Read Roman Urdu Geo quzāt 9 Bible Online

quzāt 9 - Roman Urdu Geo bible

quzāt 9

¹ek din yarubbāl yānī jidāūn kā beṭā abīmalik apne māmū'oṅ aur māṅ ke bāqī rishtedāroṅ se milne ke lie sikam gayā. us ne un se kahā,

²“sikam shahr ke tamām bāshindoṅ se pūchheṅ, kyā āp apne āp par jidāūn ke 70 beṭoṅ kī hukūmat zyādā pasand kareṅge yā ek hī shaḳhs kī? yād rahe ki maiṅ āp kā ḳhūnī rishtedār hūṅ!”

³abīmalik ke māmū'oṅ ne sikam ke tamām bāshindoṅ ke sāmne yih bāteṅ dohrāīṅ. sikam ke logoṅ ne sochā, “abīmalik hamārā bhāī hai” is lie wuh us ke pīchhe lag gae.

⁴unhoṅ ne use bāl-barīt dewatā ke mandir se chāṅdī ke 70 sikke bhī de die. in paisoṅ se abīmalik ne apne irdgird āwārā aur badmāsh ādmiyoṅ kā guroh jamā kiyā.

⁵unheṅ apne sāth le kar wuh ufrā pahuṅchā jahāṅ bāp kā ḳhāndān rahtā thā. wahāṅ us ne apne tamām bhāiyoṅ yānī jidāūn ke 70 beṭoṅ ko ek hī patthar par qatl kar diyā. sirf yūtām jo jidāūn kā sab se chhoṭā beṭā thā kahīṅ chhup kar bach niklā.

⁶is ke bād sikam aur bait-millo ke tamām log us balūt ke sāy meṅ jamā hue jo sikam ke satūn ke pās thā. wahāṅ unhoṅ ne abīmalik ko apnā bādshāh muqarrar kiyā.

⁷jab yūtām ko is kī ittilā milī to wuh garizīm pahāṛ kī choṭī par chaṛh gayā aur ūṅchī āwāz se chillāyā, “ai sikam ke bāshindo, suneṅ merī bāt! suneṅ agar āp chāhte haiṅ ki allāh āp kī bhī sune.

⁸ek din daraḳhtoṅ ne faislā kiyā ki ham par koī bādshāh honā chāhie. wuh use chunane aur masah karne ke lie nikle. pahle unhoṅ ne zaitūn ke daraḳht se bāt kī, ‘hamāre bādshāh ban jāeṅ!’

⁹lekin zaitūn ke daraḳht ne jawāb diyā, ‘kyā maiṅ apnā tel paidā karne se bāz āūṅ jis kī allāh aur insān itnī qadar karte haiṅ tāki daraḳhtoṅ par hukūmat karūṅ? hargiz nahīṅ!’

¹⁰is ke bād daraḳhtoṅ ne anjīr ke daraḳht se bāt kī, ‘āeṅ, hamāre bādshāh ban jāeṅ!’

¹¹lekin anjīr ke daraḳht ne jawāb diyā, ‘kyā maiṅ apnā mīṭhā aur achchhā phal lāne se bāz āūṅ tāki daraḳhtoṅ par hukūmat karūṅ? hargiz nahīṅ!’

¹²phir daraḳhtoṅ ne angūr kī bel se bāt kī, ‘āeṅ, hamāre bādshāh ban jāeṅ!’

¹³lekin angūr kī bel ne jawāb diyā, ‘kyā maiṅ apnā ras paidā karne se bāz āūṅ jis se allāh aur insān ḳhush ho jāte haiṅ tāki daraḳhtoṅ par hukūmat karūṅ? hargiz nahīṅ!’

¹⁴āḳhirkār daraḳht kāṅṭedār jhāṛī ke pās āe aur kahā, ‘āeṅ aur hamāre bādshāh ban jāeṅ!’

¹⁵kāṅṭedār jhāṛī ne jawāb diyā, ‘agar tum wāqaī mujhe masah karke apnā bādshāh banānā chāhte ho to āo aur mere sāy meṅ panāh lo. agar tum aisā nahīṅ karnā chāhte to jhāṛī se āg nikal kar lubnān ke deodār ke daraḳhtoṅ ko bhasm kar de’.”

¹⁶yūtām ne bāt jārī rakh kar kahā, “ab mujhe batāeṅ, kyā āp ne wafādārī aur sachchāī kā izhār kiyā jab āp ne abīmalik ko apnā bādshāh banā liyā? kyā āp ne jidāūn aur us ke ḳhāndān ke sāth achchhā sulūk kiyā? kyā āp ne us par shukrguzārī kā wuh izhār kiyā jis ke lāiq wuh thā?

¹⁷mere bāp ne āp kī ḳhātir jang kī. āp ko midiyāniyoṅ se bachāne ke lie us ne apnī jān ḳhatre meṅ ḍāl dī.

