us ne yih kām din ke bajāe rāt ke waqt kiyā.

²⁸subh ke waqt jab shahr ke log uṭhe to dekhā ki bāl kī qurbāngāh ḍhā dī gaī hai aur yasīrat dewī kā sāth wālā khambā kāṭ diyā gayā hai. in kī jagah ek naī qurbāngāh banāī gaī hai jis par bail ko chaṛhāyā gayā hai.

²⁹unhoṅ ne ek dūsre se pūchhā, “kis ne yih kiyā?” jab wuh is bāt kī taftīsh karne lage to kisī ne unheṅ batāyā ki jidāūn bin yūās ne yih sab kuchh kiyā hai.

³⁰tab wuh yūās ke ghar gae aur taqāzā kiyā, “apne beṭe ko ghar se nikāl lāeṅ. lāzim hai ki wuh mar jāe, kyūṅki us ne bāl kī qurbāngāh ko girā kar sāth wālā yasīrat dewī kā khambā bhī kāṭ ḍālā hai.”

³¹lekin yūās ne un se jo us ke sāmne khaṛe the kahā, “kyā āp bāl ke difā meṅ laṛnā chāhte haiṅ? jo bhī bāl ke lie laṛegā use kal subh tak mār diyā jāegā. agar bāl wāqaī ḳhudā hai to wuh ḳhud apne difā meṅ laṛe jab koī us kī qurbāngāh ko ḍhā de.”

³²chūṅki jidāūn ne bāl kī qurbāngāh girā dī thī is lie us kā nām yarubbāl yānī ‘bāl us se laṛe’ paṛ gayā.

³³kuchh der ke bād tamām midiyānī, amālīqī aur dūsrī mashriqī qaumeṅ jamā huīṅ aur daryā-e-yardan ko pār karke apne ḍere maidān-e-yazrael meṅ lagāe.

³⁴phir rab kā rūh jidāūn par nāzil huā. us ne narsingā phūṅk kar abīazar ke ḳhāndān ke mardoṅ ko apne pīchhe ho lene ke lie bulāyā.

³⁵sāth sāth us ne apne qāsidoṅ ko manassī ke qabīle aur āshar, zabūlūn aur naftālī ke qabīloṅ ke pās bhī bhej diyā. tab wuh bhī āe aur jidāūn ke mardoṅ ke sāth mil kar us ke pīchhe ho lie.

³⁶jidāūn ne allāh se duā kī, “agar tū wāqaī isrāīl ko apne wāde ke mutābiq mere zarī'e bachānā chāhtā hai

³⁷to mujhe yaqīn dilā. maiṅ rāt ko tāzā katrī huī ūn gandum gāhne ke farsh par rakh dūṅgā. kal subh agar sirf ūn par os paṛī ho aur irdgird kā sārā farsh ḳhushk ho to maiṅ jān lūṅgā ki wāqaī tū apne wāde ke mutābiq isrāīl ko mere zarī'e bachāegā.”

³⁸wuhī kuchh huā jis kī darḳhwāst jidāūn ne kī thī. agle din jab wuh subhsawere uṭhā to ūn os se tar thī. jab us ne use nichoṛā to itnā pānī thā ki bartan bhar gayā.

³⁹phir jidāūn ne allāh se kahā, “mujh se ġhusse na ho jānā agar maiṅ tujh se ek bār phir darḳhwāst karūṅ. mujhe ek āḳhirī dafā ūn ke zarī'e terī marzī jāṅchne kī ijāzat de. is dafā ūn ḳhushk rahe aur irdgird ke sāre farsh par os paṛī ho.”

⁴⁰us rāt allāh ne aisā hī kiyā. sirf ūn ḳhushk rahī jabki irdgird ke sāre farsh par os paṛī thī.