Read Roman Urdu Geo mukāshafā 13 Bible Online

mukāshafā 13 - Roman Urdu Geo bible

mukāshafā 13

¹phir maiṅ ne dekhā ki samundar meṅ se ek haiwān nikal rahā hai. us ke sāt sīṅg aur sāt sar the. har sīṅg par ek tāj aur har sar par kufr kā ek nām thā.

²yih haiwān chīte kī mānind thā. lekin us ke rīchh ke se pāoṅ aur sherbabar kā sā muṅh thā. azhdahe ne is haiwān ko apnī quwwat, apnā taḳht aur baṛā iḳhtiyār de diyā.

³lagtā thā ki haiwān ke saroṅ meṅ se ek par lā'ilāj zaḳhm lagā hai. lekin is zaḳhm ko shifā dī gaī. pūrī duniyā yih dekh kar hairatzadā huī aur haiwān ke pīchhe lag gaī.

⁴logoṅ ne azhdahe ko sijdā kiyā, kyūṅki usī ne haiwān ko iḳhtiyār diyā thā. aur unhoṅ ne yih kah kar haiwān ko bhī sijdā kiyā, “kaun is haiwān kī mānind hai? kaun is se laṛ saktā hai?”

⁵is haiwān ko baṛī baṛī bāteṅ aur kufr bakne kā iḳhtiyār diyā gayā. aur use yih karne kā iḳhtiyār 42 mahīne ke lie mil gayā.

⁶yūṅ wuh apnā muṅh khol kar allāh, us ke nām, us kī sukūnatgāh aur āsmān ke bāshindoṅ par kufr bakne lagā.

⁷use muqaddasīn se jang karke un par fath pāne kā iḳhtiyār bhī diyā gayā. aur use har qabīle, har ummat, har zabān aur har qaum par iḳhtiyār diyā gayā.

⁸zamīn ke tamām bāshinde is haiwān ko sijdā kareṅge yānī wuh sab jin ke nām duniyā kī ibtidā se lele kī kitāb-e-hayāt meṅ darj nahīṅ haiṅ, us lele kī kitāb meṅ jo zabah kiyā gayā hai.

⁹jo sun saktā hai wuh sun le!

¹⁰agar kisī ko qaidī bananā hai to wuh qaidī hī banegā. agar kisī ko talwār kī zad meṅ ā kar marnā hai to wuh aise hī maregā. ab muqaddasīn ko sābitqadmī aur wafādār īmān kī ḳhās zarūrat hai.

¹¹phir maiṅ ne ek aur haiwān ko dekhā. wuh zamīn meṅ se nikal rahā thā. us ke lele ke se do sīṅg the, lekin us ke bolne kā andāz azhdahe kā sā thā.

¹²us ne pahle haiwān kā pūrā iḳhtiyār us kī ḳhātir istemāl karke zamīn aur us ke bāshindoṅ ko pahle haiwān ko sijdā karne par uksāyā, yānī us haiwān ko jis kā lā'ilāj zaḳhm bhar gayā thā.

¹³aur us ne baṛe mojizānā nishān dikhāe, yahāṅ tak ki us ne logoṅ ke deḳhte deḳhte āsmān se zamīn par āg nāzil hone dī.

¹⁴yūṅ use pahle haiwān kī ḳhātir mojizānā nishān dikhāne kā iḳhtiyār diyā gayā, aur in ke zarī'e us ne zamīn ke bāshindoṅ ko sahīh rāh se bahkāyā. us ne unheṅ kahā ki wuh us haiwān kī tāzīm meṅ ek mujassamā banā deṅ jo talwār se zaḳhmī hone ke bāwujūd dubārā zindā huā thā.

¹⁵phir use pahle haiwān ke mujassame meṅ jān ḍālne kā iḳhtiyār diyā gayā tāki mujassamā bol sake aur unheṅ qatl karwā sake jo use sijdā karne se inkār karte the.

¹⁶us ne yih bhī karwāyā ki har ek ke dahne hāth yā māthe par ek ḳhās nishān lagāyā jāe, ḳhwāh wuh chhoṭā ho yā baṛā, amīr ho yā ġharīb, āzād ho yā ġhulām.

¹⁷sirf wuh shaḳhs kuchh ḳharīd yā bech saktā thā jis par yih nishān lagā thā. yih nishān haiwān kā nām yā us ke nām kā nambar thā.

¹⁸yahāṅ hikmat kī zarūrat hai. jo samajhdār hai wuh haiwān ke nambar kā hisāb kare, kyūṅki yih ek mard kā nambar hai. us kā nambar 666 hai.