¹⁸lekin āj āp jidāūn ke gharāne ke ḳhilāf uṭh khaṛe hue haiṅ. āp ne us ke 70 beṭoṅ ko ek hī patthar par zabah karke us kī launḍī ke beṭe abīmalik ko sikam kā bādshāh banā liyā hai, aur yih sirf is lie ki wuh āp kā rishtedār hai.

¹⁹ab suneṅ! agar āp ne jidāūn aur us ke ḳhāndān ke sāth wafādārī aur sachchāī kā izhār kiyā hai to phir allāh kare ki abīmalik āp ke lie ḳhushī kā bāis ho aur āp us ke lie.

²⁰lekin agar aisā nahīṅ thā to allāh kare ki abīmalik se āg nikal kar āp sab ko bhasm kar de jo sikam aur bait-millo meṅ rahte haiṅ! aur āg āp se nikal kar abīmalik ko bhī bhasm kar de!”

²¹yih kah kar yūtām ne bhāg kar bair meṅ panāh lī, kyūṅki wuh apne bhāī abīmalik se ḍartā thā.

²²abīmalik kī isrāīl par hukūmat tīn sāl tak rahī.

²³lekin phir allāh ne ek burī rūh bhej dī jis ne abīmalik aur sikam ke bāshindoṅ meṅ nāittifāqī paidā kar dī. natīje meṅ sikam ke logoṅ ne baġhāwat kī.

²⁴yūṅ allāh ne use is kī sazā dī ki us ne apne bhāiyoṅ yānī jidāūn ke 70 beṭoṅ ko qatl kiyā thā. sikam ke bāshindoṅ ko bhī sazā milī, kyūṅki unhoṅ ne is meṅ abīmalik kī madad kī thī.

²⁵us waqt sikam ke log irdgird kī choṭiyoṅ par chaṛh kar abīmalik kī tāk meṅ baiṭh gae. jo bhī wahāṅ se guzarā use unhoṅ ne lūṭ liyā. is bāt kī ḳhabar abīmalik tak pahuṅch gaī.

²⁶un dinoṅ meṅ ek ādmī apne bhāiyoṅ ke sāth sikam āyā jis kā nām jāl bin abad thā. sikam ke logoṅ se us kā achchhā-ḳhāsā tālluq ban gayā, aur wuh us par etibār karne lage.

²⁷angūr kī fasal pak gaī thī. log shahr se nikle aur apne bāġhoṅ meṅ angūr toṛ kar un se ras nikālne lage. phir unhoṅ ne apne dewatā ke mandir meṅ jashn manāyā. jab wuh ḳhūb khā pī rahe the to abīmalik par lānat karne lage.

²⁸jāl bin abad ne kahā, “sikam kā abīmalik ke sāth kyā wāstā ki ham us ke tābe raheṅ? wuh to sirf yarubbāl kā beṭā hai, jis kā numāindā zabūl hai. us kī ḳhidmat mat karnā balki sikam ke bānī hamor ke logoṅ kī! ham abīmalik kī ḳhidmat kyūṅ kareṅ?

²⁹kāsh shahr kā intizām mere hāth meṅ hotā! phir maiṅ abīmalik ko jald hī nikāl detā. maiṅ use chaileṅj detā ki āo, apne faujiyoṅ ko jamā karke ham se laṛo!”

³⁰jāl bin abad kī bāt sun kar sikam kā sardār zabūl baṛe ġhusse meṅ ā gayā.

³¹apne qāsidoṅ kī mārifat us ne abīmalik ko chupke se ittilā dī, “jāl bin abad apne bhāiyoṅ ke sāth sikam ā gayā hai jahāṅ wuh pūre shahr ko āp ke ḳhilāf khaṛe ho jāne ke lie uksā rahā hai.

³²ab aisā kareṅ ki rāt ke waqt apne faujiyoṅ samet idhar āeṅ aur khetoṅ meṅ tāk meṅ raheṅ.

³³subhsawere jab sūraj tulū hogā to shahr par hamlā kareṅ. jab jāl apne ādmiyoṅ ke sāth āp ke ḳhilāf laṛne āegā to us ke sāth wuh kuchh kareṅ jo āp munāsib samajhte haiṅ.”

³⁴yih sun kar abīmalik rāt ke waqt apne faujiyoṅ samet rawānā huā. us ne unheṅ chār gurohoṅ meṅ taqsīm kiyā jo sikam ko gher kar tāk meṅ baiṭh gae.

³⁵subh ke waqt jab jāl ghar se nikal kar shahr ke darwāze meṅ khaṛā huā to abīmalik aur us ke faujī apnī chhupne kī jaghoṅ se nikal āe.

³⁶unheṅ dekh kar jāl ne zabūl se kahā, “dekho, log pahāṛoṅ kī choṭiyoṅ se utar rahe haiṅ!” zabūl ne jawāb diyā, “nahīṅ, nahīṅ, jo āp ko ādmī lag rahe haiṅ wuh sirf pahāṛoṅ ke sāy haiṅ.”

