Read Roman Urdu Geo mukāshafā 14 Bible Online

mukāshafā 14 - Roman Urdu Geo bible

mukāshafā 14

¹phir maiṅ ne dekhā ki lelā mere sāmne hī siyyūn ke pahāṛ par khaṛā hai. us ke sāth 1,44,000 afrād khaṛe the jin ke māthoṅ par us kā aur us ke bāp kā nām likhā thā.

²aur maiṅ ne āsmān se ek aisī āwāz sunī jo kisī baṛe ābshār aur garajte bādaloṅ kī ūṅchī kaṛak kī mānind thī. yih us āwāz kī mānind thī jo sarod bajāne wāle apne sāzoṅ se nikālte haiṅ.

³yih 1,44,000 afrād taḳht, chār jāndāroṅ aur buzurgoṅ ke sāmne khaṛe ek nayā gīt gā rahe the, ek aisā gīt jo sirf wuhī sīkh sake jinheṅ lele ne zamīn se ḳharīd liyā thā.

⁴yih wuh mard haiṅ jinhoṅ ne apne āp ko ḳhawātīn ke sāth ālūdā nahīṅ kiyā, kyūṅki wuh kuṅwāre haiṅ. jahāṅ bhī lelā jātā hai wahāṅ wuh bhī jāte haiṅ. unheṅ bāqī insānoṅ meṅ se fasal ke pahle phal kī haisiyat se allāh aur lele ke lie ḳharīdā gayā hai.

⁵un ke muṅh se kabhī jhūṭ nahīṅ niklā balki wuh be'ilzām haiṅ.

⁶phir maiṅ ne ek aur farishtā dekhā. wuh mere sar ke ūpar hī hawā meṅ uṛ rahā thā. us ke pās allāh kī abadī ḳhushḳhabrī thī tāki wuh use zamīn ke bāshindoṅ yānī har qaum, qabīle, ahl-e-zabān aur ummat ko sunāe.

⁷us ne ūṅchī āwāz se kahā, “ḳhudā kā ḳhauf mān kar use jalāl do, kyūṅki us kī adālat kā waqt ā gayā hai. use sijdā karo jis ne āsmānoṅ, zamīn, samundar aur pānī ke chashmoṅ ko ḳhalaq kiyā hai.”

⁸ek dūsre farishte ne pahle ke pīchhe pīchhe chalte hue kahā, “wuh gir gayā hai! hāṅ, azīm bābal gir gayā hai, jis ne tamām qaumoṅ ko apnī harāmkārī aur mastī kī mai pilāī hai.”

⁹in do farishtoṅ ke pīchhe ek tīsrā farishtā chal rahā thā. us ne ūṅchī āwāz se kahā, “jo bhī haiwān aur us ke mujassame ko sijdā kare aur jise bhī us kā nishān apne māthe yā hāth par mil jāe

¹⁰wuh allāh ke ġhazab kī mai se piegā, aisī mai jo milāwaṭ ke baġhair hī allāh ke ġhazab ke pyāle meṅ ḍālī gaī hai. muqaddas farishtoṅ aur lele ke huzūr use āg aur gandhak kā azāb sahnā paṛegā.

¹¹aur in logoṅ ko satāne wālī yih āg jaltī rahegī, is kā dhuāṅ abad tak chaṛhtā rahegā. jo haiwān aur us ke mujassame ko sijdā karte haiṅ yā jinhoṅ ne us ke nām kā nishān liyā hai wuh na din, na rāt ko ārām pāeṅge.”

¹²yahāṅ muqaddasīn ko sābitqadam rahne kī zarūrat hai, unheṅ jo allāh ke ahkām pūre karte aur īsā ke wafādār rahte haiṅ.

¹³phir maiṅ ne āsmān se ek āwāz yih kahtī huī sunī, “likh, mubārak haiṅ wuh murde jo ab se ḳhudāwand meṅ wafāt pāte haiṅ.” “jī hāṅ,” rūh farmātā hai, “wuh apnī mehnat-mashaqqat se ārām pāeṅge, kyūṅki un ke nek kām un ke pīchhe ho kar un ke sāth chaleṅge.”

¹⁴phir maiṅ ne ek safed bādal dekhā, aur us par koī baiṭhā thā jo ibn-e-ādam kī mānind thā. us ke sar par sone kā tāj aur hāth meṅ tez darāntī thī.

¹⁵ek aur farishtā allāh ke ghar se nikal kar ūṅchī āwāz se pukār kar us se muḳhātib huā jo bādal par baiṭhā thā, “apnī darāntī le kar fasal kī kaṭāī kar! kyūṅki fasal kāṭne kā waqt ā gayā hai aur zamīn par kī fasal pak gaī hai.”

¹⁶chunāṅche bādal par baiṭhne wāle ne apnī darāntī zamīn par chalāī aur zamīn kī fasal kī kaṭāī huī.

¹⁷is ke bād ek aur farishtā allāh ke us ghar se nikal āyā jo āsmān par hai, aur us ke pās bhī tez darāntī thī.

¹⁸phir ek tīsrā farishtā āyā. use āg par iḳhtiyār thā. wuh qurbāngāh se āyā aur ūṅchī āwāz se pukār kar tez darāntī pakaṛe hue farishte se muḳhātib huā, “apnī tez darāntī le kar zamīn kī angūr kī bel se angūr ke guchchhe jamā kar, kyūṅki us ke angūr pak gae haiṅ.”

¹⁹farishte ne zamīn par apnī darāntī chalāī, us ke angūr jamā kie aur unheṅ allāh ke ġhazab ke us baṛe hauz meṅ phaiṅk diyā jis meṅ angūr kā ras nikālā jātā hai.

²⁰yih hauz shahr se bāhar wāqe thā. us meṅ paṛe angūroṅ ko itnā raundā gayā ki hauz meṅ se ḳhūn bah niklā. ḳhūn kā yih sailāb 300 kilomīṭar dūr tak pahuṅch gayā aur wuh itnā zyādā thā ki ghoṛoṅ kī lagāmoṅ tak pahuṅch gayā.