Read Roman Urdu Geo mukāshafā 1 Bible Online

mukāshafā 1 - Roman Urdu Geo bible

mukāshafā 1

¹yih īsā masīh kī taraf se mukāshafā hai jo allāh ne use atā kiyā tāki wuh apne ḳhādimoṅ ko wuh kuchh dikhāe jise jald hī pesh ānā hai. us ne apne farishte ko bhej kar yih mukāshafā apne ḳhādim yūhannā tak pahuṅchā diyā.

²aur jo kuchh bhī yūhannā ne dekhā hai us kī gawāhī us ne dī hai, ḳhwāh allāh kā kalām ho yā īsā masīh kī gawāhī.

³mubārak hai wuh jo is nabuwwat kī tilāwat kartā hai. hāṅ, mubārak haiṅ wuh jo sun kar apne diloṅ meṅ is kitāb meṅ darj bāteṅ mahfūz rakhte haiṅ, kyūṅki yih jald hī pūrī ho jāeṅgī.

⁴yih ḳhat yūhannā kī taraf se sūbā āsiyā kī sāt jamā'atoṅ ke lie hai. āp ko allāh kī taraf se fazl aur salāmatī hāsil rahe, us kī taraf se jo hai, jo thā aur jo āne wālā hai, un sāt rūhoṅ kī taraf se jo us ke taḳht ke sāmne hotī haiṅ,

⁵aur īsā masīh kī taraf se yānī us se jo in bātoṅ kā wafādār gawāh, murdoṅ meṅ se pahlā jī uṭhne wālā aur duniyā ke bādshāhoṅ kā sardār hai. us kī tamjīd ho jo hameṅ pyār kartā hai, jis ne apne ḳhūn se hameṅ hamāre gunāhoṅ se ḳhalāsī baḳhshī hai

⁶aur jis ne hameṅ shāhī iḳhtiyār de kar apne ḳhudā aur bāp ke imām banā diyā hai. use azal se abad tak jalāl aur qudrat hāsil rahe! āmīn.

⁷dekheṅ, wuh bādaloṅ ke sāth ā rahā hai. har ek use dekhegā, wuh bhī jinhoṅ ne use chhedā thā. aur duniyā kī tamām qaumeṅ use dekh kar āh-o-zārī kareṅgī. hāṅ, aisā hī ho! āmīn.

⁸rab ḳhudā farmātā hai, “maiṅ awwal aur āḳhir hūṅ, wuh jo hai, jo thā aur jo āne wālā hai, yānī qādir-e-mutlaq ḳhudā.”

⁹maiṅ yūhannā āp kā bhāī aur sharīk-e-hāl hūṅ. mujh par bhī āp kī tarah zulm kiyā jā rahā hai. maiṅ āp ke sāth allāh kī bādshāhī meṅ sharīk hūṅ aur īsā meṅ āp ke sāth sābitqadam rahtā hūṅ. mujhe allāh kā kalām sunāne aur īsā ke bāre meṅ gawāhī dene kī wajah se is jazīre meṅ jo patmus kahlātā hai chhoṛ diyā gayā.

¹⁰rab ke din yānī itwār ko maiṅ rūh-ul-quds kī girift meṅ ā gayā aur maiṅ ne apne pīchhe turam kī sī ek ūṅchī āwāz sunī.

¹¹us ne kahā, “jo kuchh tū dekh rahā hai use ek kitāb meṅ likh kar un sāt jamā'atoṅ ko bhej denā jo ifisus, smurnā, pirgamun, thuātīrā, sardīs, filadilfiyā aur laudīkiyā meṅ haiṅ.”

¹²maiṅ ne bolne wāle ko deḳhne ke lie apne pīchhe nazar ḍālī to sone ke sāt shamādān dekhe.

¹³in shamādānoṅ ke darmiyān koī khaṛā thā jo ibn-e-ādam kī mānind thā. us ne pāoṅ tak kā lambā choġhā pahan rakhā thā aur sīne par sone kā sīnāband bāndhā huā thā.

¹⁴us kā sar aur bāl ūn yā barf jaise safed the aur us kī āṅkheṅ āg ke shole kī mānind thīṅ.

¹⁵us ke pāoṅ bhaṭṭe meṅ damakte pītal kī mānind the aur us kī āwāz ābshār ke shor jaisī thī.

¹⁶apne dahne hāth meṅ us ne sāt sitāre thām rakhe the aur us ke muṅh se ek tez aur dodhārī talwār nikal rahī thī. us kā chehrā pūre zor se chamakne wāle sūraj kī tarah chamak rahā thā.

¹⁷use deḳhte hī maiṅ us ke pāoṅ meṅ gir gayā. maiṅ murdā sā thā. phir us ne apnā dahnā hāth mujh par rakh kar kahā, “mat ḍar. maiṅ awwal aur āḳhir hūṅ.

¹⁸maiṅ wuh hūṅ jo zindā hai. maiṅ to mar gayā thā lekin ab dekh, maiṅ abad tak zindā hūṅ. aur maut aur pātāl kī kunjiyāṅ mere hāth meṅ haiṅ.

¹⁹chunāṅche jo kuchh tū ne dekhā hai, jo abhī hai aur jo āindā hogā use likh de.

²⁰mere dahne hāth meṅ sāt sitāroṅ aur sāt shamādānoṅ kā poshīdā matlab yih hai: yih sāt sitāre āsiyā kī sāt jamā'atoṅ ke farishte haiṅ, aur yih sāt shamādān yih sāt jamā'ateṅ haiṅ.