³⁷lekin jāl ko tasallī na huī. wuh dubārā bol uṭhā, “dekho, log duniyā kī nāf [2] se utar rahe haiṅ. aur ek aur guroh rammāloṅ ke balūt se ho kar ā rahā hai.”

³⁸phir zabūl ne us se kahā, “ab terī baṛī baṛī bāteṅ kahāṅ rahīṅ? kyā tū ne nahīṅ kahā thā, ‘abīmalik kaun hai ki ham us ke tābe raheṅ?’ ab yih log ā gae haiṅ jin kā mazāq tū ne uṛāyā. jā, shahr se nikal kar un se laṛ!”

³⁹tab jāl sikam ke mardoṅ ke sāth shahr se niklā aur abīmalik se laṛne lagā.

⁴⁰lekin wuh hār gayā, aur abīmalik ne shahr ke darwāze tak us kā tāqqub kiyā. bhāgte bhāgte sikam ke bahut se afrād rāste meṅ gir kar halāk ho gae.

⁴¹phir abīmalik arūmā chalā gayā jabki zabūl ne pīchhe rah kar jāl aur us ke bhāiyoṅ ko shahr se nikāl diyā.

⁴²agle din sikam ke log shahr se nikal kar maidān meṅ ānā chāhte the. jab abīmalik ko yih ḳhabar milī

⁴³to us ne apnī fauj ko tīn gurohoṅ meṅ taqsīm kiyā. yih guroh dubārā sikam ko gher kar ghāt meṅ baiṭh gae. jab log shahr se nikle to abīmalik apne guroh ke sāth chhupne kī jagah se nikal āyā aur shahr ke darwāze meṅ khaṛā ho gayā. bāqī do guroh maidān meṅ maujūd afrād par ṭūṭ paṛe aur sab ko halāk kar diyā.

⁴⁴

⁴⁵phir abīmalik ne shahr par hamlā kiyā. log pūrā din laṛte rahe, lekin āḳhirkār abīmalik ne shahr par qabzā karke tamām bāshindoṅ ko maut ke ghāṭ utār diyā. us ne shahr ko tabāh kiyā aur khanḍarāt par namak bikher kar us kī hatmī tabāhī zāhir kar dī.

⁴⁶jab sikam ke burj ke rahne wāloṅ ko yih ittilā milī to wuh el-barīt dewatā ke mandir ke tahḳhāne meṅ chhup gae.

⁴⁷jab abīmalik ko patā chalā

⁴⁸to wuh apne faujiyoṅ samet zalmon pahāṛ par chaṛh gayā. wahāṅ us ne kulhāṛī se shāḳh kāṭ kar apne kandhoṅ par rakh lī aur apne faujiyoṅ ko hukm diyā, “jaldī karo! sab aisā hī karo.”

⁴⁹faujiyoṅ ne bhī shāḳheṅ kāṭīṅ aur phir abīmalik ke pīchhe lag kar mandir ke pās wāpas āe. wahāṅ unhoṅ ne tamām lakaṛī tahḳhāne kī chhat par jamā karke use jalā diyā. yūṅ sikam ke burj ke taqrīban 1,000 mard-o-ḳhawātīn sab bhasm ho gae.

⁵⁰wahāṅ se abīmalik taibiz ke ḳhilāf baṛh gayā. us ne shahr kā muhāsarā karke us par qabzā kar liyā.

⁵¹lekin shahr ke bīch meṅ ek mazbūt burj thā. tamām mard-o-ḳhawātīn us meṅ farār hue aur burj ke darwāzoṅ par kunḍī lagā kar chhat par chaṛh gae.

⁵²abīmalik laṛte laṛte burj ke darwāze ke qarīb pahuṅch gayā. wuh use jalāne kī koshish karne lagā

⁵³to ek aurat ne chakkī kā ūpar kā pāṭ us ke sar par phaiṅk diyā, aur us kī khopaṛī phaṭ gaī.

⁵⁴jaldī se abīmalik ne apne silāhbardār ko bulāyā. us ne kahā, “apnī talwār khaiṅch kar mujhe mār do! warnā log kaheṅge ki ek aurat ne mujhe mār ḍālā.” chunāṅche naujawān ne apnī talwār us ke badan meṅ se guzār dī aur wuh mar gayā.

⁵⁵jab faujiyoṅ ne dekhā ki abīmalik mar gayā hai to wuh apne apne ghar chale gae.

⁵⁶yūṅ allāh ne abīmalik ko us badī kā badlā diyā jo us ne apne 70 bhāiyoṅ ko qatl karke apne bāp ke ḳhilāf kī thī.

⁵⁷aur allāh ne sikam ke bāshindoṅ ko bhī un kī sharīr harkatoṅ kī munāsib sazā dī. yūtām bin yarubbāl kī lānat pūrī huī.