Read Roman Urdu Geo mukāshafā 10 Bible Online

mukāshafā 10 - Roman Urdu Geo bible

mukāshafā 10

¹phir maiṅ ne ek aur tāqatwar farishtā dekhā. wuh bādal oṛhe hue āsmān se utar rahā thā aur us ke sar ke ūpar qaus-e-quzah thī. us kā chehrā sūraj jaisā thā aur us ke pāoṅ āg ke satūn jaise.

²us ke hāth meṅ ek chhoṭā tūmār thā jo khulā thā. apne ek pāoṅ ko us ne samundar par rakh diyā aur dūsre ko zamīn par.

³phir wuh ūṅchī āwāz se pukār uṭhā. aise lagā jaise sherbabar garaj rahā hai. is par kaṛak kī sāt āwāzeṅ bolne lagīṅ.

⁴un ke bolne par maiṅ un kī bāteṅ likhne ko thā ki ek āwāz ne kahā, “kaṛak kī sāt āwāzoṅ kī bātoṅ par muhr lagā aur unheṅ mat likhnā.”

⁵phir us farishte ne jise maiṅ ne samundar aur zamīn par khaṛā dekhā apne dahne hāth ko āsmān kī taraf uṭhā kar

⁶allāh ke nām kī qasam khāī, us ke nām kī jo azal se abad tak zindā hai aur jis ne āsmānoṅ, zamīn aur samundar ko un tamām chīzoṅ samet ḳhalaq kiyā jo un meṅ haiṅ. farishte ne kahā, “ab der nahīṅ hogī.

⁷jab sātwāṅ farishtā apne turam meṅ phūṅk mārne ko hogā tab allāh kā bhed jo us ne apne nabuwwat karne wāle ḳhādimoṅ ko batāyā thā takmīl tak pahuṅchegā.”

⁸phir jo āwāz āsmān se sunāī dī thī us ne ek bār phir mujh se bāt kī, “jā, wuh tūmār le lenā jo samundar aur zamīn par khaṛe farishte ke hāth meṅ khulā paṛā hai.”

⁹chunāṅche maiṅ ne farishte ke pās jā kar us se guzārish kī ki wuh mujhe chhoṭā tūmār de. us ne mujh se kahā, “ise le aur khā le. yih tere muṅh meṅ shahd kī tarah mīṭhā lagegā, lekin tere mede meṅ kaṛwāhaṭ paidā karegā.”

¹⁰maiṅ ne chhoṭe tūmār ko farishte ke hāth se le kar use khā liyā. mere muṅh meṅ to wuh shahd kī tarah mīṭhā lag rahā thā, lekin mede meṅ jā kar us ne kaṛwāhaṭ paidā kar dī.

¹¹phir mujhe batāyā gayā, “lāzim hai ki tū bahut ummatoṅ, qaumoṅ, zabānoṅ aur bādshāhoṅ ke bāre meṅ mazīd nabuwwat kare.”