Read Roman Urdu Geo mukāshafā 12 Bible Online

mukāshafā 12 - Roman Urdu Geo bible

mukāshafā 12

¹phir āsmān par ek azīm nishān zāhir huā, ek ḳhātūn jis kā libās sūraj thā. us ke pāoṅ tale chāṅd aur sar par bārah sitāroṅ kā tāj thā.

²us kā pāoṅ bhārī thā, aur janm dene ke shadīd dard meṅ mubtalā hone kī wajah se wuh chillā rahī thī.

³phir āsmān par ek aur nishān nazar āyā, ek baṛā aur āg jaisā surḳh azhdahā. us ke sāt sar aur das sīṅg the, aur har sar par ek tāj thā.

⁴us kī dum ne sitāroṅ ke tīsre hisse ko āsmān par se utār kar zamīn par phaiṅk diyā. phir azhdahā janm dene wālī ḳhātūn ke sāmne khaṛā huā tāki us bachche ko janm lete hī haṛap kar le.

⁵ḳhātūn ke beṭā paidā huā, wuh bachchā jo lohe ke shāhī asā se qaumoṅ par hukūmat karegā. aur ḳhātūn ke is bachche ko chhīn kar allāh aur us ke taḳht ke sāmne lāyā gayā.

⁶ḳhātūn ḳhud registān meṅ hijrat karke ek aisī jagah pahuṅch gaī jo allāh ne us ke lie tayyār kar rakhī thī, tāki wahāṅ 1,260 din tak us kī parwarish kī jāe.

⁷phir āsmān par jang chhiṛ gaī. mīkāel aur us ke farishte azhdahe se laṛe. azhdahā aur us ke farishte un se laṛte rahe,

⁸lekin wuh ġhālib na ā sake balki āsmān par apne maqām se mahrūm ho gae.

⁹baṛe azhdahe ko nikāl diyā gayā, us qadīm azhdahe ko jo iblīs yā shaitān kahlātā hai aur jo pūrī duniyā ko gumrāh kar detā hai. use us ke farishtoṅ samet zamīn par phaiṅkā gayā.

¹⁰phir āsmān par ek ūṅchī āwāz sunāī dī, “ab hamāre ḳhudā kī najāt, qudrat aur bādshāhī ā gaī hai, ab us ke masīh kā iḳhtiyār ā gayā hai. kyūṅki hamāre bhāiyoṅ aur bahnoṅ par ilzām lagāne wālā jo din rāt allāh ke huzūr un par ilzām lagātā rahtā thā use zamīn par phaiṅkā gayā hai.

¹¹īmāndār lele ke ḳhūn aur apnī gawāhī sunāne ke zarī'e hī us par ġhālib āe haiṅ. unhoṅ ne apnī jān azīz na rakhī balki use dene tak tayyār the.

¹²chunāṅche ḳhushī manāo, ai āsmāno! ḳhushī manāo, un meṅ basne wālo! lekin zamīn aur samundar par afsos! kyūṅki iblīs tum par utar āyā hai. wuh baṛe ġhusse meṅ hai, kyūṅki wuh jāntā hai ki ab us ke pās waqt kam hai.”

¹³jab azhdahe ne dekhā ki use zamīn par girā diyā gayā hai to wuh us ḳhātūn ke pīchhe paṛ gayā jis ne bachche ko janm diyā thā.

¹⁴lekin ḳhātūn ko baṛe uqāb ke se do par die gae tāki wuh uṛ kar registān meṅ us jagah pahuṅche jo us ke lie tayyār kī gaī thī aur jahāṅ wuh sāṛhe tīn sāl tak azhdahe kī pahuṅch se mahfūz rah kar parwarish pāegī.

¹⁵is par azhdahe ne apne muṅh se pānī nikāl kar daryā kī sūrat meṅ ḳhātūn ke pīchhe pīchhe bahā diyā tāki use bahā le jāe.

¹⁶lekin zamīn ne ḳhātūn kī madad karke apnā muṅh khol diyā aur us daryā ko nigal liyā jo azhdahe ne apne muṅh se nikāl diyā thā.

¹⁷phir azhdahe ko ḳhātūn par ġhussā āyā, aur wuh us kī bāqī aulād se jang karne ke lie chalā gayā. (ḳhātūn kī aulād wuh haiṅ jo allāh ke ahkām pūre karke īsā kī gawāhī ko qāim rakhte haiṅ).

¹⁸aur azhdahā samundar ke sāhil par khaṛā ho gayā.